Ayub 11:1-20
11 Zofar urang Naama ngajawab,
2 ”Mémangna urang bakal cicing waé ngadéngé kabéh omongan manéh?Mémangna jalma nu loba omong* bakal dianggap bener?
3 Dikira omong kosong manéh téh moal aya nu ngabantah?
Dikira mun manéh terus ngahina moal aya nu negor?
4 Manéh ngomong, ’Nu diajarkeun ku urang téh bener.Urang gé bersih di hareupeun Allah.’
5 Tapi coba lamun Allah ngabéjaanJeung ngomong ka manéh.
6 Anjeunna bakal nerangkeun rasiah-rasiah supaya manéh bijaksana.Sabab lamun hayang bijaksana, manéh kudu loba diajar.
Mun geus kitu, kakara manéh sadar yén sababaraha kasalahan manéh téh geus dipopohokeun ku Allah.
7 Bisa kitu manéh ngarti kana kabijaksanaan AllahAtawa sagala hal ngeunaan* Nu Mahakawasa?
8 Éta leuwih luhur tibatan langit, moal katepi ku manéh.
Éta leuwih jero tibatan Kuburan,* moal kahontal ku akal manéh.
9 Éta leuwih gedé tibatan bumiSarta leuwih lega tibatan laut.
10 Lamun Anjeunna ngaliwat tuluy néwak jeung mawa hiji jalma ka pangadilan,Saha nu bisa ngahalang-halang?
11 Anjeunna terang mun aya jalma nu nipu.
Waktu aya nu ngalampahkeun kajahatan, ku Anjeunna katingali, pan?
12 Tapi jalma bodo mah kakara bisa ngarti téh engké,Lamun kaldé liar ngaborojolkeun manusa.
13 Coba mun ti ayeuna manéh bener mikirnaSarta nadahkeun leungeun pikeun ngadoa ka Anjeunna.
14 Lamun manéh ngalampahkeun nu salah, sok eureun ayeuna.Lampah nu teu bener kudu disingkirkeun ti kémah manéh.
15 Tah mun kitu, kakara manéh bisa tanggah lantaran manéh teu salah.Manéh bakal nangtung ajeg, taya kasieun.
16 Manéh gé bakal poho kana sakabéh masalah manéh.Éta moal kainget-inget deui, lir cai nu geus ngalir jauh.
17 Hirup manéh bakal leuwih caang tibatan caangna beurang,Malahan poék gé bakal caang kawas isuk-isuk.
18 Manéh bakal reugreug lantaran boga harepan.Manéh bakal saré tibra lantaran sakuriling manéh aman.
19 Waktu ngagolér, moal sieun ku naon-naon.Bakal loba nu bageur ka manéh lantaran hayang dipikaresep ku manéh.
20 Tapi panon jalma-jalma jahat bakal lolong.Maranéhna moal bisa kabur ka mana-mana.Nu diarep-arep téh taya deui iwal ti maot.”
Catetan Tambihan
^ Atawa ”gedé omong”.
^ Atawa ”Atawa wates kaagungan”.
^ Atawa ”Syéol”. Tingali Daptar Istilah.
