Budalan 27:1-21
27 ”Jieun mézbah tina kai akasia, bangunna kudu pasagi. Panjangna kira-kira 2 méter, lébarna kira-kira 2 méter, jeung jangkungna kira-kira saméter.*
2 Jieun tanduk dina opat juru mézbah. Tanduk-tandukna kudu ngahiji jeung mézbah. Mézbahna kudu dilapisan ku tambaga.
3 Jieun émbér paranti miceun lebu.* Tuluy jieun ogé singkup, baskom, garpuh, sarta wadah paranti areng ruhay. Kabéh parabotna kudu dijieun tina tambaga.
4 Jieun panggangan tina tambaga nu dibentuk kawas jaring tuluy teundeun dina mézbah. Jieun ogé opat geulang tina tambaga nu bakal dipasang dina opat juruna.
5 Teundeun pangganganana di handapeun biwir mézbah. Diteundeunna kudu di tengah-tengah, satengah jangkungna mézbah.
6 Jieun tongkat-tongkat tina kai akasia, tuluy lapisan ku tambaga.
7 Mun mézbahna rék digotong, asupkeun tongkat-tongkatna kana geulang-geulang nu aya dina dua sisi mézbah.
8 Mézbahna kudu dijieun tina papan-papan. Bangun mézbahna kudu pasagi. Jieun sakumaha nu geus ditémbongkeun ka manéh di gunung ieu.
9 ”Jieun kaén keur sakuriling buruan tabernakel. Keur sisi buruan tabernakel nu nyanghareup ka kidul, jieun kaén tina benang linén alus nu panjangna 44,5 méter.*
10 Tuluy jieun 20 tihang sarta 20 dadampar nu aya liangan tina tambaga. Kakait-kakaitna jeung sambunganana* kudu dijieun tina pérak.
11 Keur sisi kalér, panjang kaénna gé 44,5 méter.* Jieun 20 tihang sarta 20 dadampar tina tambaga nu aya liangan. Jieun ogé kakait jeung sambunganana* tina pérak.
12 Keur sisi kulon, panjang kaénna kira-kira 22 méter* sarua jeung lébar buruanna. Jieun ogé sapuluh tihang jeung sapuluh dadampar nu aya liangan.
13 Lébar buruan di sisi wétan, nyaéta nu nyanghareup ka panonpoé medal, kira-kira 22 méter.*
14 Lawang tabernakel bakal aya di sisi beulah dieu. Di katuhueun lawangna kudu aya kaén nu panjangna kira-kira 7 méter.* Jieun ogé tilu tihang jeung tilu dadampar nu aya liangan.
15 Di kéncaeun lawangna kudu aya kaén nu panjangna kira-kira 7 méter.* Jieun ogé tilu tihang jeung tilu dadampar nu aya liangan.
16 ”Dina lawang asup buruan, pasang kaén nu panjangna 8,9 méter.* Kaénna kudu ditinun tina benang biru, wol ungu, benang beureum, jeung benang linén alus. Jieun ogé opat tihang sarta opat dadampar nu aya liangan.
17 Sakabéh tihang di sakuriling buruan kudu dibéré panyambung jeung kakait tina pérak, ari dadamparna mah tina tambaga.
18 Panjang buruanna 44,5 méter jeung lébarna kira-kira 22 méter, ari jangkung kaénna kira-kira 2 méter.* Kaénna kudu dijieun tina benang linén alus, ari dadamparna kudu dijieun tina tambaga.
19 Sakabéh parabot nu dipaké keur ngalalayanan di tabernakel, patok keur tabernakel, sarta patok di buruan kudu dijieun tina tambaga.
20 ”Paréntahkeun urang Israél sina maréré minyak zaitun murni keur lampu-lampu, supaya lampu-lampuna bisa terus hurung.
21 Lampu-lampu di kémah tepangan,* nyaéta nu aya di luareun hordéng nu aya di deukeut peti perjangjian, kudu terus hurung. Harun jeung anak-anakna kudu ngajaga lampu éta tetep hurung di hareupeun Yéhuwa ti peuting nepi ka isuk. Ieu aturan nu kudu terus dijalankeun ku urang Israél turun-tumurun.
Catetan Tambihan
^ As. ”panjangna 5 hasta, lébarna 5 hasta, jeung jangkungna 3 hasta”. Tingali Lamp. B14.
^ Atawa ”lebu nu aya gajihna”, nyaéta lebu nu nyampur jeung gajih sato nu dikorbankeun.
^ As. ”100 hasta”. Tingali Lamp. B14.
^ Atawa ”geulangna”.
^ As. ”100 hasta”. Tingali Lamp. B14.
^ Atawa ”geulangna”.
^ As. ”panjang kaénna 50 hasta”. Tingali Lamp. B14.
^ As. ”50 hasta”. Tingali Lamp. B14.
^ As. ”panjangna 15 hasta”. Tingali Lamp. B14.
^ As. ”panjangna 15 hasta”. Tingali Lamp. B14.
^ As. ”20 hasta”. Tingali Lamp. B14.
^ As. ”Panjang buruanna 100 hasta jeung lébarna 50 hasta, ari jangkung kaénna 5 hasta”. Tingali Lamp. B14.
^ Atawa ”tabernakel”.
