Temana ena e tsejoa haholo ebile e qotsoa hangata ho feta temana leha e le efe e ’ngoe ka Bibeleng. Ho ’nile ha boleloa hore ha ho na temana “e hlalosang kamano ea Molimo le batho ka tsela e hlakileng joalo le hore na batho ba ka pholoha joang.” Ke kahoo linaheng tse ling mantsoe a temana ena kapa “Johanne 3:16,” a bonoang hangata a ngotsoe moo ho nang le mekete ea sechaba, listikareng tsa likoloi, maboteng a metse le libakeng tse ling.

Ho bonahala batho bao ba ratang mantsoe ao ba lumela hore ka lebaka la hore Molimo o oa ba rata, seo se ba tiisetsa hore ba tla pholoha ka ho sa feleng. Uena u re’ng? U ikutloa joang ka hore Molimo o oa u rata? U nahana hore Molimo o entse’ng ho bontša hore o oa u rata?

Batho ba bangata baa lumela hore Molimo ke eena ea bōpileng bokahohle, tlhaho le batho. Lintho tse phelang li bōpiloe ka tsela e rarahaneng le ka bokhabane hoo ho se nang pelaelo ea hore ho na le motho ea bohlale haholo ea li entseng. Batho ba bangata ba leboha Molimo letsatsi le letsatsi ka bophelo boo a ba fileng bona. Ba boetse baa hlokomela hore e le hore ba phele le ho thabela bophelo, ba itšetlehile ka Molimo hore a ba fe lintho tseo ba li hlokang—tse kang moea, metsi, lijo le hore lintho tsa tlhaho li sebelisane.

Re lokela ho leboha Molimo ka lintho tsena tsohle hobane ka sebele ke Moetsi oa rōna le Motšehetsi oa bophelo. (Pesaleme ea 104:10-28; 145:15, 16; Liketso 4:24) Re ka utloisisa hore Molimo o oa re rata ha re nahana ka lintho tsohle tseo a  re etsetsang tsona. Moapostola Pauluse o ile a re: “[Molimo] o fa batho bohle bophelo le phefumoloho le lintho tsohle. Etsoe ka eena re na le bophelo ’me rea sisinyeha ’me re teng.”—Liketso 17:25, 28.

Molimo ha a re bontše lerato ka ho re fa lintho tseo re li hlokang nameng feela. O boetse o re entse ka tsela ea hore re phahamele liphoofolo kaha o re file bohlale ba hore re ithute ka eena e le hore re khone ho mo sebeletsa. (Matheu 5:3) Ka tsela ena, batho ba mamelang ba ka lebella ho ba karolo ea lelapa la Molimo, “bana” ba hae.—Baroma 8:19-21.

Joalokaha Johanne 3:16 e bontša, Molimo o re ratile ka hore a romele Mora oa hae, Jesu, lefatšeng e le hore a re rute ka Molimo le Ntate oa hae le hore a re shoele. Leha ho le joalo, batho ba bangata baa lumela hore ha ba utloisise hore na ke hobane’ng ha ho ne ho hlokahala hore Jesu a shoele batho le hore lefu la Jesu le bontša joang hore Molimo o oa re rata. A re ke re hlahlobe hore Bibele e hlalosa joang hore na ke hobane’ng ha Jesu a ile a shoa le hore na ke hobane’ng ha lefu la hae e le la bohlokoa.

Batho bohle baa shoa, ba oetsoe ke koluoa ea maloetse, botsofali le lefu. Empa qalong Jehova Molimo o ne a sa rera hore ho be joalo. O ne a file batho ba pele tebello ea ho phela ka ho sa feleng paradeiseng lefatšeng. Empa seo se ne se tla etsahala hafeela ba ne ba ka mamela Molimo. Haeba ba ne ba ke ke ba mamela, Molimo o ile a re ba ne ba tla shoa. (Genese 2:17) ’Nete ke hore motho oa pele o ile a hlanohela bobusi ba Molimo ’me a tlisetsa eena le batho bohle lefu. Moapostola Pauluse o re: “Sebe se ile sa kena lefatšeng ka motho a le mong le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.”—Baroma 5:12.

