Obaja 1:1-21
1 Titingalian nu ditarima ku Obaja:*
Ieu nu diucapkeun ku manéhna ngeunaan firman ti Gusti Nu Maha Agung Yéhuwa sual Édom,
”Aya pesen ti Yéhuwa,Anjeunna geus ngutus saurang jalma ka bangsa-bangsa pikeun ngomong,
’Hayu siap-siap, urang perangan manéhna.’”*
2 ”Manéh ku Kuring geus direndahkeun di antara bangsa-bangsa.
Manéh dianggap hina pisan ku maranéhna.
3 Manéh katipu ku kasombongan manéh sorangan,Manéh nu nyalindung di cadas,Nu cicing di tempat nu luhur, sarta ngomong kieu di jero haté,’Saha nu bisa nurunkeun aing ka handap?’
4 Sanajan manéh cicing di tempat nu luhur* siga heulang,Atawa nyayang di antara béntang-béntang,Kuring bakal nurunkeun manéh ti dinya,” ceuk Yéhuwa.
5 ”Lamun peuting-peuting manéh didatangan ku bangsat atawa rampog,Nu dicokot téh ngan nu dipikahayang ku maranéhna hungkul, pan?
Atawa lamun manéh didatangan ku tukang manén anggur,Pasti aya nu disésakeun supaya bisa dipulung ku batur, pan?
Tapi manéh mah bakal bener-bener diancurkeun ku musuh-musuh manéh!*
6 Ésau geus digaradah!
Harta pependemanana geus dijarah!
7 Balad-balad manéh* geus nipu manéh.
Maranéhna bakal ngusir manéh nepi ka wates daérah.
Jalma-jalma nu tadina akur jeung manéh geus ngéléhkeun manéh.
Jalma-jalma nu dahar roti bareng jeung manéh bakal ngajiret manéh ku jaring,Tapi manéh teu engeuh.”
8 Ieu firman Yéhuwa, ”Poé éta,Kuring bakal ngabinasakeun jalma-jalma nu bijaksana di ÉdomSarta jalma-jalma nu pinter di daérah pagunungan Ésau.
9 Éh Téman, para prajurit manéh bakal kasieunan,Lantaran kabéh jalma di daérah pagunungan Ésau bakal dimusnakeun.
10 Ku sabab manéh geus kejem ka Yakub, dulur manéh,Manéh bakal ngarasa éra pisan,Sarta musna salilana.
11 Waktu para prajurit dulur manéh ditawan ku urang asing,Waktu bangsa séjén asup ka gerbangna sarta ngabagikeun jarahan ti Yérusalém ku cara diundi,Manéh ngan saukur nangtung jeung ningalikeun.
Manéh sarua jahatna siga maranéhna.
12 Ningali dulur-dulur manéh keuna musibat, kuduna mah manéh ulah mupuas,Waktu urang Yéhuda dibinasakeun, kuduna mah manéh ulah atoh,Sarta waktu maranéhna keur kasusahan, kuduna mah manéh teu ngaléléwé.
13 Waktu umat Kuring keuna musibat, kuduna mah manéh teu asup ka gerbangna,Waktu maranéhna keuna musibat, kuduna mah manéh teu mupuas,Sarta waktu maranéhna keuna musibat, kuduna mah manéh teu ngarampas hartana.
14 Waktu maranéhna kalabur, kuduna mah teu dicegat jeung dipaéhan ku manéh,Sarta waktu maranéhna keur kasusahan, kuduna mah maranéhna teu diserahkeun ka musuh.
15 Poéna Yéhuwa ngahukum sakabéh bangsa geus deukeut.
Naon nu geus dilampahkeun ku manéh bakal kaalaman ogé ku manéh.
Kalakuan manéh ka batur bakal malik ka diri manéh sorangan.
16 Sakumaha manéh nginum cianggur di gunung Kuring nu suci,Bangsa-bangsa gé bakal terus nginum cianggur nu ngalambangkeun amarah Kuring.
Maranéhna bakal nginum amarah Kuring nepi ka béak,Tuluy maranéhna bakal musna euweuh tapakna.
17 Tapi, di Gunung Zion bakal aya jalma-jalma nu salamet,Sarta gunung éta bakal jadi suci.
Turunan Yakub bakal meunangkeun deui milikna.
18 Turunan Yakub bakal jadi kawas seuneu,Turunan Yusuf gé bakal jadi kawas seuneu,Ari turunan Ésau mah bakal jadi kawas jarami.
Maranéhna bakal ngaduruk turunan Ésau nepi ka béak,Moal aya nu bakal salamet,Sabab Yéhuwa nu ngucapkeunana.
19 Maranéhna bakal ngarebut Négéb jeung daérah pagunungan Ésau,Syéféla jeung tanah urang Filistin.
Maranéhna bakal ngarebut daérah Éfraim jeung daérah Samaria,Sarta Bényamin bakal ngarebut Giléad.
20 Urang Israél nu dibawa ka pangbuangan, nu aya di bénténg ieu,Bakal ngapimilik tanah Kanaan nepi ka Zaréfat.
Urang Yérusalém nu dibawa ka pangbuangan, nu aya di Séfarad, bakal ngarebut kota-kota di Négéb.
21 Nu nyalametkeun jalma-jalma bakal naék ka Gunung ZionPikeun ngahakiman daérah pagunungan Ésau,Sarta nu bakal ngawasa jadi raja téh Yéhuwa.”
Catetan Tambihan
^ Hartina ”Hamba Yéhuwa”.
^ Maksudna, Édom.
^ Atawa bisa jadi ”ngapung luhur”.
^ Atawa bisa jadi ”Sakumaha parahna manéh bakal diancurkeun?”
^ Atawa ”Nu nyieun perjangjian jeung manéh”.
