Lefu la Jesu ke la bohlokoa hobane le buletse batho tšepo ea bophelo bo sa feleng. Batho ha baa ka ba bōptjoa ba e-na le takatso ea ho etsa lintho tse mpe, hore ba kule kapa ba shoe. (Genese 1:31) Leha ho le joalo, sebe se ile sa kena lefatšeng ka motho oa pele e leng Adama. Jesu o ile a shoa e le hore a re lopolle sebeng le lefung.—Bala Matheu 20:28; Baroma 6:23.

Molimo o re bontšitse lerato le ikhethang ka hore a romele Mora oa hae lefatšeng hore a re shoele. (1 Johanne 4:9, 10) Jesu o ile a laela balateli ba hae hore ba ikhopotse lefu la hae ka ho etsa tšebeletso e itekanetseng ba sebelisa bohobe le veine. Ha re ikhopotsa lefu la hae selemo le selemo re bontša hore re ananela lerato leo Molimo le Jesu ba re bontšitseng lona.—Bala Luka 22:19, 20.

Ha Jesu a ne a bolella barutuoa ba hae ka lekhetlo la pele hore ba ikhopotse lefu la hae, o ile a bua ka selekane kapa tumellano. (Matheu 26:26-28) Se ile sa etsa hore bona le ba bang ba seng bakae ba be le tšepo ea ho ba marena le baprista hammoho le eena leholimong. Le hoja batho ba limilione ba ikhopotsa lefu la Jesu, ke batho ba keneng selekaneng seo feela ba jang bohobe le veine.—Bala Tšenolo 5:10.

E se e le lilemo tse ka bang 2 000 Jehova a ntse a khetha bao e tla ba marena leholimong. (Luka 12:32) Palo ea bona e nyenyane ha e bapisoa le ea ba tla phela ka ho sa feleng lefatšeng.—Bala Tšenolo 7:4, 9, 17.