Jabur 9:1-20
Keur pamingpin musik: Ngeunaan Mut-labén.* Lagu karangan Daud.
א [Alef]
9 Nun Yéhuwa, abdi badé sapinuh haté muji Gusti.
Abdi badé nyaritakeun sadaya padamelan Gusti anu harébat.
2 Abdi bakal gumbira jeung suka bungah ku karana Gusti.
Abdi badé ngawihkeun pupujian* kanggo nami Gusti, nun Allah Nu Maha Agung.
ב [Bet]
3 Waktu musuh-musuh abdi malundur,Maranéhna bakal tingjarungkel sarta musna ti payuneun Gusti.
4 Gusti adil waktu ngabéla perkara abdi.
Gusti calik dina tahta sarta adil waktu ngahakiman.
ג [Gimel]
5 Gusti tos negor bangsa-bangsa jeung ngabinasakeun nu jarahat.
Ngaran maranéhna moal diinget-inget deui salalanggengna.
6 Musuh tos musna salilana.
Gusti tos ngancurkeun kota-kota maranéhna.
Maranéhna moal diinget-inget deui.
ה [He]
7 Tapi Yéhuwa aya dina tahta-Na salamina.
Anjeunna ngukuhkeun tahta-Na pikeun ngajalankeun kaadilan.
8 Anjeunna bakal adil waktu ngahakiman penduduk bumi.*
Anjeunna bakal nyieun putusan hukum nu adil keur bangsa-bangsa.
ו [Waw]
9 Yéhuwa bakal jadi tempat panyalindungan* nu aman keur jalma nu ditindes,Tempat panyalindungan nu aman waktu keur kasusahan.
10 Nu terang ka nami Gusti bakal percaya ka Gusti.
Gusti moal bakal ninggalkeun jalma nu ngalalayanan Gusti, nun Yéhuwa.
ז [Zayin]
11 Kawihkeun pupujian kanggo Yéhuwa, nu linggih di Zion,Caritakeun padamelana-Na ka bangsa-bangsa.
12 Allah bakal inget ka nu sangsara sarta bakal ngabales jalma nu maéhan maranéhna,Anjeunna moal mopohokeun jumerit maranéhna ménta tulung.
ח [Het]
13 Nun Yéhuwa, nu nyalametkeun abdi ti gerbang maot,Tingali, abdi téh sangsara lantaran jalma-jalma nu ngéwa ka abdi. Sing bageur ka abdi,
14 Ngarah abdi tiasa nguarkeun tindakan Gusti nu layak dipuji di gerbang-gerbang kota ZionSarta suka bungah lantaran disalametkeun ku Gusti.
ט [Tet]
15 Bangsa-bangsa tigebrus kana lombang nu digali ku maranéhna sorangan.
Suku maranéhna kajiret ku jaring nu disumputkeun ku maranéhna.
16 Yéhuwa dikenal lantaran putusan hukum-Na.
Jalma jahat cilaka ku polahna sorangan.
Higayon.* (Sela)
י [Yod]
17 Nu jarahat bakal asup ka Kuburan,*Kitu deui jeung kabéh bangsa nu mopohokeun Allah.
18 Tapi nu mariskin mah moal dipopohokeun salilana.
Harepan jalma nu lemah lembut gé moal sirna.
כ [Kaf]
19 Tulungan abdi, nun Yéhuwa! Hakiman bangsa-bangsa di payuneun Gusti.
Ulah nepi ka manusa nu unggul.
20 Maranéhna sina sarieuneun, nun Yéhuwa,Bangsa-bangsa sina nyarahoeun maranéhna téh ngan saukur manusa biasa. (Sela)
Catetan Tambihan
^ Tingali Daptar Istilah.
^ Atawa ”maén musik”.
^ Atawa ”tanah nu subur”.
^ Atawa ”tempat luhur”.
^ Tingali Daptar Istilah.
^ Atawa ”Syéol”. Tingali Daptar Istilah.
