Yosua 24:1-33
-
Yosua nyaritakeun sajarah Israél (1-13)
-
Yosua ngajurung urang Israél nyembah Yéhuwa (14-24)
-
”Urang jeung kulawarga urang mah rék nyembah Yéhuwa” (15)
-
-
Perjangjian Yosua jeung Israél (25-28)
-
Yosua maot jeung dikuburkeun (29-31)
-
Tulang-taléng Yusuf dikuburkeun di Syikhém (32)
-
Éléazar maot jeung dikuburkeun (33)
24 Tuluy, Yosua ngumpulkeun sakabéh kaom Israél di Syikhém. Manéhna ngageroan para kokolot Israél, para pamingpin, para hakim, jeung para pangawas. Kabéhanana nangtung di hareupeun Allah nu bener.
2 Geus kitu, Yosua ngomong ka kabéhanana, ”Ieu nu diucapkeun ku Yéhuwa Allah Israél, ’Baheula, karuhun maranéh téh maratuhna di peuntaseun Walungan Éfrat, kaasup Térah bapana Ibrahim jeung bapana Nahor. Maranéhna téh nyembah allah-allah séjén.
3 ”’Ka dieunakeun, Kuring milih Ibrahim karuhun maranéh ti peuntaseun Walungan Éfrat jeung nitah manéhna ngideran sakuliah tanah Kanaan. Ku Kuring manéhna dibéré Ishak jeung loba turunan.*
4 Ka Ishak Kuring méré Yakub jeung Ésau. Ka dieunakeun, Kuring méré Gunung Séir ka Ésau pikeun jadi milikna, ari Yakub jeung anak-anakna mah indit ka Mesir.
5 Tuluy Kuring ngutus Musa jeung Harun. Ku Kuring Mesir dihukum, terus maranéh dibawa kaluar.
6 Waktu karuhun maranéh ku Kuring dibawa kaluar ti Mesir jeung nepi di laut, urang Mesir ngudag karuhun maranéh bari tarumpak karéta perang jeung kuda nepi ka Laut Beureum.
7 Karuhun maranéh téh tingjarerit ménta tulung ka Kuring, Yéhuwa. Seug antara maranéhna jeung urang Mesir ku Kuring dihalangan ku awan poék, tuluy urang Mesir téh dilelepkeun ka laut. Maranéh ningali sorangan naon nu dilakukeun ku Kuring di Mesir. Geus kitu, salila mangtaun-taun maranéh cicing di gurun keusik.
8 ”’Kuring mawa maranéh ka tanah urang Amori nu matuh di beulah ditu* Walungan Yordan. Maranéhna téh merangan maranéh. Tapi, ku Kuring maranéhna diserahkeun ka maranéh, supaya tanahna bisa direbut ku maranéh. Maranéhna dimusnakeun ku Kuring di hareupeun maranéh.
9 Tuluy Balak anak Zipor, raja Moab, merangan Israél. Manéhna nitah Biléam anak Béor datang pikeun ngutuk maranéh.
10 Tapi, Biléam teu didéngé ku Kuring. Manéhna kalah ka ngaberkahan maranéh mangkali-kali. Kuring nyalametkeun maranéh ti manéhna.
11 ”’Geus kitu, maranéh meuntasan Walungan Yordan jeung nepi di Yérikho. Para pamingpin* Yérikho, urang Amori, urang Périz, urang Kanaan, urang Hét, urang Girgasyi, urang Héwi, jeung urang Yébus merangan maranéh. Tapi, ku Kuring maranéhna diserahkeun ka maranéh.
12 Méméh maranéh daratang gé Kuring ngalantarankeun maranéhna pegat harepan.* Ku sabab éta, maranéhna kabur ti maranéh, sakumaha dua raja urang Amori. Kaburna téh lain ku pedang atawa ku busur panah maranéh.
13 Tah kitu maranéh ku Kuring dibéré tanah lain beunang maranéh ngusahakeun, jeung dibéré kota-kota lain beunang maranéh ngabangun, tuluy maranéh téh maratuh wéh di dinya. Maranéh gé kari ngadahar hasil tina kebon anggur jeung kebon zaitun nu teu dipelak ku maranéh.’
14 ”Nu matak ayeuna mah maranéh kudu hormat* ka Yéhuwa, sarta satia* jeung iklas* nyembah Anjeunna. Singkirkeun aallahan nu disembah ku karuhun maranéh di peuntaseun Walungan Éfrat jeung di Mesir. Pék sembah Yéhuwa.
