Estelle * o ne a khothalletse ho ea kerekeng hammoho le bana ba hae. O re, “Ke ile ka bolella moruti oa ka hore ke batla ho ithuta Bibele.” Empa ha ho mohla moruti oa hae a kileng a mo ruta eona. Qetellong o ile a khaotsa ho ea kerekeng. O tsoela pele ka ho re: “Baruti ba ile ba ’ngolla ’me ba mpolella hore ke romelle chelete feela, le ha ke sa tle kerekeng. Ke ile ka nahana, ‘Seo se bolela hore ha ba na taba le hore na ke tla kerekeng kapa che; ba ipatlela chelete ea ka feela.’”

Angelina, ea neng a tsamaea kereke o ile a re: “Kerekeng ea ka ho ne ho tsamaisoa sekotlolo sa koleke ka makhetlo a mararo nakong ea tšebeletso ka ’ngoe, ’me ho ne ho lebeletsoe hore re tšele chelete ka makhetlo ao ’ohle. Ba ne ba lula ba batla chelete. Ke ile ka nahana, ‘Ha ba na moea oa Molimo.’”

Na malumeli a sebakeng sa heno a sebelisa mekhoa e tobileng kapa e poteletseng hore a qobelle batho ho ntša chelete? Na seo se lumellana le Bibele?

Jesu, e leng mothehi oa Bokreste o ile a re: “Le amohetse ntle ho tefo, le fane ntle ho tefo.” (Matheu 10:8) Molaetsa oa Bibele o ke ke oa rekoa ka chelete ’me o lokela ho fetisetsoa ho batho bohle ba o batlang.

Bakreste ba pele ba ne ba koahela litšenyehelo tsa phutheho joang?

Motho e mong le e mong o ne a nehela “feela joalokaha a entse qeto e tiileng pelong ea hae, eseng ka lekhonono kapa ka ho qobelloa, kaha Molimo o rata ea fanang a nyakaletse.” (2 Bakorinthe 9:7) Moapostola Pauluse o ile a re: “Re ile ra le bolella litaba tse molemo . . . ka ho sebetsa bosiu le motšehare, e le hore re se ke ra beha moroalo o litšenyehelo li boima holim’a leha e le ofe oa lōna.” (1 Bathesalonika 2:9) Pauluse o ne a etsa litente e le hore a iphelise ha a etsa tšebeletso ea hae.—Liketso 18:2, 3.

Ka tloaelo Lipaki Tsa Jehova li kopanela mehahong ea boemo bo itekanetseng e bitsoang Liholo Tsa ’Muso. Litšenyehelo li koaheloa joang? Ho hang Lipaki ha li tsamaise sekotlolo sa koleke, ebile ha li fe batho lienfelopo tseo ba lokelang ho tšela chelete ho tsona. Ho e-na le hoo, mang kapa mang ea ananelang thuto ea Bibele a ka tšela monehelo lebokoseng la monehelo le fumanehang Holong ea ’Muso, a sa etse mponeng.

Ha ho pelaelo hore ho hatisa le ho tsamaisa makasine ena ho hloka chelete. Leha ho le joalo, u ke ke ua bona e bapatsoa kapa e kōpeloa lithuso tsa lichelete. Ntho ea bohlokoa ke ho ruta batho ’nete ea Bibele.

U nahana’ng ka see: Na mokhoa oo oa ho koahela litšenyehelo o lumellana le mantsoe a Jesu le mohlala oa Bakreste ba pele?