Babali ba Batla ho Tseba . . .

Na ho Phela ka ho sa Feleng Paradeiseng ho Tla Qetella ho Tena?

▪ Bibele e re fa tšepo ea hore re ka phela ka ho sa feleng Paradeiseng lefatšeng. (Pesaleme ea 37:29; Luka 23:43) Na ho phela ka ho sa feleng sebakeng se phethahetseng ho tla qetella ho tena?

Eo ke potso ea bohlokoa haholo. Bafuputsi ba fumane hore motho ea lulang a tennoe ke bophelo a ka tšoenyeha, a tepella maikutlo a ba a rata ho etsa lintho tse ka mo ntšang kotsi. Batho ba sa tsebeng hore na ba phelela’ng kapa ba khathatsoang ke ho pheta-pheta mesebetsi ea letsatsi le letsatsi ba ka ’na ba tenoa ke bophelo. Na ba lulang Paradeiseng ba ke ke ba tseba hore na ba phelela’ng? Na lintho tse etsoang letsatsi le letsatsi e tla ba tse tsoafisang?

Taba ea pele, hopola hore Jehova Molimo, eo e leng eena Mongoli oa Bibele, ke eena ea fanang ka mpho ea bophelo bo sa feleng. (Johanne 3:16; 2 Timothea 3:16) Tšobotsi e ka sehloohong ea Molimo ke lerato. (1 Johanne 4:8) Jehova o re rata ka ho tebileng ebile o re file lintho tsohle tse molemo tseo re li thabelang hona joale.—Jakobo 1:17.

’Mōpi oa tseba hore e le hore re thabe, re hloka mosebetsi o phethang morero o itseng. (Pesaleme ea 139:14-16; Moeklesia 3:12) Paradeiseng, batho ba ke ke ba ikutloa eka ha bona ke ho phetha mosebetsi feela. Mosebetsi oo ba o etsang, ka ho toba o tla ba tsoela molemo hammoho le batho bao ba ba ratang. (Esaia 65:22-24) Haeba u ne u e-na le mosebetsi oo u o ratang, o etsang hore u sebelise bohlale boo u nang le bona le o sa feleng, na u ne u ka utloa bophelo bo tena?

Hape u hopole hore Jehova Molimo a ke ke a lumella mang le mang feela hore a phele Paradeiseng. O fana ka mpho ea bophelo bo sa feleng feela ho ba etsisang Mora oa hae, Jesu. (Johanne 17:3) Ha Jesu a le lefatšeng mona, o ile a thabela ho etsa thato ea Ntate oa hae. O ile a ruta balateli ba hae ka mantsoe le ka liketso hore thabo e sa feleng e tlisoa ke ho fana e seng ho amohela. (Liketso 20:35) Ha lefatše le se le entsoe Paradeise hape, bohle ba tla phela ka melao e ’meli e meholo—oa ho rata Molimo le oa ho rata moahelani. (Matheu 22:36-40) Nahana feela u se u phela le batho ba se nang boithati, ba u ratang le ba ratang mosebetsi oa bona! Na u nahana hore u ka tenoa ke bophelo bo joalo?

Ho phela Paradeiseng ho tla akarelletsa eng hape? Letsatsi le letsatsi re tla khona ho ithuta ntho e itseng e ncha ka ’Mōpi oa rōna. Bafuputsi ba se ba ntse ba sibolotse lintho tse ngata tse hlollang ka pōpo ea Jehova. (Baroma 1:20) Leha ho le joalo, ho fihlela hona joale, re tseba ho fokolang feela. Lilemo tse likete tse fetileng, monna ea tšepahalang, Jobo, o ile a hlahloba seo a se tsebang ka pōpo ea Molimo ’me qeto eo a ileng a e etsa e sa le ’nete. O ile a re: “Tsena ke linyane feela tsa litsela tsa [Molimo], ke mohoeshetso o mokaakang o utloiloeng ka eena! Empa ke mang ea ka bontšang kutloisiso ka sealuma sa hae se matla?”—Jobo 26:14.

Ho sa tsotellehe hore na re phela nako e telele hakae, re ke ke ra tseba sohle ka Jehova Molimo le ka mesebetsi ea hae. Bibele e bontša hore Molimo o kentse lipelong tsa rōna takatso ea ho phela ka ho sa feleng. Empa hape e re ‘le ka mohla moloko oa batho o ke ke oa fumana mosebetsi oo Molimo oa ’nete a o entseng ho tloha qalong ho isa qetellong.’ (Moeklesia 3:10, 11) Na u nahana hore ho ithuta lintho tse ncha ka ’Mōpi oa hao ho tla ke ho tene?

Esita le hona joale, batho ba tšoarehileng ka mosebetsi o tsoelang ba bang molemo le o tlotlisang Molimo ke seoelo ba ka iphumanang ba tenoa ke bophelo. Re ka kholiseha hore haeba re lula re tšoarehile ka mosebetsi oona oo, bophelo bo ke ke ba re tena le ka mohla—esita le ha re se re phela ka ho sa feleng.

[Litlhaloso Tsa Moo Litšoantšo li Nkiloeng Teng tse leqepheng la 27]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)