15 Upama maranéh embung nyembah Yéhuwa, sok puguhkeun poé ieu kénéh saha nu rék disembah ku maranéh, aallahan nu disembah ku karuhun maranéh di peuntaseun Walungan Éfrat atawa aallahan urang Amori nu tanahna dicicingan ku maranéh. Tapi, urang jeung kulawarga urang mah rék nyembah Yéhuwa.”
16 Ngadéngé kitu, bangsa éta ngajawab, ”Teu kapikir ku urang kabéh rék ninggalkeun Yéhuwa tuluy nyembah allah-allah séjén.
17 Yéhuwa téh Allah urang nu mawa urang jeung karuhun urang kaluar ti Mesir, tempat urang diperbudak. Anjeunna geus nyieun mujijat-mujijat nu hébat di hareupeun urang. Anjeunna gé ngajaga urang di sapanjang jalan jeung ti kabéh bangsa nu daérahna diliwatan ku urang.
18 Yéhuwa ngusir sakabéh bangsa, kaasup urang Amori nu saacanna cicing di tanah ieu. Ku kituna, urang kabéh gé rék nyembah Yéhuwa lantaran Anjeunna téh Allah urang.”
19 Tuluy, Yosua ngomong ka bangsa éta, ”Bisa kitu maranéh terus nyembah Yéhuwa? Anjeunna téh Allah nu suci, jeung hayang maranéh ngabdi ka Anjeunna hungkul. Lamun maranéh teu bisa ngalaksanakeun éta, Anjeunna moal bakal ngahampura kasalahan* jeung dosa maranéh.
20 Lamun maranéh ninggalkeun Yéhuwa jeung nyembah allah-allah séjén, Anjeunna gé bakal ngalawan maranéh jeung ngamusnakeun maranéh, najan tadina mah Anjeunna téh bageur ka maranéh.”
21 Bangsa éta némbalan, ”Ngan Yéhuwa nu bakal disembah ku urang!”
22 Tuluy Yosua ngomong ka maranéhna, ”Maranéh sorangan saksina yén maranéh geus milih rék nyembah Yéhuwa.” Ku maranéhna dijawab, ”Enya, urang saksina.”
23 ”Heug ari kitu mah, singkirkeun patung allah-allah séjén nu aya di antara maranéh, jeung sembah Yéhuwa Allah Israél ku sapinuh haté.”
24 Ceuk bangsa éta ka Yosua, ”Urang bakal nyembah Yéhuwa Allah urang jeung nurut ka Anjeunna!”
25 Jadi dina poé éta, Yosua ngayakeun perjangjian jeung bangsa éta. Manéhna netepkeun aturan jeung hukum keur maranéhna di Syikhém.
26 Geus kitu, Yosua nuliskeun kekecapan ieu dina buku Hukum Allah. Manéhna nyokot batu gedé tuluy diteundeun di handapeun tangkal gedé di deukeut tempat suci Yéhuwa.
27 Yosua ngomong deui ka sakabéh jalma, ”Tah, batu ieu bakal jadi saksi keur urang kabéh, lantaran batu ieu geus ngadéngé sagala nu diucapkeun Yéhuwa ka urang kabéh. Éta bakal jadi saksi, supaya maranéh teu ngalawan Allah maranéh.”
28 Geus kitu, ku Yosua kabéhanana dibubarkeun, dititah balik ka tanah warisanana masing-masing.
29 Sanggeus éta kabéh, Yosua anak Nun, hamba Yéhuwa, maot dina umur 110 taun.
30 Manéhna dikuburkeun di tanah warisanana di Timnat-séra, di daérah pagunungan Éfraim, di kaléreun Gunung Gaas.
31 Urang Israél terus nyembah Yéhuwa salila Yosua hirup. Sanggeus Yosua maot gé urang Israél terus nyembah Anjeunna salila aya kénéh para pamingpin nu nyaksian kabéh tindakan Yéhuwa demi urang Israél.
32 Tulang-taléng Yusuf, anu dibawa ku urang Israél ti Mesir téa, dikuburkeun di Syikhém di tanah nu dibeuli ku Yakub 100 duit pérak ti anak-anak Hamor, bapana Syikhém. Éta jadi tanah warisan turunan Yusuf.
33 Éléazar anak Harun gé maot. Manéhna dikuburkeun di Pasir* Pinéhas, di daérah pagunungan Éfraim, nu geus dibikeun ka Pinéhas anakna.
Catetan Tambihan
^ As. ”binih”.
^ Nyaéta di wétaneun Walungan Yordan.
^ Atawa bisa jadi ”Nu baroga tanah”.
^ Atawa bisa jadi ”kasieunan”.
^ As. ”sieun”.
^ Atawa ”ku bebeneran”.
^ Atawa ”taya cacadna”.
^ Atawa ”barontakna”.
^ Atawa ”Bukit”.
