Bana ba seng ba holile ba na le boikarabelo ba ho hlokomela batsoali ba holileng. Bibele e re bana ba holileng ba lokela ho “sebisa seo ba ithutileng sona bolumeling ba bona ka hore ba hlokomele ba malapa a bona ’me ka ho etsa joalo ba buseletsa batsoali ba bona . . . , hobane ho etsa joalo ho thabisa Molimo.” (1 Timothea 5:​4, New International Version) Ha bana ba holileng ba etsa bonnete ba hore batsoali ba bona ba holileng ba hlokometsoe, ba mamela taelo ea Bibele ea hore ba hlomphe batsoali ba bona.​—Baefese 6:​2, 3.

 Bibele ha e na litaelo tse tobileng tsa hore na batsoali ba holileng ba hlokomeloe joang. Leha ho le joalo, e fana ka mehlala ea banna le basali ba neng ba e-na le tumelo ba neng ba hlokomela batsoali ba bona. E boetse e na le likeletso tse sebetsang tse ka thusang bahlokomeli.

•  Mehleng ea Bibele litho tsa malapa a mang li ne li thusa batsoali ba holileng joang?

•  Ke keletso efe e tsoang ka Bibeleng e ka thusang bana ba hlokomelang batsoali?

•  Na Bibele e re batsoali ba holileng ba hlokomeloe ba le hae?

 Ba entse sena ka litsela tse ngata tse fapaneng ba itšetlehile ka maemo a bona.

•   Josefa o ne a lula hole le ntate oa hae ea holileng Jakobo. Ha maemo a hae a mo lumella o ile a lokisetsa hore ntate oa hae a tl’o lula haufi le eena. Josefa o ile a mo hlokomela ka bolulo, lijo le ho mo sireletsa.​—Genese 45:​9-11; 47:​11, 12.

•   Ruthe o ile a fallela naheng ea ’mè matsale oa hae ’me a sebetsa ka thata hore a mo hlokomele.​—Ruthe 1:​16; 2:​2, 17, 18, 23.

•   Jesu, nakoana pele a hlokahala o ile a khetha motho ea tla sala a hlokomela ’mè oa hae Maria eo ho bonahalang eka e ne e se e le mohlolohali.​—Johanne 19:​26, 27. a

 Bibele e na le melao-motheo e ka thusang bahlokomeli hore ba hlole mathata a ka hlahang ’meleng le maikutlong ha ba hlokomela batsoali ba holileng.

•   Hlompha batsoali ba hao.

   Bibele e re: “Hlompha ntat’ao le ’m ’ao.”​—Exoda 20:12.

   Molao-motheo oo o sebetsa joang? Hlompha batsoali ba hao ka ho ba lumella hore ba iketsetse liqeto tsa hore na ba batla ho phela joang. Ho fihlella moo ho khonehang, ba lumelle hore ba iketsetse qeto ea hore na ba batla ho hlokomeloa joang. Ka nako e tšoanang ba bontše tlhompho ka hore u etse sohle se matleng a hao ho ba hlokomela.

•   Utloisisa ’me u tšoarele.

   Bibele e re: “Ka sebele temohisiso ea motho e liehisa bohale ba hae, ’me ho hlokomoloha tlolo ke botle ho eena.”​—Liproverbia 19:11.

   Molao-motheo oo o sebetsa joang? Haeba motsoali ea holileng a bua ntho e bohloko kapa a bontša a sa ananele thuso ea hao, ipotse, ‘Ke ne ke tla ikutloa joang ha ke ne ke le boemong bo tšoanang ’me ke sitsoa ho iketsetsa lintho tse itseng?’ Haeba u leka ho utloisisa ebile u tšoarela, u ka ’na oa qoba ho mpefatsa maemo le ho feta.

•   Kopa thuso ho ba bang.

   Bibele e re: “Merero ea senyeha moo ho se nang lekunutu, empa ha baeletsi ba le bangata ho na le se finyelloang.”​—Liproverbia 15:22.

   Molao-motheo oo o sebetsa joang? Etsa lipatlisiso ka hore na o ka thusa batsoali ba hao joang haeba ba e-na le bokuli bo itseng. Batla hore na ke lithuso life tse fumanehang sebakeng sa heno tse ka u thusang ho ba hlokomela. Bua le batho ba bang ba kileng ba hlokomela batsoali ba holileng. Haeba u e-na le bana beno, u ka etsa kopano ea lelapa ’me la bua ka hore na le ka hlokomela litlhoko tsa batsoali ba lona joang le hore na le ka arolelana mosebetsi oa ho ba hlokomela joang.

•   Ikokobetse.

   Bibele e re: “Bohlale bo ho ba inyenyefatsang.”​—Liproverbia 11:2.

   Molao-motheo oo o sebetsa joang? Tseba hore na u haelloa hokae. Mohlala, motho e mong le e mong o na le nako le matla a fokolang. Mefokolo ena e ka ama tsela eo u khonang ho thusa batsoali ba hao ha eona. Haeba u iphumana u imetsoe ke mosebetsi oa ho hlokomela batsoali ba holileng, u ka ’na oa kopa thuso ho litho tse ling tsa lelapa kapa litsebi.

•   Itlhokomele.

   Bibele e re: “Ha ho motho ea kileng a hloea nama ea hae, empa oa e fepa le ho e baballa.”​—Baefese 5:29.

   Molao-motheo oo o sebetsa joang? Le hoja u e-na le boikarabelo ba ho hlokomela batsoali ba hao, u lokela hore le uena u itlhokomele hape u hlokomele le lelapa la hao haeba u le lenyalong. E ja hantle. U lokela ho phomola le ho robala nako e lekaneng. (Moeklesia 4:6) U lokela ho behella nako ea ho phomola ka thoko haeba ho khoneha. Haeba u etsa lintho tsena u tla imoloha maikutlong, kelellong le ’meleng ’me u tla khona ho hlokomela batsoali ba hao hantle.

 Bibele ha e na litaelo tse tobileng tsa hore na bana ba holileng ba lokela ho hlokomela batsoali ba le hae kapa che. Malapa a mang a khetha ho hlokomella batsoali hae nako e telele kamoo ho ka khonehang. Maemong a mang ba ka bona ho le betere hore batsoali ba hlokomeloe ba le mahaeng a maqheku. Lelapa le ka kopana ’me la etsa qeto e tla ba molemo ho e mong le e mong ea amehang.​—Bagalata 6:​4, 5.