Dina unggal agama, pasti aya jalma-jalma nu hadé haté. Gusti apal jeung merhatikeun maranéhna. Hanjakalna, agama osok dijadikeun alesan pikeun ngalakukeun kajahatan. (2 Korinta 4:3, 4; 11:13-15) Loba laporan nyebutkeun yén sababaraha agama ngadukung perang, térorisme, jeung dibasmina hiji suku bangsa. Malah, loba pamingpin agama nyiksa jeung ngalakukeun pelécéhan séksual ka barudak. Ieu kabéh nganyenyeri haté jalma-jalma nu percaya ka Gusti! Baca Mateus 24:3-5, 11, 12.

Agama sajati mah ngamulyakeun Gusti, ari agama palsu nganyenyeri haté Mantenna. Pangajaran agama palsu teu dumasar kana Alkitab, sarta ngajarkeun kabohongan ngeunaan Gusti jeung jalma nu geus maot. Tapi, Yéhuwa hoyong jalma-jalma nyaho nu sabenerna ngeunaan Mantenna. Baca Pandita 9:5, 10; 1 Timoteus 2:3-5.

Gusti moal katipu ku agama-agama jeung para panganutna nu ngakuna nyaah ka Mantenna, padahal mah nyaah ka dunya nu dikawasaan ku Sétan. (Yakobus 4:4) Dina Kitab Suci, kabéh agama palsu ieu disebut ”Babul raya”. Babul téh kota di jaman baheula, tempat dimimitianana agama palsu sanggeus Banjir Gedé dina jaman Nuh. Moal lila deui, kabéh agama nu nipu jeung maksa jalma-jalma ngajalankeun tradisi agama nu salah bakal dimusnakeun ku Gusti. Baca Wahyu 17:1, 2, 5, 16, 17; 18:8.

Sanajan kitu, Yéhuwa teu mopohokeun jalma-jalma nu hadé haté dina agama palsu. Maranéhna bakal ditarik kaluar ti agama palsu sarta bakal diajarkeun bebeneran ku Mantenna. Baca Mika 4:2.

Yéhuwa nyaah ka jalma nu hayang diajar bebeneran jeung hayang migawé nu hadé. Gusti ngajurung maranéhna pikeun ninggalkeun agama palsu. Jalma nu nyaah ka Gusti pasti daék ninggalkeun kabiasaan goréng nu teu nyenangkeun Gusti. Baca Wahyu 18:4.

Dina abad kahiji, jalma-jalma nu hadé haté saruka bungah sanggeus ngadéngé warta hadé ti para rasul. Maranéhna diajar jalan hirup nu anyar, nu leuwih ngabagjakeun. Maranéhna jadi boga tujuan jeung harepan. Sanggeus ngadéngé warta hadé, maranéhna langsung nyieun tindakan ku ngutamakeun Yéhuwa dina kahirupan. Urang kudu nyonto tuladan maranéhna! Baca 1 Tesalonika 1:8, 9; 2:13.

Jalma-jalma nu daék ninggalkeun agama palsu bakal ditarima jadi kulawarga Yéhuwa. Lamun kaluar tina agama palsu, Sadérék bisa nyobat jeung Gusti, bisa hirup langgeng, jeung bisa boga kulawarga anyar. Saha kulawarga anyar ieu téh? Kabéh jalma nu ibadah ka Yéhuwa. Baca Markus 10:29, 30; 2 Korinta 6:17, 18.

Aya kabar gumbira! Agama palsu téréh dimusnakeun. Jalma-jalma moal disasabkeun deui, moal dipaksa ngajalankeun kabiasaan nu salah, jeung moal kapisah-pisah deui. Kabéh bakal ngahiji jeung ibadah ka Gusti nu sajati. Baca Wahyu 18:20, 21; 21:3, 4.