Ke hlahetse motseng o toropong oa Rome ka ba ka hōlela teng, sebakeng sa batho ba futsanehileng. Bophelo bo ne bo le boima. Ke ne ke sa tsebe ’mè oa ka hantle ’me ke ne ke sa utloane le ntate oa ka. Ke hōtse ke ithuta litsela tsa ho phela sebakeng seo ho leng boima ho phela ho sona.

Ha ke ne ke le lilemo li leshome, ke ne ke se ke qalile ho utsoa. Ha ke le lilemo li 12, ke ile ka baleha lapeng ka lekhetlo la pele. Ka makhetlo a ’maloa, ntate o ile a tlameha ho ea ntokolla ntlo-khōlō ea sepolesa ’me a nkise lapeng. Ke ne ke tloaetse ho pheha khang le batho—ke ne ke le mabifi ’me ke halefetse lefatše lohle. Ha ke ne ke le lilemo li 14, ke ile ka tloha lapeng ka lekhetlo la ho qetela. Ke ile ka qala ho sebelisa lithethefatsi le ho phela seterateng. Kaha ke ne ke se na moo ke robalang, ke ne ke choatla likoloi tsa batho ebe ke robala ka har’a tsona ho fihlela mesong ea letsatsi le latelang. Hoseng ke ne ke batlana le pompo ea metsi moo nka hlapelang teng.

Ke ile ka ipabola ka ho utsoa—ke ne ke utsoa ntho e ’ngoe le e ’ngoe ho tloha ka ho phamola mekotla ho ea ho ho qheketseng lifoleteng le matlong a barui bosiu. Ke ile ka qala ho ba le botumo bo bobe ’me e se khale ka mengoa hore ke be setho sa kenke e kotsi, e ileng ea mpha “monyetla” oa hore ke utsoe le libankeng. Kaha ke ne ke le mabifi, ka potlako ke ile ka hlomphuoa haholo ke litho tse ling tsa kenke. Ke ne ke lula ke tsamaea ke nkile sethunya sa ka; ha e le hantle, ke ne ke robala ke se kentse tlas’a mosamo. Bophelo ba ka bo ne bo tletse lintoa, lithethefatsi, ho utsoa, litlhapa le boitšoaro bo bobe. Mapolesa a ne a lula a mpehile merebele. Ke ile ka koalloa teronkong ka makhetlo a mangata ’me ke qetile lilemo tse ngata ke ntse ke tsoa ke kena ho eona.

Ka letsatsi le leng ha ke ne ke tsoa teronkong, ke ile ka etsa qeto ea hore ke chakele ’mangoane oa ka e mong. Ke ne ke sa tsebe hore ’mangoane le bana ba hae ba babeli e se e le ba bang ba Lipaki Tsa Jehova. Ba ile ba ’memela ho ea libokeng tsa Lipaki. Ke ile  ka tsamaea le bona, kaha ke ne ke thahasella ho bona. Ha re fihla Holong ea ’Muso, ke ile ka ba phehella hore ke lule pel’a monyako e le hore ke behe leihlo batho ba ntseng ba kena le ba tsoang. Ke ne ke ntse ke nkile sethunya.

Seboka seo se ile sa fetola bophelo ba ka. Ke hopola ke nahana hore ke tlameha ke le lefatšeng le leng! Ke ne ke lumelisoa ke batho ba mofuthu, ba botsoalle le ba bososelang. Ke ntse ke e-na le setšoantšo se hlakileng ka kelellong sa mosa le botšepehi boo Lipaki li neng li bo bonahatsa ka mahlong a tsona. Ka sebele sena e ne e le sebaka se fapaneng hōle le seo ke se tloaetseng!

Ke ile ka qala ho ithuta Bibele le Lipaki. Ha ke ntse ke ithuta, ke ile ka ’na ka hlakeloa hore ke tlameha ho fetola tsela eo ke phelang ka eona ka ho feletseng. Ke ile ka nka ka botebo mantsoe a tlalehiloeng ho Liproverbia 13:20: “Ea tsamaeang le batho ba bohlale o tla hlalefa, empa ea bang le litšebelisano le ba hlokang kelello lintho li tla mo tsamaela hampe.” Ke ile ka hlokomela hore ho hlokahala hore ke arohane le kenke. Ho ne ho se bonolo ho etsa joalo, empa ka thuso ea Jehova, ke ile ka atleha.

Ke ile ka boela ka hloekisa ’mele oa ka. Ka boitelo bo boholo, ke ile ka khaotsa ho tsuba sakerete le ho sebelisa lithethefatsi. Ke ile ka kuta moriri oa ka o molelele, ka rola masale ’me ka khaotsa ho bua litlhapa. Ka lekhetlo la pele bophelong ba ka, ke ile ka qala ho laola lintho tseo ke li etsang.

Ke ne ke sa thabele ho bala le ho ithuta, kahoo ho ne ho hlile ho le thata ho tsepamisa kelello thutong ea Bibele le ho sebelisa seo ke ithutileng sona. Leha ho le joalo, ha ke ntse ke etsa boiteko, butle-butle ke ile ka qala ho rata Jehova ’me ho na le ntho e ’ngoe e ileng ea qala ho fetoha ka hare ho ’na—letsoalo la ka le ile la qala ho ntšetšetha. Hangata ke ne ke ikhella fatše, ke sa kholoe hore Jehova o tla ke a ntšoarele ka lintho tsohle tse mpe tseo ke li entseng. Ha ho le joalo ke ne ke khothatsoa haholo ke ho bala kamoo Jehova a ileng a tšoarela Morena Davida ka mor’a hore a etse libe tse tebileng.—2 Samuele 11:1–12:13.

Bothata bo bong e ne le ba ho arolelana le ba bang tumelo ea ka mosebetsing oa ho bolela ka ntlo le ntlo. (Matheu 28:19, 20) Ke ne ke tšoha hore ke tla kopana le motho eo nkileng ka mo utloisa bohloko ka tsela e itseng nakong e fetileng! Empa butle-butle ke ile ka khona ho hlōla tšabo eo. Ke ile ka qala ho fumana khotsofalo ea sebele ka ho thusa batho ba bang hore ba ithute ka Ntate oa rōna ea babatsehang, ea tšoarelang ka ho feletseng.

Ho ithuta ka Jehova ho pholositse bophelo ba ka! Boholo ba metsoalle ea ka ea pele e shoele kapa e teronkong, empa ke phela bophelo bo khotsofatsang ka ho fetisisa ’me ke letetse bokamoso ka tjantjello. Ke ithutile ho ba bonolo le ho mamela le ho laola bohale ba ka. Ka lebaka leo, ke thabela ho ba le kamano e ntle le batho ba bang. ’Na le mohats’aka Carmen e motle re na le lelapa le thabileng,. Ka bobeli, re thabela ho thusa batho ba bang hore ba ithute Bibele.

Qetellong, hona joale ke na le mosebetsi o hantle—ka linako tse ling o amana le li banka, empa ho e-na le ho li utsoetsa kea li hloekisa.