Bibele e Fetola Batho

KE ENG eo ntate e mong oa Scotland a ileng a fumana e le molemo ho feta khoebo ea hae e atlehileng? Ke eng e ileng ea thusa ntate e mong oa Brazil hore a tlohele boitšoaro ba hae bo bobe le hore a se ke a hlola a tsuba k’hok’heine? Monna e mong oa Slovenia o ile a khona joang ho tlohela ho itlopa joala? Bala u utloe hore na batho bana ba re’ng ha ba itlhalosa.

“Ke ne ke Ikutloa ke Natefetsoe ke Bophelo.”—JOHN RICKETTS

SELEMO SA TSOALO: 1958

NAHA EA HESO: SCOTLAND

PELE: KE NE KE NA LE KHOEBO E ATLEHILENG

BOPHELO BA KA BA NAKONG E FETILENG: Ke hōletse lelapeng le ikhonang. Ntate oa ka e ne e le ofisiri sesoleng sa Brithani, ka hona lelapa leso le phetse libakeng tse ngata. Ntle le Scotland, re ile ra phela Engelane, Jeremane, Kenya, Malaysia, Ireland le Cyprase. Ho tloha ha ke le lilemo li robeli, ke ile ka tloha hae eaba ke qala ho lula likolong tse fapa-fapaneng tseo ke neng ke kena ho tsona Scotland. Qetellong ke ile ka fumana mangolo Univesithing ea Cambridge.

Ha ke le lilemo li 20, ke ile ka kena khoebong ea oli ka lilemo tse robeli. Qalong ke ile ka sebetsa Amerika Boroa, eaba ke ea Afrika ’me qetellong ka ea Australia Bophirimela. Ha ke qeta ho fallela Australia, ke ile ka bula khoebo ea matsete, eo hamorao ke ileng ka e rekisa.

Chelete eo ke ileng ka e fumana ha ke qeta ho e rekisa e ne e le ngata hoo ke ileng ka tlohela mosebetsi ha ke le lilemo li 40. Kaha ke ne ke se ke e-na le nako e ngata, ke ne ke lula ke hahlaula. Ke ile ka potoloha Australia eohle ka sethuthuthu habeli, ’me ka tsamaea lefatše lohle. Ke ne ke ikutloa ke natefetsoe ke bophelo.

KAMOO BIBELE E FETOTSENG BOPHELO BA KA KATENG: Le pele ke tlohela mosebetsi, ke ne ke batla hore na nka leboha Molimo joang ka katleho eo a mphileng eona. Ke ile ka qala ho ea Kerekeng ea Chache, eo ke neng ke hōletse ho eona. Empa kereke eo e ne e sa rute hakaalo ka Bibele. Eaba ke ithuta le Mamomone, empa ke ile ka tlohela kaha a ne a sa itšetleha ka Bibele.

Ka letsatsi le leng, Lipaki Tsa Jehova li ile tsa nketela lapeng. Ke ile ka hlokomela hang-hang hore lintho tseo ba li rutang li thehiloe Bibeleng ka ho feletseng. Lengolo le leng leo li ileng tsa mpontša lona ke la 1 Timothea 2:3, 4. Litemana tseo li re ke thato ea Molimo hore “batho ba mefuta eohle ba pholohe ’me ba fihle tsebong e nepahetseng ea ’nete.” Ke ile ka thabela hore ebe Lipaki ha lia ka tsa bua feela ka tsebo empa li ile tsa hatella hore e lokela ho ba tsebo e nepahetseng ea Bibele.

Ho ithuta Bibele le Lipaki Tsa Jehova ho ile ha nthusa hore ke be le tsebo eo e nepahetseng. Ka mohlala, ke ile ka ithuta hore Molimo le Jesu ke  batho ba babeli ba fapaneng, eseng karolo ea Boraro-bo-bong, boo ke neng ke sa bo utloisise. (Johanne 14:28; 1 Bakorinthe 11:3) Ke ile ka thaba haholo ho ithuta ’nete eo e bonolo. Ke ile ka teneha haholo ha ke hlokomela hore ke itšenyelitse nako e ngata nakong e fetileng ke leka ho utloisisa thuto eo e sa utloisiseheng!

Ka mor’a nakoana ke ile ka qala ho ea libokeng tsa Lipaki Tsa Jehova. Ke ile ka khahloa ke kamohelo e mofuthu le boitšoaro bo botle ba batho bohle moo—e ne eka ke bahalaleli. Lerato la bona la sebele le ile la nkholisa hore joale ke fumane bolumeli ba ’nete.—Johanne 13:35.

