U ka ba le Bokamoso bo Atlehileng—Joang?

KE JOANG u ka bang le bokamoso bo atlehileng? Tsela e ’ngoe ke ka ho sebelisa bokhoni bo hlollang boo u nang le bona ba ho nahanisisa ka liphello tsa liqeto tseo u li etsang hona joale.

Ke ’nete hore ho ka ba thata ho etsa liqeto tse tla u tsoela molemo bophelong bohle ba hao. Hobane’ng? Hobane batho ba bangata ha ba batla lintho tse ka ba thabisang ba li batla hona hoo. Ka mohlala, u ka ’na ua hlokomela hore ho sebelisa keletso ea Bibele ho ka u thusa hore u be le kamano e matla le lelapa la hao. (Baefese 5:22–6:4) Empa hore u finyelle seo, u lokela hore u lule u ipha nako ea ho ba le lelapa la hao, ka lehlakoreng le leng u ithiba hore u se ke ua lula u le mosebetsing, boikhathollong, kapa boithabisong. Joaloka likarolong tse ling tsa bophelo, u lokela ho khetha pakeng tsa khotsofalo ea nakoana le khotsofalo e nkang nako e telele. Ke eng e tla u thusa hore u etse khetho e bohlale? Latela mehato ena e mene.

1 Nahana ka Liphello Tsa Liqeto Tsa Hao

Ha u lokela ho etsa qeto, nahanisisa ka ho teba ka liphello tse ka hlahang ’me u se ke ua iphoufaletsa ’nete. Bibele e fana ka keletso ena: “Ea masene ke ea boneng tlokotsi ’me a ipata.” (Liproverbia 22:3) Haeba ka botšepehi u nahanisisa ka liphello tsa qeto eo u e etsang, u tla batla ho qoba ho etsa lintho tseo u bonang hore li ka ba kotsi. Ka lehlakoreng le leng, ha u nahana ka melemo e tla ba teng ka nako e telele ha u etsa liqeto tse bohlale, u tla ikemisetsa ho latela liqeto tseo.

Ipotse: ‘Qeto eo ke e etsang e tla ama bophelo ba ka joang lilemong tse 10 kapa tse 20 tse tlang ho tloha hona joale? E tla nkama joang maikutlong le ’meleng? Khetho ea ka e tla ama ba lelapa la ka le batho bao ke ba ratang joang?’ Ka holim’a tsohle, ipotse: ‘Na qeto eo ke e etsang e tla thabisa Molimo? E tla ama kamano ea ka le eena joang?’ Kaha Bibele e bululetsoe ke Molimo, e ka u thusa ho lemoha hore na ke eng e mo thabisang ’me ea u lemosa ka lintho tse kotsi tseo u neng u ke ke ua li hlokomela.—Liproverbia 14:12; 2 Timothea 3:16.

2 Iketsetse Qeto ka Bouena

Ho e-na le hore ba iketsetse liqeto, batho ba bangata ba khetha ho etsisa ba bang. Empa ha ho bolele hore hobane feela batho ba bangata ba rata ho etsa lintho ka tsela e itseng tsela eo ke eona e atlehang. Iketsetse qeto ka bouena. Ka mohlala, nahana ka Natalie. * Oa hlalosa: “Ke ne ke batla ho ba le lenyalo le thabileng. Empa ke ne ke bona hore nke ke ka ba le lona ka lebaka la tsela eo ke neng ke phela ka eona. Ha ke le univesithing, metsoalle ea ka kaofela e ne e le batho ba bohlale. Empa ba ne ba lula ba etsa liqeto tse fosahetseng bophelong ba bona. Ba ne ba sa ratane le motho a le mong ka nako e telele. Le ’na ke ne ke e-na le bahlankana ba ’maloa joaloka bona. Ke ne ke lula ke utloile bohloko ka lebaka la tsela ena eo ke neng ke phela ka eona.”

Natalie o ile a qala ho ithuta Bibele le Lipaki Tsa Jehova. O re: “Ke ile ka hlokomela hore Lipaki li na le bacha ba bangata ba thabileng le manyalo a tiileng. Le hoja ho ne ho se bonolo, butle-butle ke ile ka fetola boitšoaro ba ka le tsela eo ke phelang ka eona.” Liphello e ile ea e-ba life? Natalie o re: “Haesale ke batla ho nyaloa ke monna eo ke mo  ratang ka ho tebileng. Ha nako e ntse e e-ea, ke ile ka nyaloa ke monna eo re leng bolumeling bo le bong le eena. Ka sebele Molimo o mphile bophelo ba lelapa boo ke neng ke sa nahane hore nka ba le bona.”

