Litaba Tse Molemo ka Lipuo Tse 500

HA NTOA ea lehae e ntse e kupa Rwanda, bafetoleli ba ’maloa ba baleha mahaeng a bona, ba siea thepa ea bona. Leha ho le joalo, ba khona ho nka lik’homphieutha tsa bona tsa li-laptop, tseo ba eang le tsona likampong tsa baphaphathehi. Lebaka? E le hore ba ’ne ba tsoele pele ho fetolela lingoliloeng tsa Bibele ka puo ea Sekinyarwanda.

Mosali e mong e mocha lilemong oa Asia Boroa-bochabela, o thaepa ka k’homphieutha ea hae ho fihlela har’a mp’a bosiu, a shoele ke mokhathala, a mameletse mocheso ’me motlakase o ntse o khaoha hangata, o mo sitisa ho etsa mosebetsi oa ho fetolela hantle. Sepheo sa hae ke hore ha letsatsi la ho hatisoa ha mosebetsi oo le fihla, a be a qetile ho o fetolela.

Bafetoleli bana ke ba bang ba lebotho la baithaopi ba ka bang 2 300 ba sebetsang libakeng tse fetang 190 lefatšeng ka bophara. Ba ka ba lilemo tse pakeng tsa 20 le 90 ’me ba sebetsa ka thata e le hore batho ba ka fumana matšeliso a molaetsa o tsoang Bibeleng ka lipuo tse 500.—Tšenolo 7:9.

Ho Finyella Batho ba Lipuo Tse sa Tšoaneng

Lilemong tsa morao tjena, mosebetsi oa Lipaki Tsa Jehova oa ho fetolela o hōtse ka tsela e hlollang. Ka mohlala, ka 1985, Molula-Qhooa o ne o hatisoa ka lipuo tse 23—e leng seo mehleng eo e neng e le katleho e khōlō. Kajeno, Molula-Qhooa o hatisoa ka lipuo tse 176 ’me o tsoela hong e le hore babali lefatšeng ka bophara ba khone ho ithuta molaetsa o tšoanang ka nako e tšoanang.

Lipuong tse ka bang 50, Molula-Qhooa ke eona feela koranta e hatisoang kamehla. Hobane’ng? Kaha ha ho letho le susumelletsang lik’hamphani tsa khatiso hore li hatise lingoliloeng ka lipuo tseo. Empa Lipaki Tsa Jehova lefatšeng ka bophara li ithaopela ho fana ka menehelo e le hore li kopanye matsoho hore Lentsoe la Molimo le lingoliloeng tse thehiloeng Bibeleng li fumanehe hohle moo batho ba li hlokang.—2 Bakorinthe 8:14.

Batho ba thabela molaetsa oa Bibele haholo ha ba o utloa ka lipuo tsa bona. Ka mohlala, lingoliloeng tse thehiloeng Bibeleng li sa tsoa qala ho hatisoa ka Semiskito, e leng puo e buuoang ke batho ba Nicaragua ba ka bang 200 000. Mosali e mong o ile a kōpa ho tlisetsoa Buka ea ka ea Lipale Tsa Bibele * ea Semiskito ’me nakong eo a e tlisetsoang, moruti oa sebakeng seo o ne a le teng. Ha moruti a bona buka eo e ntle, o ile a mo kōpa eona. Mosali eo o ile a hana ka eona leha moruti a se a re o tla mo fa linaoa tsa kofi tse etsang lik’hilograma tse 20 bakeng sa eona!

 Lilemong tse leshome tse fetileng, lingoliloeng tse thehiloeng Bibeleng li ’nile tsa fetoleloa ka lipuo tsa Mexico tse fetang 12 ho akarelletsa le Semaya, Senahuatl le Setzotzil. Ka lilemo tse ka tlaase ho tse leshome, liphutheho tsa Lipaki Tsa Jehova tse sebelisang lipuo tsa sebakeng seo le tsa puo ea matsoho li ile tsa eketseha naheng eo ho tloha ho tse 72 ho ea ho tse fetang 1 200. Lipaki Tsa Jehova li ka jala peō ea molaetsa oa Bibele ka lipelong tsa batho, empa li siela Molimo hore a hōlise peō eo ea ’nete lipelong tsa bona.—1 Bakorinthe 3:5-7.

Phetolelo ea Morao-rao ea Bibele ka Lipuo Tse 80

Lilemong tse sa tsoa feta, Lipaki Tsa Jehova li ile tsa sebetsa ka thata hore li hatise Phetolelo ea Lefatše le Lecha ea Mangolo a Halalelang e feletse kapa e sa fella ka lipuo tse 80. Liphello e bile life? Paki e ’ngoe ea Afrika Boroa e ile ea re ka Bibele ea Setswana: “Buka ee ke ea bohlokoa hakaakang! E tla nthusa hore ke ananele Lentsoe la Molimo haholoanyane. Puo e sebelisitsoeng e bonolo ebile ho monate ho e bala.” ’Mali e mong oa Setsonga oa Mozambique o ile a re: “Le hoja ho ne ho e-na le lingoliloeng tse ling tse thehiloeng Bibeleng, ho hloka Bibele ho ne ho tšoana le ha pula e sa ne empa ho e-na le mahalima hammoho le lialuma! Leha ho le joalo, pula e ile ea na ha ho lokolloa Bibele ea Phetolelo ea Lefatše le Lecha ka Setsonga.”

Batho ba fetolelang le ba bolelang litaba tse molemo tse thehiloeng Bibeleng, ka tsela e hlollang ba phetha boprofeta bo ileng ba boleloa khale. Jesu Kreste ke eena ea ileng a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.”—Matheu 24:14.

[Mongolo o botlaaseng ba leqephe]

[Krafo e leqepheng la 25]

(Ha u batla ho bona boitsebiso bo hlophisitsoeng hantle, sheba sengoliloeng)

PHETOLELO EA LEFATŠE LE LECHA LINGOLILOENG TSE LING

E feletse kapa e sa fella

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

PALO EA LIPUO

[Litšoantšo tse leqepheng la 24, 25]

Baithaopi ba ka bang 2 300 ba fetolela lingoliloeng tse thehiloeng Bibeleng ka lipuo tse 500

BENIN

SLOVENIA

ETHIOPIA

BRITHANI