Ceuk Isa, ”Bangsa-bangsa bakal silih perangan, karajaan-karajaan ogé silih perangan. Bakal aya lini gedé, sarta di mana-mana bakal aya kalaparan jeung wabah panyakit.” (Lukas 21:10, 11) Sidik jari téh gabungan tina garis-garis nu ngabentuk hiji pola. Sidik jari ieu ngabédakeun hiji jalma ti jalma séjén. Kitu ogé jeung ramalan-ramalan dina Alkitab nu kajadian babarengan, éta kabéh jadi hiji tanda yén ”Pamaréntahan Allah geus deukeut”. Mangga perhatikeun bukti-bukti di handap ieu.

1. PERANG

Dina taun 1914, aya perang nu panggedéna di sapanjang sajarah umat manusa! Para ahli sajarah nyebutkeun taun 1914 téh ngarobah sajarah umat manusa lantaran perang sadunya mimiti kajadian dina taun éta. Senjata-senjata siga tank, bom udara, senapan mesin, jeung gas racun leuwih sering digunakeun tibatan saacanna. Terus sanggeusna, aya perang dunya kadua. Senjata nuklir téh mimiti digunakeun dina perang dunya kadua. Jadi ti saprak taun 1914, aya leuwih loba perang di mana-mana. Balukarna jutaan jalma paraéh.

2. LINI

Ceuk Britannica Academic, unggal taunna aya 100 lini gedé nu kajadian jeung nyababkeun karusakan nu parah. Tuluy Badan Survei Geologi ti Amerika ogé ngalaporkeun, ”Tina data taun 1900-an, aya kira-kira 16 lini gedé nu kajadian unggal taunna.” Sababaraha jalma mikir laporan lini beuki loba téh lantaran jalma geus boga cara atawa alat nu canggih pikeun ngadétéksi lini. Tapi sabenerna mah, di sakuliah dunya, loba lini nu gedé pisan geus nyababkeun kasusahan jeung maot leuwih ti saacanna.

3. KAKURANGAN DAHAREUN

Kakurangan dahareun téh disababkeun ku perang, korupsi, krisis ékonomi, atawa ayana cuaca ékstrém. Program Pangan Dunia taun 2018 nyebutkeun, ”Di sakuliah dunya, 821 juta jalma kaancam kalaparan sarta 124 juta jalma geus kalaparan.” Aya kira-kira 3,1 juta budak maot unggal taunna lantaran kurang gizi. Dina taun 2011, aya 45 persén budak di dunya maot ku lantaran kurang gizi.

4. PANYAKIT JEUNG PANDÉMI

Hiji publikasi tina Organisasi Kesehatan Dunia nyebutkeun, ”Dina abad ka-21, loba panyakit nu bahaya siga kolera, PES, jeung demam kuning nu marunculan deui. Malah aya ogé panyakit-panyakit anyar siga SARS, wabah flu, Ebola, jeung Zika. Nu panganyarna aya pandémi COVID-19. Sanajan élmu kadokteran téh geus beuki maju, para élmuwan jeung dokter téh can manggihan ubar keur kabéh panyakit.

5. WARTA HADÉ DISEBARKEUN KA SAKULIAH DUNYA

Isa gé méré nyaho ramalan séjénna, nyaéta, ”Warta hadé ngeunaan Pamaréntahan Allah bakal diuarkeun ka sakuliah dunya supaya kadéngé ku kabéh bangsa, geus kitu kakara ahir éta datang.” (Matius 24:14) Sanajan dunya keur nyanghareupan rupa-rupa masalah, aya leuwih ti dalapan juta jalma ti rupa-rupa bangsa nu nguarkeun warta hadé ngeunaan Pamaréntahan Allah di 240 nagri jeung dina leuwih ti 1.000 basa. Hal ieu téh can pernah kajadian dina sapanjang sajarah umat manusa.

Ramalan-ramalan ti Isa keur ngawujud ayeuna. Ku naon ieu téh penting keur urang? Lantaran Isa ngomong, ”Lamun maranéh ningali hal-hal ieu kajadian, éta tandana Pamaréntahan Allah geus deukeut.”​—Lukas 21:31.

Lamun urang merhatikeun tanda-tanda ti Isa sarta itungan waktu tina Alkitab, urang bisa apal yén Allah ngadegkeun Pamaréntahan-Na di sawarga dina taun 1914. a Basa éta Anjeunna ngalantik Putra-Na nyaéta Isa Al-Masih pikeun jadi Raja. (Jabur 2:2, 4, 6-9) Moal lila deui Pamaréntahan Allah bakal maréntah ieu bumi sarta nyingkirkeun kabéh pamaréntahan séjénna. Pamaréntahan éta ogé bakal ngarobah bumi jadi pirdaus pikeun dicicingan salilana ku umat manusa.

Sakeudeung deui, hal-hal anu aya dina doa nu diajarkeun ku Isa téh bakal kajadian, ”Mugia Pamaréntahan Bapa geura ngawasa. Kahoyong Bapa mugia laksana di bumi saperti di sorga.” (Matius 6:10) Ti saprak ngadeg dina taun 1914, naon nu geus dilakukeun ku Pamaréntahan Allah? Jeung naon nu bisa dipiharep ku urang waktu Pamaréntahan Allah geus bener-bener maréntah sakabéh umat manusa?