Makutaniko mengi duniani pote yanategemea teknolojia ya kisasa ili kufanya mikutano wakati huu wa ugonjwa wa virusi vya corona. Hata hivyo, baadhi ya ndugu zetu wanaoishi katika maeneo ya mbali yasiyo na Intaneti wamefanya jitihada nyingi ili kudumisha ratiba yao ya kiroho, huku wakitii miongozo ya kujihadhari na ugonjwa wa virusi vya corona (COVID-19). Fikiria mifano michache kutoka bara la Afrika.

Ndugu na dada zetu wetu wengi hawana Intaneti, hivyo hawawezi kutumia programu ya Zoom. Kila juma, ofisi ya tawi ya Malawi hutuma faili za video za mikutano kwa wazee wa kila kutaniko kupitia mtandao wa simu ya mkononi. Kisha wazee husambaza faili hizo kwa wahubiri walio katika makutaniko yao.

Hata hivyo, hilo lilileta changamoto kwa wahubiri 28 wa Kutaniko la Tcharo, wanaoishi katika eneo lenye milima lililo kaskazini mwa Malawi karibu na Ziwa Malawi. Kwa kuwa milima huzuia mtandao wa simu kufika katika eneo lao, mzee anapaswa kusafiri kilomita nyingi mpaka eneo lenye mtandao mzuri. Kisha, mzee angerudi tena katika eneo la milima ili awe karibu na kila nyumba ya Shahidi ili aweze kuwatumia faili hizo kwa kutumia teknolojia ya Bluetooth.

Hivi karibuni, wazee walifurahi walipogundua kwamba wanaweza kupata mtandao wa simu karibu zaidi na eneo lao—katika Ziwa Malawi. Akiwa ziwani ndani ya mtumbwi, mbali na milima, ndugu anaweza kupakua faili za video. Jambo hilo huokoa muda mwingi ambao ndugu wangetumia kusafiri.

Ili “kutembelea” makutaniko katika maeneo ya mbali ya kaskazini-magharibi mwa Msumbiji, waangalizi wa mzunguko katika eneo hilo hutoa hotuba zao kupitia simu za mkononi. Kwa kuwa haiwezekani kupiga simu kwa kuwaunganisha watu wengi, ni jambo la kawaida kwa waangalizi wa mizunguko kutoa hotuba zao wakiwa wameweka simu nyingi za mkononi mbele yao, kila mojawapo ikiwa imeunganishwa kwa familia mbalimbali za wahubiri kutanikoni.

Baadhi ya wahubiri wanaishi katika maeneo yaliyo mbali sana hivi kwamba hawapati mtandao wa simu katika nyumba zao. Wakati wa mkutano ukifika, ndugu na dada hao hutembea msituni hadi wanapopata eneo lenye mtandao. Mara tu wanapopata mtandao, hukaa hapo na kusikiliza programu.

Ndugu Yohane Vinho, mwangalizi wa mzunguko wa eneo hilo, anasema kwamba “ndugu na dada wengi hufanya jitihada nyingi ili wanufaike na mikutano,” na hilo huwaimarisha kiroho licha ya kuwa katika eneo la mbali. Mwangalizi mwingine wa mzunguko, Ndugu Carlos Cortazão, anasema hivi: “Tunahisi kana kwamba tuko pamoja na ndugu zetu katika Jumba la Ufalme, tukitoa maelezo na kuimba nyimbo pamoja. Tunaona mkono wa Yehova kupitia jinsi anavyoendelea kuwalisha watu wake chakula cha kiroho wakati huu wa janga.”—Yohana 21:17.