Ugonjwa wa mapafu unaosababishwa na virusi vya corona (COVID-19) ulioenea duniani pote umeathiri mamilioni ya Mashahidi wa Yehova. Wanafanya kadiri wawezavyo ili kufuata mwongozo wa wenye mamlaka katika maeneo yao na wakati huohuo kudumisha ratiba ya mambo ya kiroho. Katika maeneo ya ofisi ya tawi ambayo yameathiriwa zaidi na ugonjwa huo, ndugu na dada wamebuni njia za kuwasaidia kuendelea na huduma yao.

Ndugu mmoja aliye huko Pisa, Italia alisema hivi: “Utumishi wetu una matokeo mazuri sana! Kwa kuwa watu wengi wako nyumbani, mimi na mke wangu tulipitia majina ya watu tuliokuwa nao katika simu zetu na kupanga kuwasiliana nao kwa njia ya video. Tuna mafunzo mengi na ziara nyingi za kurudia, ikiwa ni pamoja na wapya na wale ambao tumewahi kuzungumza nao awali. Hilo linatufanya tutumie muda mwingi katika huduma na tunapata matokeo mazuri.”

Nchini Korea Kusini, janga hili la afya limewafanya wahubiri watumie kwa ukawaida sehemu mbalimbali za tovuti ya jw.org na programu ya JW Library. Kwa mfano ndugu mmoja alipokea ujumbe wa simu ambao hakuutarajia kutoka kwa mwanafunzi wake wa Biblia ambaye aliacha kujifunza naye miaka mitatu iliyopita. Mwanafunzi huyo wa Biblia alisema kwamba janga hili la afya lilimfanya afikirie ishara za siku za mwisho. Ndugu huyo aliweza kutumia sehemu ya “Shiriki Kiunganishi” katika programu ya JW Library ili kumtumia makala inayozungumzia siku za mwisho kwa kutumia ujumbe wa simu. Ndugu huyo anasema limekuwa jambo lenye “kutia moyo kuona jinsi ishara zinazoonyesha tunaishi katika siku za mwisho, zinavyowachochea watu wengi kuona kwamba wana uhitaji wa kiroho.”

Ripoti nyingi kutoka katika ofisi za tawi mbalimbali ulimwenguni zinaonyesha ni jinsi gani ndugu na dada zetu wanavyothamini huduma yao. Inafurahisha kuona jinsi wanavyotumia “hekima inayotumika”wanapoendelea kuhubiri habari njema.—Mika 6:9.