Leha ho le joalo, Molimo “o rata toka.” (Pesaleme ea 37:28) Le hoja a sa ka a iphapanyetsa taba ea hore motho oa pele o ne a tlōtse molao ka boomo, Molimo ha aa ka a ahlolela batho hore ba utloe bohloko le ho shoa ka ho sa feleng ka lebaka la hore motho a le mong ha aa ka a mamela. Ho e-na le hoo, ka ho sebelisa molao-motheo oa “moea bakeng sa moea,” Molimo o ile a bontša toka ’me a boela a fa batho ba mamelang monyetla oa hore ba phele ka ho sa feleng. (Exoda 21:23) Potso ke hore na, Ke joang batho ba ka fumanang bophelo bo phethahetseng boo Adama a ileng a bo lahla? Karabo: Ho ne ho hlokahala motho ea ka inehelang e le sehlabelo, eo bophelo ba hae bo lekanang le ba Adama—e leng bophelo ba motho ea phethahetseng.

Ho hlakile hore ho ne ho se le ea mong oa bana ba sa phethahalang ba Adama ea neng a ka fana ka bophelo ba hae ho re lopolla, empa Jesu o ne a ka khona. (Pesaleme ea 49:6-9) Kaha Jesu o ne a tsoetsoe a sa futsa sebe, o ne a phethahetse, feela joaloka Adama. Kahoo, ka ho nyehela bophelo ba hae, Jesu o ile a rekolla batho bokhobeng ba sebe. Ka ho etsa joalo, o ile a fa bana ba banyalani ba pele monyetla oa ho phela bophelo bo phethahetseng bo tšoanang le boo Adama le Eva ba kileng ba bo phela.  (Baroma 3:23, 24; 6:23) Na ho na le seo re lokelang ho se etsa hore re rue molemo ketsong e mosa hakaale ea lerato?

Ha re bala Johanne 3:16 hape, re fumana mantsoe a reng “e mong le e mong ea lumelang ho [Jesu], a se ke a timela, a mpe a be le bophelo bo sa feleng.” Sena se bolela hore ho na le seo re lokelang ho se etsa e le hore re fumane mpho ea bophelo bo sa feleng. E le hore re “be le bophelo bo sa feleng” ho hlokahala hore re lumele ho Jesu ’me re mo mamele.

U ka ’na ua ipotsa: ‘Ho mamela ho amana kae le taba ee? Na Jesu ha aa ka a re, “e mong le e mong ea lumelang ho eena” o tla ba le bophelo bo sa feleng?’ Ka sebele, ho lumela, kapa tumelo ke ntho ea bohlokoa. Leha ho le joalo, ke habohlokoa ho hopola hore Bibele e bontša hore ho ba le tumelo hase feela ho lumela. Ho latela Vine’s Expository Dictionary of Old and New Testament Words, lentsoe la Segerike leo Johanne a le sebelisitseng le bolela “ho tšepa, eseng feela ho lumela.” E le hore Molimo a re bontše mohau, motho ha aa lokela ho lumela feela hore Jesu ke Mopholosi. O boetse o lokela ho etsa sohle se matleng a hae ho sebelisa seo Jesu a se rutang. Le haeba a ka re o oa lumela, ha a sa bontše ka liketso, tumelo eo ke ea lefeela. Bibele e re: “Tumelo e se nang mesebetsi e shoele.” (Jakobo 2:26) Ka mantsoe a mang, motho ea lumelang o lokela ho bontša tumelo ho Jesu ’me seo se bolela hore o lokela ho phela ho latela seo a se lumelang.

Pauluse o beha taba tjena: “Lerato leo Kreste a nang le lona lea re qobella, hobane sena ke seo re se ahlotseng, hore motho a le mong [Jesu] o ile a shoela bohle . . . O ile a shoela bohle e le hore ba phelang ba se ke ba hlola ba iphelela, empa ba phelele ea ileng a ba shoela ’me a tsosoa.” (2 Bakorinthe 5:14, 15) Haeba re ananela sehlabelo sa Jesu e le kannete, seo se tla re susumelletsa hore re etse liphetoho bophelong ba rōna—e leng hore re ke ke ra hlola re iphelela empa re tla phelela Jesu ea ileng a re shoela. Seo se bolela hore ntho e lokelang ho tla pele bophelong ba rōna ke ho etsa seo Jesu a se rutileng. Sena se tla ama boitšoaro ba rōna le lintho tsohle tseo re khethang ho li etsa bophelong. Batho ba bontšang tumelo ho Jesu ba tla fumana moputso ofe?