MELEMO EO KE E FUMANENG: Ka mor’a hore ke kolobetsoe, ke ile ka kopana le mosali ea ratehang ea bitsoang Diane. O hōletse lelapeng la Lipaki Tsa Jehova ’me o ne a e-na le litšobotsi tse ngata tse ileng tsa nkhahla. Re ile ra nyalana hamorao. Ka sebele Diane ke tlhohonolofatso e tsoang ho Jehova, kaha ke motsoalle oa ka ebile oa ntšehetsa.

’Na le Diane re ile ra ba le tabatabelo e matla ea ho fallela sebakeng seo ho hlokahalang baboleli ba eketsehileng ba litaba tse molemo tse tsoang Bibeleng. Ka 2010, re ile ra fallela Belize, e Amerika Bohareng. Mona re ruta batho ba hlileng ba ratang Molimo le ba nyoretsoeng ho tseba molaetsa oa Bibele.

Ho tseba ’nete ka Molimo le Lentsoe la hae Bibele, ho nkimolla kelellong. Kaha ke qeta nako e ngata ke bolela litaba tse molemo, ke ’nile ka thabela ho ruta batho ba bangata Bibele. Ha ho ntho e thabisang ho feta ho bona linnete tsa Bibele li fetola batho—joalokaha le ’na ke fetohile. Qetellong ke fumane mokhoa o molemo ka ho fetisisa oa ho leboha Molimo ka bophelo boo a mphileng bona.

“Ba ne ba le Mosa Haholo ho ’na.”—MAURÍCIO ARAÚJO

SELEMO SA TSOALO: 1967

NAHA EA HESO: BRAZIL

PELE: BOITŠOARO BA KA BO NE BO HLEPHILE

BOPHELO BA KA BA NAKONG E FETILENG: Ke hōletse Avaré, e leng motsana o São Paulo. Bongata ba baahi ba teng ke batho ba maemo a tlaasana.

Ntate oa ka o ile a hlokahala ke e-s’o hlahe. Ha ke sa le moshanyana, ke ne ke apara liaparo tsa ’mè oa ka ha a le sieo. Ke ile ka qala ho ba le mekhoa ea basali, ’me batho ba ile ba nahana hore ke ratana le banna ba bang. Ha nako e ntse e e-ea, ke ile ka qala ho kopanela liphate le bashanyana ba bang le banna.

Ha ke se ke atamela lilemo tse 20, ke ne ke lula ke batlana le motho eo nka robalang le eena (oa monna kapa oa mosali) hohle moo nka mo fumanang teng—e ka ba libareng, li-nightclub, esita le likerekeng. Ha ho e-na le mekete e etsoang ke sechaba, ke ne ke apara liaparo tsa basali ebe ke tjeka tlhōlisanong ea likolo ea motjeko oa samba. Ke ne ke tsebahala haholo.

E meng ea metsoalle ea ka e ne e le banna ba ratanang le banna ba bang, batho ba hoebang ka ’mele le ba lemaletseng lithethefatsi. E meng e ile ea ntšusumelletsa hore ke sebelise k’hok’heine ’me ke ile ka qetella ke le lekhoba la eona. Ka linako tse ling re ne re qeta bosiu re ntse re tsuba. Neng neng ke  ne ke qeta letsatsi lohle ke tsuba ke le mong feela. Ke ile ka ota hoo ho ileng ha jaleha taba ea hore ke na le AIDS.

KAMOO BIBELE E FETOTSENG BOPHELO BA KA KATENG: Ke nakong ena, moo ke ileng ka kopana le Lipaki Tsa Jehova. Li ne li le mosa haholo ho ’na. E ’ngoe ea litemana tsa Bibele tseo li ileng tsa mpalla tsona e ne e le Baroma 10:13, e reng: “E mong le e mong ea ipiletsang lebitsong la Jehova o tla pholoha.” Mantsoe ao a ile a etsa hore ke utloisise bohlokoa ba ho sebelisa lebitso la Jehova. Hangata ha ke ile ka tsuba k’hok’heine bosiu bohle, ke ne ke bula fensetere, ke shebe leholimong ebe ke rapela Jehova ke lla ke mo kōpa hore a nthuse.

