Joaloka Alex, kajeno batho ba bangata ha ba rate ho sebetsa ka thata. Mak’henike e mong ea bitsoang Aaron, o re: “Batho ba bangata ha ba rate ho etsa mosebetsi oa matsoho ebile ba o khella fatše. Ba re ba etsa mosebetsi oo ho fihlela ba fumana o mong o betere.”

Ke hobane’ng ha batho ba bangata ba sa rate ho sebetsa ka thata? Mohlomong ba susumetsoa ke seo mecha ea phatlalatso e bontšang hore ke bophelo bo “monate.” Matthew, eo e leng setsebi sa mosebetsi oa matsoho, o re: “Batho ba u khella fatše ha u iphelisa ka mosebetsi oa matsoho.” Shane, eo mosebetsi oa hae e leng ho hloekisa, o lumellana le seo. O re: “Matsatsing ana batho ba tsoafa ho sebetsa.”

Ka lehlakoreng le leng, batho ba atlehang bophelong ke ba sebetsang ka thata. Daniel, ea lilemo li 25 ea sebetsang likonterakeng, o re: “Ke nahana hore ho sebetsa ka thata ho etsa hore motho a khotsofale, haholo-holo ha a e-na le sepheo se setle.” Andre ea lilemo li 23 o lumellana le seo ’me o re: “Ke lumela hore ha motho a sebetsa ka thata, oa thaba. Batho ba sa sebetseng ha ba thabe, ebile ba jeoa ke bolutu!”

Batho ba kang Daniel le Andre ba khonne joang ho ba le boikutlo bo botle ka mosebetsi? Ba ile ba sebelisa melao ea Bibele. Bibele e khothalletsa batho ho ba mahlahahlaha le ho ba le mamello, ho e-na le ho ba botsoa. Ha e re bolelle feela hore re sebetse, empa e boetse e re bontša kamoo re ka thabelang mosebetsi kateng.

Ke melao efe ea Bibele e ka u thusang hore u thabele mosebetsi? Re kōpa hore u hlahlobe e ’maloa sehloohong se latelang.