Karolo ea ho qetela ea Johanne 3:16 e bua ka seo Molimo a se tšepisang batho ba bontšang tumelo thekollong ’me ba phela ho latela melao ea Molimo. O batla hore batho bana ba tšepahalang ba ‘se ke ba timela, ba mpe ba be le bophelo bo sa feleng.’ Leha ho le joalo, batho bana bao Molimo a ba ratang ba tla fumana moputso o sa tšoaneng.

Jesu o tšepisitse hore sehlopha se seng se tla phela ka ho sa feleng leholimong. Ka ho hlakileng o ile a bolella barutuoa ba hae ba tšepahalang hore o il’o ba lokisetsa sebaka e le hore ba ka busa le eena khanyeng ea hae. (Johanne 14:2, 3; Bafilipi 3:20, 21) Ba tsosetsoang ho ea phela leholimong “e tla ba baprista ba Molimo le ba Kreste, ’me ba tla busa le eena e le marena ka lilemo tseo tse sekete.”—Tšenolo 20:6.

Ke balateli ba seng ba kae feela ba Kreste ba tla phela leholimong. Ha e le hantle, Jesu o ile a re: “Le se ke la tšaba, mohlatsoana, hobane Ntat’a lōna o amohetse ho le fa ’muso.” (Luka 12:32) “Mohlatsoana” e tla ba batho ba bakae ka palo? Tšenolo 14:1, 4 e re: “Ka talima, ’me, bonang! Konyana [Jesu Kreste ea tsositsoeng] e emeng Thabeng ea Sione [e leholimong], e e-na le ba likete tse lekholo le mashome a mane a metso e mene bao lebitso la eona le lebitso la Ntat’a eona le ngotsoeng liphatleng tsa bona. . . . Ba rekiloe har’a moloko oa batho joaloka litholoana tsa pele ho Molimo le ho Konyana.” Ha ba bapisoa le libilione tsa batho ba kileng ba phela, batho ba 144 000 ke “mohlatsoana” feela. Ho boleloa hore ke marena, joale ba tla busa bo-mang?

Jesu o ile a bua ka sehlopha sa bobeli sa batho ba tšepahalang ba tla rua molemo ’Musong oa leholimo. Joalokaha re hlokomela ho Johanne 10:16, Jesu o ile a re: “Ke na le linku tse ling, tseo e seng tsa lesaka lena; le tsona ke tla li tlisa, ’me li tla mamela lentsoe la ka, e tla ba mohlape o le mong, molisa a be mong.” “Linku” tseo li lebeletse ho phela ka ho sa feleng lefatšeng—e leng tebello eo Adama le Eva ba  neng ba e-na le eona qalong. Re tseba joang hore li tla phela lefatšeng?

Bibele e bua hangata ka hore lefatše e tla ba Paradeise. E le hore u iponele sena, u ka bala mangolo a latelang Bibeleng ea hao: Pesaleme ea 37:9-11; 46:8, 9; 72:7, 8, 16; Esaia 35:5, 6; 65:21-23; Matheu 5:5; Johanne 5:28, 29; Tšenolo 21:4. Litemana tseo li bua ka nako eo ntoa, tlala, ho kula le lefu li tla fela. Li bua ka nako eo ka eona batho ba lokileng ba tla thabela ho ikahela matlo, ho jala le ho hōlisa bana lefatšeng le nang le khotso. * Na ha u rate ho phela ka tsela eo? Re na le mabaka a mangata a ho lumela hore litšepiso tseo li tla phethahala haufinyane.

Haeba u ka khutsa hanyenyane ’me ua nahana ka lintho tsohle tseo Molimo a u etselitseng tsona le tseo a li etselitseng batho ka kakaretso, ha ho pelaelo hore o re etselitse lintho tse ngata. Rea phela, re bohlale, re phetse hantle ’meleng ebile re na le lintho tse re thusang hore re phele. Ho feta moo, mpho eo Molimo a re fileng eona ea thekollo ka Jesu, ea re shoetseng, e ka re tlisetsa litlhohonolofatso tse ngata le ho feta, joalokaha re ithutile ho Johanne 3:16.

Ha ho pelaelo hore bophelo bo sa feleng bo nang le khotso le bo thabisang, bo se nang ho kula, tlala, kapa lefu bo tla re tlisetsa thabo le litlhohonolofatso tse sa feleng. Ho itšetlehile ka uena hore na u tla fumana litlhohonolofatso tseo kapa che. Potso e salang ke ena, Ke’ng eo u e etsetsang Molimo?