Ke ha tlhaho ho ipotsa hore na ke hobane’ng ha batho ba e-shoa, haholo-holo ha re lahleheloa ke motho eo re leng haufi le eena. Bibele e re: “Motsu o hlahisang lefu ke sebe.”​—1 Bakorinthe 15:56.

Ke Hobane’ng ha Batho ba Etsa Sebe ’me ba E-shoa?

 Batho ba pele, e leng Adama le Eva, ba ile ba shoa hobane ba ile ba siteloa Molimo. (Genese 3:17-19) Lefu e ne e le lona feela phello ea borabele ba bona khahlanong le Molimo, hobane “mohloli oa bophelo” o ho eena.​—Pesaleme ea 36:9; Genese 2:17.

  Adama o ile a fetisetsa sebe ho bana bohle ba hae. Bibele e re: “Sebe se ile sa kena lefatšeng ka motho a le mong le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.” (Baroma 5:12) Batho bohle baa shoa hobane kaofela ba etsa sebe.​—Baroma 3:23.

Kamoo lefu le tla felisoa kateng

 Molimo o tšepisa hore ho tla ba le nako eo ka eona a “tla metsa lefu ka ho sa feleng.” (Esaia 25:8) E le hore a felise lefu, o lokela ho felisa le sesosa sa lona, e leng sebe. Molimo o tla etsa sena ka Jesu Kreste, ea “tlosang sebe sa lefatše.”​—Johanne 1:29; 1 Johanne 1:7.