Kaha ke ne ke tšoenyehile ka bohloko boo ’mè oa ka a bo utloang ha a nchebile ha ke ntse ke senya bophelo ba ka ka lithethefatsi, ke ile ka etsa qeto ea ho li tlohela. Nakoana ka mor’a moo, ke ile ka amohela ha Lipaki li ne li nkōpa hore ke ithute Bibele le tsona. Li ile tsa ntiisetsa hore ho ithuta ho tla nthusa hore ke tlohele ho sebelisa lithethefatsi joalokaha ke ne ke ikemiselitse—’me ho ile ha fela ha e-ba joalo!

Ha ke ntse ke tsoela pele ho ithuta Bibele, ke ile ka hlokomela hore ke lokela ho fetola tsela eo ke neng ke phela ka eona. Ntho e neng e le thata ka ho fetisisa e ne e le ho tlohela ho ratana le banna ba bang, kaha ke ne ke phetse ka tsela ena ka nako e telele haholo. Leha ho le joalo, ntho e ileng ea nthusa haholo ke ho tlohela lintho tse neng li etsa hore ke be le mekhoa e mebe. Ke ile ka khaotsa ho ikopanya le metsoalle ea ka ea khale ka ba ka tlohela ho ea libareng le li-nightclub.

Le hoja ho ne ho se bonolo ho etsa liphetoho tsena, ke ile ka tšelisoa ke ho tseba hore Jehova oa ntsotella ebile o utloisisa bothata boo ke leng ho bona. (1 Johanne 3:19, 20) Ka 2002, ke ne ke se ke tlohetse ho ratana le banna ba bang ’me ke ile ka kolobetsoa ka sona selemo seo hore ke be e mong oa Lipaki Tsa Jehova.

MELEMO EO KE E FUMANENG: ’Mè oa ka o ile a thabela liphetoho tseo ke ileng ka li etsa hoo le eena a ileng a qala ho ithuta Bibele. Ka bomalimabe, o ile a otloa ke setorouku ka nako eo. Leha ho le joalo, o ile a tsoela pele a rata Jehova le ’nete ea Bibele.

Ke se ke na le lilemo tse robeli ke le tšebeletsong ea nako e tletseng, ke qeta nako e ngata ke ruta batho Bibele. Kea lumela hore ka linako tse ling ke ile ka ’na ka tlameha ho loantša litakatso tse mpe. Empa ke khothatsoa ke ho tseba hore ha ke khetha ho se latele litakatso tseo, ke thabisa Jehova.

Ho atamela haufi le Jehova le ho phela ka tsela e mo thabisang ho entse hore ke be le seriti. Hona joale ke motho ea thabileng.

“Ke ne ke le Tanka e Lesoba.”—LUKA ŠUC

SELEMO SA TSOALO: 1975

NAHA EA HESO: SLOVENIA

PELE: KE NE KE ITLOPA JOALA

BOPHELO BA KA BA NAKONG E FETILENG: Ke hlahetse Ljubljana, motse-moholo oa Slovenia. Ke hōtse hamonate ho fihlela ke le lilemo li ’nè. Eaba ntate oa ka oa ipolaea. Ka mor’a ketsahalo ena, ’mè oa ka o ile a tlameha ho sebetsa ka thata ho re hlokomela re le babeli, ’na le abuti oa ka.

Ha ke le lilemo li 15, ke ile ka ea lula le nkhono oa ka. Ke ne ke rata ho lula le eena kaha metsoalle ea ka e mengata e ne e lula sebakeng seo. Ke ne ke bile ke ikutloa  ke lokolohile haholo ho feta ha ke ne ke lula lapeng. Ha ke le lilemo li 16, ke ile ka qala ho tloaelana le batho ba neng ba rata ho noa joala ka mafelo-beke. Ke ile ka qala ho hōlisa moriri, ka apara ka tsela e bontšang borabele ’me hamorao ka qala ho tsuba.

Le hoja ke ne ke sebelisa lithethefatsi tse fapa-fapaneng, joala bona e ne e hlile e le thatohatsi ea ka, kaha ke ne ke utloa bo le monate. Ho e-s’o ee kae ke ile ka iphumana ke se ke sa noe likhalase tse ’maloa feela tsa joala empa ke se ke noa libotlolo tse ngata ka nako e le ’ngoe. Ke ne ke khona ho pata hore na ke tahiloe hakae. Hangata monko oa joala ke oona feela o neng o ka ntšoarisa hore ke ne ke ntse ke noa. Leha ho le joalo, ho ne ho se na motho ea ka chong hore ke ne ke noele libotlolo tse ngata tsa veine kapa tsa biri—ke li noa le vodka ka nako e le ’ngoe!

