Kabo ea Mangolo ea Bo128 ea Gileade

Baromuoa ba Rongoa ho ea ‘Etsa Barutuoa’

“E LE hore batho ba lichaba tsohle ba utloe litaba tse molemo, Bakreste ba bang ba ne ba tla lokela ho ithaopela ho tlohela ba malapa a habo bona le mahae a bona e le hore ba il’o bolela litaba tse molemo linaheng tseo e seng tsa habo bona.” Mantsoe ana a ile a buuoa ke David Splane, setho sa Sehlopha se Busang sa Lipaki Tsa Jehova, ha a ne a hleka sebae bakeng sa ketsahalo e thabisang le e hahang moeeng.

Ka la 13 March, 2010, batho ba ka bang 8 000 ba ile ba tla kabong ea mangolo ea sehlopha sa bo128 sa Sekolo sa Bibele sa Gileade sa Watchtower. Ho ne ho e-na le metsoalle, ba malapa le baeti ho tsoa linaheng tse fapaneng tse 27.

“Barutuoa ba ne ba ke ke ba Lula Hae”

Mor’abo rōna Splane, eo e neng e le eena molula-setulo, o ile a qala lenaneo ka ho tšohla taelo ea Jesu e reng: “Ka hona e-eang ’me le etse batho ba lichaba tsohle barutuoa.” (Matheu 28:19, 20) O ile a hatisa hore Jesu o ile a rōma barutuoa ba hae hore ba ee bathong. Ke ’nete hore ka Pentekonta ea 33 C.E., batho ba tsoang Mesopotamia, Afrika Leboea le libakeng tse ngata tsa ’Muso oa Roma ba ile ba tla Jerusalema eaba ba utloa litaba tse molemo. Leha ho le joalo, sebui se ile sa re, “Barutuoa ba ne ba ke ke ba lula hae ba emetse hore batho ba lichaba tsohle ba tle ho bona. Ba ne ba lokela hore ba ee likarolong tse hōle-hōle tsa lefatše e le hore ba fumane batho.”—Liketso 1:8.

Mor’abo rōna Splane o ile a re: “Jesu ha aa ka a bolella barutuoa ba hae feela seo ba lokelang ho se etsa, empa o ile a ba a ba ruta hore na ba se etse joang. Ha aa ka a ba bolella feela hore ba rapele; o ile a ba ruta hore na ba rapele joang. Ha aa ka a ba bolella feela hore ba bolele; o ile a ba ruta hore na ba bolele joang. Ha aa ka a ba bolella feela hore e be mesuoe e hloahloa; o ile a ba bontša mekhoa e nepahetseng le e sebetsang ea ho ruta.”

Ha molula-setulo a bua le batsoali ba liithuti tse abeloang mangolo, o ile a qotsa tšepiso eo Jesu a ileng a e etsetsa barutuoa ba hae: “Bonang! ke na le lōna ka matsatsi ’ohle ho fihlela qetellong ea tsamaiso ea lintho.” (Matheu 28:20) Mor’abo rōna Splane o ile a tiisetsa bamameli hore Jesu o tla ’ne a hlokomele liithuti linaheng tseo li abetsoeng ho tsona.

“Le se ke la Tšaba ho Ithorisa”

Anthony Morris, setho sa Sehlopha se Busang, o ile a khothalletsa sehlopha hore se ‘se ke sa tšaba ho ithorisa.’ O ile a re ho na le mekhoa ea ho ithorisa e nepahetseng le e fosahetseng. Ha re ithorisa ka tsela e fosahetseng ke ha re batla hore thoriso e lebe ho rōna. Tsela e nepahetseng ea ho ithorisa ke e hlalositsoeng ho 1 Bakorinthe 1:31: “Ea ithorisang, a ke a ithorise ka Jehova.” Mor’abo rōna Morris o ile a re: “Ho ba le temohisiso le ho tseba ka Jehova Molimo ke tsona lintho tseo re lokelang ho ithorisa ka tsona. Ha e le hantle, tlotla e khōlō ka ho fetisisa eo ’na le uena re nang le eona, ke ea ho bitsoa ka lebitso leo le halalelang, ho ba e mong oa Lipaki Tsa Jehova.”—Jeremia 9:24.

