SEHLOOHO SE KA NTLE | NA HA MOTHO A SHOELE HO FELILE KA EENA?
Bafu ba Tla Phela Hape!
Bethani e ne e le motse o monyenyane o bohōle ba lik’hilomithara tse tharo ho tloha Jerusalema. (Johanne 11:18) Ho ile ha etsahala ntho e bohloko sebakeng seo libeke tse ’maloa pele ho lefu la Jesu. Lazaro, eo e neng e le e mong oa metsoalle ea Jesu ea hlooho ea khomo, ka tšohanyetso o ile a kula haholo eaba oa shoa.
Ka lekhetlo la pele ha Jesu a ne a utloa litaba tseo, o ile a bolella barutuoa ba hae hore Lazaro o robetse le hore o ikemiselitse ho ea mo tsosa. (Johanne 11:11) Empa barutuoa ba Jesu ba ne ba sa utloisise hore na o bolela’ng, kahoo Jesu o ile a ba bolella ka ho toba a re: “Lazaro o shoele.”—Johanne 11:14.
Matsatsi a mane ka mor’a hore Lazaro a patoe, Jesu o ile a ea Bethani e le hore a il’o tšelisa khaitseli ea Lazaro, e leng Maretha. Maretha o ile a re: “Hoja u ne u le teng mona khaitseli ea ka e ka be e sa shoa.” (Johanne 11:17, 21) Jesu o ile a re: “Ke ’na tsoho le bophelo. Ea bontšang tumelo ho ’na, esita le hoja a ka shoa, o tla phela.”—Johanne 11:25.
“Lazaro, tsoa!”
Ho bontša hore mantsoe ao e ne e le ’nete, Jesu o ile a ea lebitleng eaba oa hoeletsa o re: “Lazaro, tsoa!” (Johanne 11:43) Monna eo ea neng a shoele o ile a tsoa ka lebitleng ’me batho ba neng ba shebeletse ba ile ba hlolloa.
Pele ho moo, Jesu o ne a ile a tsosa batho ba babeli. Ka lekhetlo le leng o ile a tsosa ngoanana e mong—e leng morali oa Jairuse. Pele Jesu a tsosa ngoanana eo, o ile a boela a bontša hore o ne a robetse.—Luka 8:52.
Hlokomela hore ha Jesu a bua ka lefu la Lazaro le la morali oa Jairuse, o ile a bapisa lefu le boroko. Ena ke tšoantšiso e loketseng. Hobane’ng? Ha motho a robetse ha a utloe letho, ha a bohlokong. (Moeklesia 9:5; sheba lebokose le sehloohong sena le reng, “Lefu le Tšoana le Boroko bo Tebileng.”) Barutuoa ba Jesu ba pele ba ne ba utloisisa boemo ba bafu hantle. Encyclopedia of Religion and Ethics e re: “Balateli ba Jesu ba ne ba nka lefu joaloka boroko, lebitla ba le nka joaloka sebaka sa ho phomola . . . bakeng sa batho ba shoeleng ba e-na le tumelo.” *
Hoa tšelisa ho tseba hore bafu ba robetse lebitleng ’me ha ba utloe bohloko. Kahoo rea tseba hore ho etsahala’ng ha motho a e-shoa ’me ha ho hlokahale hore re tšohe.
“HAEBA MONNA EA SHAHLILENG A SHOA NA A KA PHELA HAPE?”
Ke ’nete hore le hoja re thabela boroko bo monate, ha ho na motho ea batlang ho robala ka ho sa feleng. Na bafu ba robalang mabitleng ba tla phela hape—joaloka Lazaro le morali oa Jairuse?
Mopatriareka Jobo o ile a botsa potso eo ha a ne a le makhatheng a lefu. “Haeba monna ea shahlileng a shoa na a ka phela hape?”—Jobo 14:14.
Ha a bua le Molimo ea Matla ’Ohle, Jobo o ile a ikaraba, a re: “U tla hooa, ’me ke tla u araba. U tla hloloheloa mosebetsi oa matsoho a hao.” (Jobo 14:15) Jobo o ne a kholisehile hore Jehova o labalabela letsatsi leo a neng A tla tsosa bahlanka ba Hae ba tšepahalang. Na Jobo o ne a lakatsa ntho e ke keng ea etsahala? Che.
Batho bao Jesu a ileng a ba tsosa, ke bopaki bo hlakileng ba hore Molimo o file Jesu matla holim’a lefu. Ha e le hantle, Bibele e re hona joale Jesu o “na le linotlolo tsa lefu.” (Tšenolo 1:18) Kahoo Jesu o tla notlolla liheke tsa lebitla, joalokaha a ile a laela hore lejoe la lebitla la Lazaro le tlosoe.
Bibele e bua hangata ka tšepiso ena ea hore bafu ba tla tsoha. Lengeloi le ile la tiisetsa Daniele la re: “U tla phomola, empa u tla ema bakeng sa kabelo ea hao bofelong ba matsatsi.” (Daniele 12:13) Jesu o ile a bolella Basaduse, e leng baeta-pele ba Bajuda ba neng ba sa lumele tšepiso ea tsoho, a re: “Le fositse, hobane ha le tsebe Mangolo kapa matla a Molimo.” (Matheu 22:23, 29) Moapostola Pauluse o ile a re: “Ke na le tšepo ho Molimo . . . ea hore ho tla ba le tsoho ea ba lokileng le ba sa lokang.”—Liketso 24:15.
BAFU BA TLA TSOHA NENG?
Tsoho ea ba lokileng le ba sa lokang e tla etsahala neng? Lengeloi le ile la bolella Daniele ho re “bofelong ba matsatsi” o tla ema. Maretha le eena o ne a lumela hore Lazaro o ne a tla “tsoha tsohong ka letsatsi la ho qetela.”—Johanne 11:24.
Bibele e amahanya “letsatsi la ho qetela” le ho busa ha Kreste. Pauluse o ile a ngola a re: “Kaha [Kreste] o tla busa e le morena ho fihlela Molimo a behile lira tsohle tlas’a maoto a hae. E le sera sa ho qetela, lefu le tla etsoa lefeela.” (1 Bakorinthe 15:25, 26) Lena ke lebaka le matla la hore re rapelle hore ’Muso oa Molimo o tle le hore thato ea Molimo e etsoe lefatšeng. *
Joalokaha Jobo a ne a tseba, thato ea Molimo ke hore bafu ba tsohe. Ha letsatsi leo le fihla, ka sebele lefu le tla felisoa. Ha ho na motho ea tla hlola a ipotsa ho re, ‘Na ha motho a e-shoa ho felile ka eena?’
^ ser. 8 Lentsoe la Senyesemane le bolelang “mabitla” le tsoa lentsoeng la Segerike le bolelang “sebaka sa phomolo.”
^ ser. 18 E le hore u ithute ho eketsehileng ka ’Muso oa Molimo, sheba khaolo ea 8 ea buka ea Ha e le Hantle ke Eng Seo Bibele e se Rutang? e hatisoang ke Lipaki Tsa Jehova. E boetse e fumaneha ho www.isa4310.com/st.
