Molimo o mamela lithapelo tsa batho ba lichaba tsohle. (Pesaleme ea 145:18, 19) Lentsoe la hae Bibele, le re khothalletsa hore re bue le eena ka ntho leha e le efe e re tšoenyang. (Bafilipi 4:6, 7) Leha ho le joalo, ho na le lithapelo tse sa thabiseng Molimo. Ka mohlala, ha a thabisoe ke ha batho ba pheta-pheta lithapelo tseo ba li tšoereng ka hlooho.—Bala Matheu 6:7.

Hape Jehova ha a thabisoe ke lithapelo tsa batho bao ka boomo ba sa mameleng molao oa hae. (Liproverbia 28:9) Ka mohlala, mehleng ea Bibele, Molimo ha aa ka a mamela lithapelo tsa Baiseraele ba neng ba e-na le molato oa ho bolaea. Ho hlakile hore ho na le lintho tseo Molimo a lebeletseng hore re li etse e le hore a re mamele.—Bala Esaia 1:15.

Re ke ke ra atamela Molimo ka thapelo haeba re se na tumelo. (Jakobo 1:5, 6) Re lokela ho kholiseha hore o teng ’me oa re tsotella. Re ka matlafatsa tumelo ea rōna ka ho ithuta Bibele hobane tumelo ea ’nete e thehiloe linthong tse nang le bopaki le tse kholisang tse fumanoang Lentsoeng la Molimo.—Bala Baheberu 11:1, 6.

Re lokela ho rapela ka tieo le ka boikokobetso. Esita le Mor’a Molimo, Jesu o ile a ikokobetsa ha a ne a rapela. (Luka 22:41, 42) Kahoo, ho e-na le ho bolella Molimo hore na a etse’ng, re lokela ho bala Bibele e le hore re utloisise hore na o hloka eng ho rōna. Ebe re rapela tumellanong le thato ea Molimo.—Bala 1 Johanne 5:14.