Joale sebui se ile sa hatisa bohlokoa ba ho tsebahatsa lebitso la Jehova ka ho pheta phihlelo ea moromuoa e mong oa Afrika. Moromuoa eo o ne a tsamaea le mosali oa hae, a il’o fana ka puo ea Bibele. Ha ba fihla moo masole a thibeletseng tsela, lesole le leng le sa leng lecha lilemong le ile la mo supa ka sethunya eaba lea mo botsa hore na ke mang. Mosali oa hae, ea ileng a hopola lintho tseo ba neng ba li rupeloa Gileade, o ile a mo sebela, a re, “Mo bolelle hore u e mong oa Lipaki Tsa Jehova le hore u il’o fana ka puo ea Bibele.” O ile a mamela keletso ea hae eaba ba lumelloa ho feta. Letsatsing le hlahlamang banyalani bao ba ile ba utloa seea-le-moeeng hore mopresidente o boleletse masole  hore a hlokomele hore ho na le babolai ba sekhukhu ba ipitsang barumuoa! Banyalani bao ba ile ba qoba mathata a mangata ka ho ipolela hore ke Lipaki Tsa Jehova, eseng hore ke baromuoa. Mor’abo rōna Morris o ile a phethela puo ea hae ka ho re: “Ha le fihla moo le abetsoeng teng, le se ke la tšaba ho ithorisa. Le ithorise ka sohle seo Jehova a tla se phetha ha a le sebelisetsa ho itlotlisa ka ho sa feleng.”

“Na le Tla Phetha Thōmo ea Lōna?”

Geoffrey Jackson, setho sa Sehlopha se Busang, eo hape e neng e le moromuoa, o ile a thusa liithuti hore li nahanisise ka potso e ka holimo. O ile a botsa a re: “Ho boleloa’ng ha ho thoe motho ke moromuoa?” O ile a hlalosa hore lentsoe “moromuoa” le tsoa polelong ea Selatine e bolelang motho kapa sehlopha sa batho ba rongoang ho ea phetha kabelo e itseng e khethehileng. Joaloka Lipaki Tsa Jehova, re ronngoe ho ea bolela litaba tse molemo le ho thusa ba bang moeeng. Ha re etsa mosebetsi ona, re etsisa Jesu Kreste, ea ileng a lula a hopola seo a neng a se rometsoe lefatšeng. Jesu o ile a re ho ’Musisi oa Moroma, Ponse Pilato: “Ke tletse sena lefatšeng, hore ke pakele ’nete.”—Johanne 18:37.

Sebui se ile sa thusa sehlopha hore se nahane ka ketsahalo ea ntoa ea Jeriko e tlalehiloeng ka Bibeleng. Ka matsatsi a tšeletseng, bahlabani ba Iseraele ba ne ba tsoha hoseng haholo, ba hlomela, ’me ba pota Jeriko, ebe ka mor’a moo ba khutlela hae. Sebui se ile sa re, “Ho ea ka batho, kabelo eo ea bona e ne e bonahala e sa utloahale ebile e makatsa.” O ile a re masole a mang e ka ’na eaba a ne a ntse a re, ‘Re senyetsoa nako feela mona.’ Leha ho le joalo, ka letsatsi la bosupa Baiseraele ba ile ba laeloa ho pota motse ka makhetlo a supileng ’me ka mor’a moo ba etse mohoo o moholo oa ntoa. Phello e ile ea e-ba efe? Marako a Jeriko a ile a oa putla!—Joshua 6:13-15, 20.

Mor’abo rōna Jackson o ile a fana ka lintlha tse ’nè tseo ho ka ithutoang tsona tlalehong ea Jeriko. (1) Ho mamela ke ntho ea bohlokoa. Re lokela ho etsa lintho ho latela tsela eo Jehova a batlang hore li etsoe ka eona, eseng ka tsela eo re nahanang hore ke eona e nepahetseng. (2) Ho ba le tumelo esita le ho tšepa Jehova ke habohlokoa. “Ka tumelo marako a Jeriko a ile a oela fatše,” a sa lihoe ka likofuto tsa ho heletsa marako. (Baheberu 11:30) (3) Re lokela ho ba le mamello. Ha nako e ntse e e-ea, litlhohonolofatso tsa Jehova li tla ‘u fihlela.’ (Deuteronoma 28:2) (4) U se ke ua tela. Le ka mohla u se ke ua lebala kabelo ea hao. Mor’abo rōna Jackson o ile a qetella puo ea hae ka ho re, “Haeba u lula u hopola lintlha tsena, u tla phetha kabelo ea hao ’me u rorise Jehova u be u mo tlotlise.”

