SELTERS, Jeremane—Mathilde Hartl, e leng e mong oa Lipaki Tsa Jehova, o ile a fuoa Khau ka la 22 February, 2013, ke Tona-khōlō ea Bavaria, Horst Seehofer. Khau ena ke e ’ngoe ea likhau tsa bohlokoa ka ho fetisisa tseo Rephabliki e Kopaneng ea Jeremane e li fang batho ba fanang ka litšebeletso tse itseng sechabeng.

Mofumahatsana Hartl, ea lulang Bavaria, o ile a tlotloa ka lebaka la ho hlokomela mora oa ha ea holofetseng, e leng Martin eo hona joale a leng lilemo li 26. Ha e sa le ngoana, lingaka li ile tsa re o na le boloetse ba Duchenne muscular dystrophy [DMD]), e leng boloetse bo sa phekoleheng bo senyang mesifa. Ka lebaka leo, Mofumahatsana Hartl o tsoha hangata bosiu e le hore a hlokomele mor’a hae, e leng se akarelletsang ho hlahloba hore na o ntse a hema hantle le ho tlosa likhohlela tselaneng ea hae ea moea e le hore a se ke a tšoaetsoa maloetse kapa a tšoaroa ke nyumonia. Mora e mong oa hae ea bitsoang Max, le eena o ne a tšoeroe ke lefu le tšoanang ebile a sa itekanela kelellong. Mofumahatsana Hartl o ile a hlokomela ka lerato Martin le Max ka lilemo tse ngata. Ka masoabi Max o ile a hlokahala ka 2008, a le lilemo li 19.

Ha a botsoa hore na o ile a fumana matla a ho hlokomela bana ba hae hantle hakana hokae, Mofumahatsana Hartl o ile a re: “Ke thusoa ke bolumeli ba ka. Kaha ke e mong oa Lipaki Tsa Jehova ke nka bophelo e le ba bohlokoa haholo. Hafeela ke sa phela, ke batla ho thusa mora oa ka hore a tsoele pele a thabile ho sa tsotellehe bokooa ba hae.”

Tona-khōlō Seehofer o ile a rorisa Mofumahatsana Hartl le batho ba bang ba ileng ba fumana khau eo, a re: “E mong le e mong oa lōna o entse hore lefatše e be sebaka se molemo.”

Raliphatlalatso:

Raliphatlalatso oa Machaba: J. R. Brown, Ofisi ea Boitsebiso, tel. +1 718 560 5000

Jeremane: Wolfram Slupina, tel. +49 6483 41 3110