Jabur 19:1-14
Keur pamingpin musik. Lagu karangan Daud.
19 Langit nguarkeun kamulyaan Allah.
Angkasa ngémbarkeun karya panangan Anjeunna.
2 Unggal poé, ucapan kabéhanana téh ngaburial kawas cai.
Unggal peuting, kabéhanana nyingkabkeun pangaweruh ngeunaan Anjeunna.
3 Taya ucap taya kecap,Sorana teu kadéngé.
4 Tapi caritana* téh tepi ka sakuliah bumi,Sarta wartana tepi ka tungtung-tungtung bumi.*
Di langit, Allah masang kémah keur panonpoé,
5 Nu siga pangantén lalaki nu kaluar ti kamar panganténna,Nu gumbira siga lalaki kuat nu lumpat di jalurna.
6 Éta muncul ti tungtung langit nu ieu,Tuluy nguriling ka tungtung langit nu itu.
Kabéh taya nu luput tina panasna.
7 Hukum Yéhuwa téh sampurna, mulihkeun kakuatan.
Pépéling ti Yéhuwa téh bisa dipercaya, méré kabijaksanaan ka nu teu boga pangalaman.
8 Pituduh ti Yéhuwa téh bener, matak bungah kana haté.
Paréntah ti Yéhuwa téh bersih, matak caang kana panon.
9 Rasa hormat ka Yéhuwa téh murni, bakal lumangsung salalawasna.
Putusan Yéhuwa téh bener, kabéhanana adil.
10 Éta kabéh leuwih luhur nilaina tibatan emas,Tibatan emas murni nu loba,Sarta leuwih amis tibatan madu, madu nu nyakclakan tina sayangna.
11 Hamba Gusti diélingan ku éta kabéh.
Lamun dituturkeun, gedé ganjaranana.
12 Saha anu sadar kana kasalahanana sorangan?
Hampura abdi tina dosa-dosa abdi nu teu dihaja.
13 Bantu hamba Gusti ieu supaya henteu lancang.
Abdi ulah nepi ka dikawasaan ku lampah kitu,Ku kituna hirup abdi taya cacadnaSarta bébas tina dosa gedé.*
14 Mugia ucapan tina biwir abdi sarta nu dilenyepan dina haté abdiDipikaresep ku Gusti, nun Yéhuwa, Gunung Batu sarta Panebus abdi.
Catetan Tambihan
^ Atawa bisa jadi ”tali paranti ngukurna”.
^ Atawa ”tanah nu subur”.
^ Atawa ”loba kasalahan”.