Lintlha Tse Ling Tse Ileng Tsa Tšohloa

“Rata Bibele Esita le Mongoli oa Eona.” Seo e ne e le sehlooho se neng se tšohloa ke Maxwell Lloyd, setho sa Komiti ea Lekala ea United States. O ile a re ho sehlopha, “Le lokela ho nka Bibele e le buka e phelang.” Eaba o ba khothatsa ka ho ba bolella mantsoe a latelang: Le se ke la ba la lumella hore lerato leo le ratang Jehova Molimo ka lona le tape. Le se ke la nka feela hore motho e mong le e mong o utloisisa lintho tseo le li rutang. Ithuteng ho nolofatsa litaba tse ka Bibeleng e le hore li hle li tebe lipelong tsa liithuti tsa lōna. Ikokobetseng. Le se ke la etsa hore ho bonahale eka le tseba haholo. Rutang ka ho beha mohlala o motle. Liithuti tsa lōna li lokela ho bona hore ehlile le rata Bibele haholo.

“Lemohang Makhoaba.” Michael Burnett, e leng mokoetlisi oa sehlopha, eo e neng e le moromuoa, o ile a fana ka puo e nang le sehlooho se ka holimo. O ile a re ka linako tse ling le tla tšoenyeha. Empa hopolang temoso ea Jesu: “Lemohang hore makhoaba ha a jale peō leha e le ho kotula, . . . leha ho le joalo Molimo oa a fepa.” (Luka 12:24) Ho latela selekane sa Molao, makhoaba a ne a sa hloeka, kahoo a ne a sa lokela ho jeoa. A ne a lokela ho nkoa a nyonyeha. (Levitike 11:13, 15) Ho ntse ho le joalo, Molimo oa a fepa. Mor’abo rōna Burnett o ile a re: “Kahoo, haeba ho ka ba le ntho e le tšoenyang haholo, le hopole lekhoaba. Haeba Molimo a hlokomela nonyana e sa hloekang le e nyonyehang joalo, ka sebele o tla le hlokomela le ho feta kaha ebile le hloekile mahlong a hae.”

“Ha ke U Fosetse.” Mark Noumair, mokoetlisi e mong oa sekolo sa Gileade, o ile a thusa  bamameli hore ba hlahlobe papiso ea basebetsi ba serapa sa morara eo Jesu a ileng a e etsa. Basebetsi ba bang ba ile ba sehla ka thata letšehare kaofela. Ba bang ba ile ba sebetsa hora feela. Leha ho le joalo, ba ile ba fumana moputso o tšoanang kaofela! Ba sebelitseng nako e telele ba ile ba qala ho korotla. Mong’a serapa o ile a re ho e mong le e mong ea korotlang: “Ha ke u fosetse. U ile ua lumellana le ’na ka denari, na ha ho joalo? Nka sa hao ’me u tsamaee.” (Matheu 20:13, 14) Re ka ithuta’ng ho see? U se ke ua ipapisa le ba bang. Mor’abo rōna Noumair o ile a re: “Ho ipapisa le ba bang ka tsela e fosahetseng ho ka u lematsa. Ntho e kotsi le ho feta ke hore ho ka etsa hore u tlohele kabelo ea hao, u khaotse tšebeletso ea bohlokoa haholo.” Sebui se ile sa hopotsa sehlopha hore Jesu ke eena ea tataisang kotulo ea moea mehleng ena ’me a ka etsa sohle seo a se ratang ka balateli ba hae. Haeba Jehova le Jesu ba etsa qeto ea ho fa ba bang ho eketsehileng, ha ba u fosetse. Tsepamisa maikutlo ho seo e leng sa hao ’me u se ke ua etsa hore “moputso” oa ba bang o u sitise mosebetsing oo Jehova a o fileng oona.