3 Nahana ka Bokamoso

E le hore u qobe ho nahana ka melemo ea nakoana, u boetse u lokela ho tseba hantle hore na u batla bokamoso bo joang le hore na u ka etsa’ng ho bo finyella. (Liproverbia 21:5) U se ke ua nahana feela ka lilemo tse 70 kapa tse 80 tseo motho a li phelang. Ho e-na le hoo, ipone u phela ka ho sa feleng, e leng bokamoso bo hlalosoang ka Bibeleng.

Bibele e hlalosa hore ka sehlabelo sa thekollo sa Kreste Jesu, Molimo o lokiselitse hore batho ba fumane bophelo bo sa feleng. (Matheu 20:28; Baroma 6:23) Molimo o tšepisa hore seo a neng a se rerile pele ka batho le lefatše se tla phethahatsoa. Batho ba ratang Molimo ba tla fumana monyetla oa ho thabela bophelo ka ho sa feleng lefatšeng le letle le tla beng le nchafalitsoe. (Pesaleme ea 37:11; Tšenolo 21:3-5) U ka phela ka tsela eo haeba u nahana ka bokamoso ha u etsa liqeto.

4 Sebetsa ka Thata ho Finyella Seo U se Batlang

U ka etsa’ng hore u be le bokamoso boo bo tšepisitsoeng? Qala ka ho ithuta ka Molimo. (Johanne 17:3) Tsebo e nepahetseng ea Bibele e tla etsa hore u kholisehe hore seo Molimo a se tšepisang ka bokamoso se tla fela se phethahale. Tumelo e joalo e ka u thusa hore u etse liphetoho tse hlokahalang e le hore u amoheloe ke Molimo.

Nahana ka se etsahetseng ka Michael. O re: “Ke ile ka qala ho noa haholo le ho sebelisa lithethefatsi ha ke le lilemo li 12. Ke ne ke le setho sa kenke ’me ke ne ke bona feela hore le pele ke e-ba lilemo li 30 ke tla be ke se ke shoele. Kaha ke ne ke lula ke halefile ebile ke ferekane, ke ile ka leka ho ipolaea ka makhetlo. Ke ne ke hlola ke nahana hore e tlameha ebe ho na le bophelo bo molemo ho feta bona boo ke bo phelang empa ke ne ke sa khone ho bo fumana.” Ha Michael a ntse a le sekolong se phahameng, setho se seng sa kenke se ile sa qala ho ithuta Bibele le Lipaki Tsa Jehova. Michael le eena o ile a etsa joalo.

Seo a ileng a ithuta sona ka Bibeleng se ile sa etsa hore a fetole tsela eo a talimang bokamoso ka eona. O re: “Ke ile ka ithuta hore ka moso lefatše le tlil’o fetoloa paradeise ’me batho ba tla phela ka khotso ho se se ba tšoenyang. Ke ile ka qala ho nahana hore bona ke bokamoso boo ke bo batlang. Ke ile ka ikemisetsa hore ke batla ho ba le kamano e ntle le Jehova. Empa ke ne ke sa khone ho mo thabisa ka linako tsohle. Le ka mor’a ho ithuta Bibele, ke ile ka tahoa ka makhetlo a ’maloa ’me ka lekhetlo le leng ke ile ka kopanela liphate le ngoanana e mong.”

Michael o ile a khona joang ho hlōla litšitiso tseo le ho atleha ho fetola bophelo ba hae? O re: “Motho eo ke neng ke ithuta Bibele le eena o ile a nkhothalletsa ho bala Bibele letsatsi le letsatsi le ho tloaelana le batho ba batlang ho thabisa Molimo. Ke ile ka hlokomela hore mekhoa ea metsoalle ea ka ea kenkeng e ne e ntse e ntšoaetsa. Le hoja e ne eka ke banab’eso, ke ile ka khaotsa setsoalle le eona.”

Michael o ile a ipehela lintho tseo a batlang ho li etsa ka nako e khutšoaane ’me seo se ile sa mo thusa hore a khone ho finyella ntho e khōlō eo a e batlang, e leng hore a phele tumellanong le melao ea Molimo. Le uena u ka etsa se tšoanang. Ngola fatše lintho tseo u batlang ho li finyella le hore na ke mehato efe e tla u thusa ho li finyella. Li bolelle batho ba tla u tšehetsa ’me u ba kōpe hore ba ’ne ba hlahlobe hore na u ntse u ea joang.

U se ke ua lieha ho ithuta ka Molimo le ho sebelisa litaelo tsa hae bophelong ba hao. Qala hona joale ho nka mehato e tla u thusa hore u rate Molimo le Lentsoe la hae, Bibele. Lentsoe la Molimo ha le bua ka motho ea sebelisang melao-motheo ea Bibele, le re: “Ntho e ’ngoe le e ’ngoe eo a e etsang e tla atleha.”—Pesaleme ea 1:1-3.

[Mongolo o botlaaseng ba leqephe]