Motho oa pele, Adama, o ile a phela lilemo tse makholo. Empa qetellong, o ile a tsofala ’me a shoa. Haesale ho tloha ka nako eo, batho ba ’nile ba leka ho etsa lintho tse ngata ho qoba botsofali. Ho ntse ho le joalo, ha ho le ea mong ea kileng a phonyoha lefu. Hobane’ng? Adama o ile a tsofala ’me a shoa ka lebaka la hore o ile a etsa sebe ka ho se mamele Molimo. Rōna re tsofala ka lebaka la hore re ile ra futsa sebe ho Adama ’me ka lebaka la sebe seo, rea shoa.—Bala Genese 5:5; Baroma 5:12.

E le hore re fumane bophelo bo sa feleng, re hloka motho e mong ea tla re rekolla. (Jobo 33:24, 25) Thekollo ke tefo e lefshoang ho lokolla motho e mong, kahoo rōna re hloka motho ea ka re lokollang lefung. (Exoda 21:29, 30) Jesu o ile a re lefella ka ho re shoela.—Bala Johanne 3:16.

Hase batho bohle ba tla lokolloa ho kuleng le botsofaling. Ha e le hantle, batho ba sa mameleng Molimo joaloka Adama, ba ke ke ba rua bophelo. Ke batho ba tšoaretsoeng libe feela ba tla fumana bophelo bo sa feleng.—Bala Esaia 33:24; 35:3-6.

E le hore re tšoareloe libe, re lokela ho etsa ho hong. Re lokela ho ithuta Lentsoe la Molimo, Bibele, e le hore re mo tsebe. E re ruta kamoo re ka phelang ka tsela e molemo kateng le kamoo re ka amoheloang ke Molimo le ho fumana bophelo bo sa feleng.—Bala Johanne 17:3; Liketso 3:19.