Selemong se latelang, ke ile ka qala ho bapala lifiliming ’me ka makhetlo a ’maloa ke le sebapali se ka sehloohong. Baqolotsi ba litaba ba ne ba batla ho utloa pale ea ka, batho ba nkang litšoantšo ba batla lifoto tsa ka, ba bang ba batla hore ke be teng ha ho e-na le litona-khōlō, ha ho khakoloa libaka tse itseng, ke memeloa lijong tsa motšehare esita le tsa mantsiboea. Motho e mong le e mong a batla ho ntseba.

Leha ho le joalo, butle-butle ke ile ka elelloa hore bophelo bona ha bo monate joalokaha ke ne ke nahanne. Ke ne ke lula ke bapala lifiliming tse mabifi ’me seo se beha bophelo ba ka kotsing. E ne e se hangata libapali tsa lifilimi tsa Hong Kong li sebelisang batho ba bang ba ka bapalang likarolo tse kotsi joaloka tsa Hollywood, kahoo ke ne ke hlile ke bapala likarolo tse kotsi, tse kang tsa ho khanna sethuthuthu holim’a koloi. Hangata ke ne ke e-ba sebapali se ka sehloohong lifiliming tse tletseng boitšoaro bo bobe le tse mabifi. Tse ling e ne e le tsa bodemona.

Ka 1995, ke ile ka nyaloa ke mohlahisi oa lifilimi. Le hoja ho ne ho bonahala eka ke na le ntho e ’ngoe le e ’ngoe e ka etsang hore motho a thabe, e leng botumo, leruo le monna ea nthatang, ke ne ke tepeletse maikutlong ebile ke sa thaba. Ke ile ka etsa qeto ea ho khaotsa ho ba sebapali lifiliming.

Ke ile ka qala ho hloloheloa nako ea bongoaneng ha ke sa ntse ke e-na le tumelo. Ka nako eo, Moqebelo o mong le o mong ’na le ausi oa ka re ne re etela lelapa la Lipaki Tsa Jehova. Ntate oa teng, e leng Joe McGrath, o ne a re ruta Bibele hammoho le barali ba hae ba bararo. Ho ne ho rena lerato le mofuthu lelapeng la bona ’me Ntate Joe o ne a tšoara mosali oa hae le bana ka tlhompho. Ke ne ke boetse ke thabela ho ea le bona libokeng tsa Bokreste. Ka linako tse ling re ne re e-ea likopanong tse khōlō. Ruri tseo e ne e le linako tse monate. Ke ne ke ikutloa ke sireletsehile ha ke e-na le Lipaki.

 Leha ho le joalo, ke ne ke etsahalloa ke lintho tse bohloko ka lapeng leso. Tsela eo Ntate a neng a phela ka eona, e ne e sulafalletsa ’Mè bophelo ’me o ile a tetebela maikutlo. Ha ke le lilemo tse ka bang leshome, ’Mè o ile a khaotsa ho ea libokeng tsa Lipaki Tsa Jehova. ’Na ke ile ka tsoela-pele ka monyebe ’me ka kolobetsoa ha ke le lilemo li 17. Empa kapele ka mor’a moo, ka itšoara ka tsela eo e seng ea Bokreste ’me ka khaotsa ho ikamahanya le Lipaki Tsa Jehova.

Nakoana ka mor’a hore ke nyaloe, baholo ba babeli ba phuthehong ea moo ke lulang teng ba ile ba nketela. Ba ile ba ntlhalosetsa hore na ke mehato efe eo ke lokelang ho e nka e le hore ke khutlisetsoe ka phuthehong ba ba ba hlophisa hore moromuoa ea bitsoang Cindy a nthuse. Ka nako eo, ke ne ke fokola haholo tumelong, kahoo ka mo kōpa hore a mpontše bopaki ba hore Bibele ehlile ke Lentsoe la Molimo. O ile a mpontša mehlala ea boprofeta bo bongata ba Bibele bo seng bo phethahetse. Ka mor’a nako e itseng re ile ra ba metsoalle ea hlooho ea khomo ’me a nkōpa hore re ithute lithuto tsa motheo tsa Bibele. Ke ile ka lumela. Ke ne ke qala ho elelloa hore Jehova Molimo o lerato ’me o batla hore ke thabe.

Ha ke ntse ke ea libokeng tsa Bokreste, ke ile ka hlokomela hore ke thabela ho ba le Lipaki ho feta ho ba le libapali tsa lifilimi. Empa lintho tse ileng tsa nketsahalla ha ke sa le ngoana, li ile tsa etsa hore ke se hlole ke tšepa batho ba bang ’me ke ikhalale. Setho se seng sa phutheho se ile sa mpontša ka Bibeleng hore na nka sebetsana joang le maikutlo ao a nyahamisang ’me ke ile ka boela ka ithuta ho etsa metsoalle ea ’nete.

Ka 1997, ’na le monna oa ka re ile ra fallela Hollywood, California, U.S.A. Ha ke le moo, ke ile ka leka ka matla ho thusa batho hore ba fumane bohlale bo tsoang Lentsoeng la Molimo. Ho ruta batho Bibele ho ’nile ha nthabisa ho feta ho tuma ka lebaka la ho ba sebapali se ka sehloohong sa lifilimi. Ka mohlala, ka 2002, ke ile ka kopana le Cheri, eo e neng e le motsoalle oa ka ha ke sa le Hong Kong. Re fetile maemong a tšoanang bophelong. E ile ea e-ba ’Mabotle oa Hong Kong selemo pele ho ’na. Ha e le hantle, ke eena ea ileng a nthoesa moqhaka. Le eena e ile ea e-ba sebapali lifiliming, hamorao ea e-ba mohlahisi oa lifilimi a sebetsa le batsamaisi ba tummeng, o ile a ba a fallela Hollywood joaloka ’na.