Hangata e ne e le ’na ea thusang metsoalle ea ka ha e hlōleha ho tsamaea ha re tsoa discong bosiu, le hoja ke ne ke noele ho e feta ka makhetlo a mabeli. Ka le leng ke ile ka utloa motsoalle oa ka e mong a ntse a bua le batho ba bang a re ke tanka e lesoba—e leng tsela ea Maslovenia ea ho soma motho ea noang ho feta ba bang. Mantsoe ao a ile a nkutloisa bohloko haholo.

Ke ile ka qala ho nahanisisa ka hore na ke etsa’ng ka bophelo ba ka. Ke ne ke sithabelitsoe ke ho ikutloa ke se na thuso. Ho ne ho bonahala eka ha ho letho la bohlokoa leo ke le etsang bophelong.

KAMOO BIBELE E FETOTSENG BOPHELO BA KA KATENG: Nakong eona ena, ke ile ka hlokomela hore e mong oa bana bao ke kenang sekolo le bona o fetohile; e se e batla e le motho ea bonolo. Kaha ke ne ke batla ho tseba hore na o fetotsoe ke eng, ke ile ka mo memela reschorenteng. Ha re ntse re buisana, o ile a mpolella hore o se a ithuta Bibele le Lipaki Tsa Jehova. O ile a mpolella lintho tse ling tseo a neng a ithuta tsona ’me lintho tseo kaofela ke ne ke qala ho li utloa kaha ha kea ka ka hōlisetsoa bolumeling. Ke ile ka qala ho ea libokeng tsa Lipaki le ho ithuta Bibele le tsona.

Ho ithuta Bibele ho ile ha etsa hore ke hlokomele linnete tse ngata tse matla, tse bileng li khothatsang. Ka mohlala, ke ile ka ithuta hore re phela nakong eo Bibele e reng ke ‘matsatsi a ho qetela.’ (2 Timothea 3:1-5) Ke ile ka ba ka ithuta hore haufinyane Molimo o tla felisa batho ba etsang lintho tse mpe lefatšeng, le hore o tla fa batho ba lokileng monyetla oa ho phela ka ho sa feleng lefatšeng Paradeiseng. (Pesaleme ea 37:29) Ke ile ka ikutloa ke labalabela ho fetola bophelo ba ka e le hore ke tle ke be e mong oa batho bao ba lokileng.

Ke ile ka qala ho bolella metsoalle ea ka ka linnete tsa Bibele tseo ke neng ke ithuta tsona. Ba bang ba ne ba ntšeha ha ke ba bolella lintho tseo, empa ka tsela e itseng sena se ile sa nthusa haholo. Seo ba neng ba se etsa se ile sa nthusa hore ke hlokomele hore e ne e se metsoalle ea sebele. Ke ile ka hlokomela hore bothata ba ka ba ho noa bo ne bo bakoa haholo-holo ke metsoalle eo ke ileng ka e khetha. E ne e lula e ipotsa hore na mafelo-beke a tla fihla neng e tsebe ho ea tahoa hape.

Ke ile ka khaohana le metsoalle eo ’me bakeng sa eona ka fumana metsoalle e metle ea Lipaki Tsa Jehova. Ho ba le metsoalle e joalo ho nthusitse haholo—ke batho ba ratang Molimo ka botebo, ba hlileng ba lekang ho latela melao ea hae. Butle-butle ke ile ka khona ho tlohela ho itlopa joala ho neng ho se ho le maling.

MELEMO EO KE E FUMANENG: Ke leboha Jehova ka hore ebe ha ke sa hloka ho noa joala e le hore ke ikutloe ke thabile. Ka sebele ha ke tsebe hore na ho ka be ho etsahetse’ng ka ’na hoja ke ile ka tsoela pele ke phela ka tsela eo. Empa hona joale ke kholisehile hore bophelo ba ka bo ntlafetse.

Ke na le lilemo tse supileng ke ntse ke sebeletsa ofising ea lekala ea Lipaki Tsa Jehova ea Slovenia. Ho tseba Jehova le ho mo sebeletsa ho entse hore ke tsebe hantle hore na ke phelela eng.