Liphihlelo le Lipuisano

Ha liithuti tsa Gileade li se ka tlelaseng kapa li sa etse mosebetsi oa sekolo, li kopanela le liphutheho tse haufi tsa Lipaki Tsa Jehova mosebetsing oa boboleli. Sam Roberson, e leng e mong oa bakoetlisi ba Gileade, o ile a buisana le liithuti tse ’maloa ka liphihlelo tseo li bileng le tsona. Ka mohlala, Morali’abo rōna Alessandra Kirchler, o ile a kopana le ’mè e mong ea neng a tšoenyehile haholo ka hore mora oa hae oa tsuba. Hamorao Morali’abo rōna Alessandra o ile a khutla a tšoere Tsoha! e tšohlang taba eo. Ho ne ho se na motho hae, leha ho le joalo, o ile a siea makasine eo. Qetellong, o ile a fumana ’mè eo a le teng lapeng eaba o mo kōpa hore a kene. ’Mè eo o ile a bontša hore o ananetse makasine eo eaba o re: “Kamehla kea ipotsa hore na ebe Molimo o leka ho mpontša’ng ka liteko tsena tseo a ntlisetsang tsona.” Morali’abo rōna Alessandra o ile a mo bontša ka Bibeleng hore hase Molimo ea etsang hore lintho tse mpe li re etsahalle. (Jakobo 1:13) Hona joale ’mè eo esita le mora oa hae ba ithuta Bibele.

Melvin Jones, ea sebetsang Lefapheng la Tšebeletso o ile buisana le liithuti tse tharo tsa Gileade tsa mehleng: Jon Sommerud, ea sebeletsang Albania; Mark Anderson, ea sebeletsang Kenya; hammoho le James Hinderer, ea sebeletsang Lefapheng la Likolo Tsa Puso ea Molimo. Kaofela ha bona ba ile ba lumela hore Gileade ha e rute motho lithuto tsa motheo tsa Bibele feela, empa e boetse e mo ruta hore na a ka li sebelisa joang, ho sa tsotellehe hore na liithuti ke bo-mang kapa hore na li sebeletsa hokae.

Ka mor’a moo, e mong oa liithuti o ile a bala lengolo le amang maikutlo le tsoang ho liithuti le bontšang hore li ananela sohle. John Barr, ea lilemo li 96, e leng eena e moholo ho litho tsohle tsa Sehlopha se Busang, o ile a koala lenaneo ka thapelo, a kōpa Jehova hore a hlohonolofatse mosebetsi oa sehlopha sa bo128 sa Gileade.

 [Chate/’Mapa o leqepheng la 31]

LIPALO-PALO TSA SEHLOPHA

Palo ea linaha tse emetsoeng 8

Palo ea baromuoa 54

Palo ea malapa 27

Karolelano ea lilemo 35,2

Karolelano ea lilemo ba kolobelitsoe 19,1

Karolelano ea lilemo ba le tšebeletsong ea nako e tletseng 13,8

[’Mapa]

(Ha u batla ho bona boitsebiso bo hlophisitsoeng hantle, sheba sengoliloeng)

Sehlopha se abetsoe ho ea linaheng tse 25 tse bontšitsoeng tlaase mona:

LINAHA TSEO BA ABETSOENG HO TSONA

HONDURAS

GUATEMALA

NICARAGUA

DOMINICAN REPUBLIC

ARUBA

GUYANA

ECUADOR

BOLIVIA

PARAGUAY

LATVIA

ROMANIA

KOSOVO

SERBIA

ALBANIA

GUINEA

LIBERIA

CÔTE D’IVOIRE

GHANA

NAMIBIA

RWANDA

MADAGASCAR

MONGOLIA

TAIWAN

CAMBODIA

INDONESIA

(LIBAKA TSE LING KE TSE TLAS’A LEKALA LA AUSTRALIA)

[Setšoantšo se leqepheng la 30]

Liithuti tsa Gileade li etsa pontšo ea se ileng sa etsahala mosebetsing oa tsona oa boboleli

[Setšoantšo se leqepheng la 31]

Sehlopha sa Bo128 sa Sekolo sa Bibele sa Gileade sa Watchtower se Abetsoeng Mangolo

Lethathamong le tlaase mona, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ho le letona moleng ka mong.

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.