Ke ile ka utloela Cheri bohloko ha ke utloa hore mohlankana eo a neng a tšepisane lenyalo le eena o bolailoe ke lefu la pelo. Ha aa ka a fumana matšeliso bolumeling ba hae ba Bobuddha. Le eena o ile a phela bophelo bo mabothobotho boo batho ba bang ba bo khallang, empa o ne a sa thaba ebile a sa tšepe batho. Ke ile ka qala ho qoqa le eena ka seo ke ithutileng sona Bibeleng, empa ho ile ha e-ba thata hore a se amohele kaha e ne e le Mobuddha.

Ka letsatsi le leng ka 2003, Cheri o ile a ntetsetsa a le Vancouver, Canada, moo a neng a etsa filimi teng. O ile a re ha a ntse a khanna ’me a bona botle ba naha, o ile a iphumana a se a rapela a re: “Molimo, mpolelle hore na u mang? Lebitso la hao ke mang?” Ka nako eo o ne a feta Holong ea ’Muso ’me a bona lebitso la Jehova. O ile a nahana hore eo ke karabo ea thapelo ea hae ’me a ikutloa a batla ho kopana le Lipaki Tsa Jehova kapele kamoo  ho ka khonehang. Ke ile ka etsa litokisetso tsa hore Cheri a ee libokeng tsa phutheho ea Sechaena e Vancouver ’me a ea ka mor’a matsatsi a ’maloa.

Hamorao Cheri o ile a re ho ’na, “Batho bana ba ntsotella e le kannete. Ke khona ho ba phetlela sefuba.” Ke ile ka thaba haholo ha ke utloa seo hobane ha Cheri e sa le sebapali lifiliming, o ne a se na metsoalle. O ile a tsoela pele ho ea libokeng. Empa ka 2005, a saena konteraka ea ho ea hlahisa lifilimi tse peli tsa liketsahalo tsa mehleng ea boholo-holo Chaena, ’me a tlameha ho khutlela Hong Kong. Ho thabisang ke hore ka 2006, Cheri o ile a inehela ho Jehova ’me a kolobetsoa kopanong ea Lipaki Hong Kong. Le hoja a ne a batla ho qeta nako e eketsehileng a sebeletsa Jehova, mosebetsi oa hae o ne o mo sitisa ho etsa joalo ’me sena se mo hlokisa thabo.

Ka 2009, bophelo ba Cheri bo ile ba fetoha haholo. O ile a etsa qeto ea ho khaotsa ho bapala lifiliming e le hore a sebeletse Jehova ka ho eketsehileng. O ile a ba le metsoalle e mengata ka phuthehong ea Bokreste. A qeta nako e ngata a ruta batho Bibele ’me a thabela ho ba thusa hore ba ntlafatse bophelo ba bona.—Matheu 24:14.

Ka mor’a moo, Cheri o ile a etsa qeto ea ho ithuta puo ea Nepal e le hore a tšehetse sehlotšoana se neng se ntse se hōla sa Lipaki tse buang puo eo Hong Kong. Batho ba bangata ba Nepal ba lulang Hong Kong, ha ba nkeloe hloohong ebile ba khelloa fatše hobane ha ba tsebe Senyesemane kapa Sechaena hantle hape meetlo ea bona e fapane le ea batho ba moo. Cheri o ile a mpolella hore o thabela ho thusa batho bao ho ithuta Bibele. Ka mohlala, ka le leng ha a ntse a kena ka ntlo le ntlo, o ile a kopana le mosali e mong oa Nepal ea neng a tseba ho itseng ka Jesu empa a sa tsebe letho ka Jehova Molimo. Cheri o ile a bontša mosali eo ka Bibeleng hore Jesu o ne a rapela Ntate oa hae ea leholimong. Ha mosali eo a elelloa hore a ka rapela Molimo oa ’nete eo lebitso la hae e leng Jehova, o ile a amohela molaetsa oa Bibele. Kapele ka mor’a moo, monna oa hae le morali le bona ba ile ba qala ho ithuta Bibele.—Pesaleme ea 83:18; Luka 22:41, 42.

Ha ke hlokomela kamoo Cheri a nkang nako e ngata a ruta batho Bibele, ke ile ka re ka pelong, ‘Ke’ng e nthibelang ho etsa se tšoanang?’ Ka nako eo, le ’na ke ne ke khutletse Hong Kong. Ke ile ka etsa qeto ea ho itokisetsa ho qeta nako e ngata ke ruta batho ’nete ea Bibele. Ke hlokometse hore ha ke mamela batho le ho ba thusa ho utloisisa Lentsoe la Molimo, ke thaba e le kannete.

Ka mohlala, ke ile boela ka ithuta Bibele le mosali oa Movietnamo ea neng a lula a hloname a bile a lula a lla. Hona joale o thabela bophelo le botsoalle ka phuthehong.

’Na le Cheri re fumane se molemo ho feta botumo. Le hoja ho bapala lifiliming ho ne ho re thabisa ebile ho etsa hore re tume, ho ruta batho ka Jehova Molimo ho re khotsofatsa le ho feta hobane hoa mo tlotlisa. Ka sebele re latsoitse seo Jesu a ileng a se bua ha a ne a re: “Ho fana ho tlisa thabo e khōlō ho feta ho amohela.”—Liketso 20:35.