MORA oa Noe, Sema, o ile a pholoha ha ho ne ho timetsoa moloko oa pele ho moroallo ’me a phela molokong o latelang. Na ua tseba hore na ke hobane’ng ha moloko oa pele oo Sema a neng a phela ho oona o ile oa timetsoa, le hore na eena le lelapa labo ba ile ba pholoha joang hore ba phele molokong o latelang?— * E-re re bue ka taba ena.

Bibele e re ha Sema a sa le monyenyane, ‘bobe ba batho’ bo ne bo le bongata. Ntho e ’ngoe le e ’ngoe eo batho ba neng ba e nahana e ne e le “mpe . . . ka linako tsohle.” Na ua tseba hore na Molimo o ile a etsa’ng?— O ile a tlisa moroallo o ileng oa timetsa moloko oo oohle o khopo. Moapostola Petrose o ile a ngola a re: “Lefatše la nakong eo le ile la timela ha le koaheloa ke metsi.”—Genese 6:5; 2 Petrose 3:6.

Na ua bona hore na ke hobane’ng ha Molimo a ile a timetsa batho ba moloko oo?— Ba ne ba le babe ebile ba nahana ka lintho tse “mpe . . . ka linako tsohle.” Jesu o ile a bua ka sena. O ile a re, “Pele ho moroallo,” batho ba ne ba ithabisa, “ba ja ’me ba noa” ba bile ba “nyala ’me . . . ba nyalisoa.” Jesu o ile a phaella ka ho re, ha baa ka “ba elelloa ho fihlela moroallo o tla ’me o ba hohola bohle.”—Matheu 24:37-39.

Batho bao ba ile ba sitoa ho elelloa eng, kapa ho bona eng?— Ntate oa Sema, e leng Noe, e ne e le “’moleli oa ho loka,” empa batho ha baa ka ba mamela seo a neng a se bua. Noe o ile a mamela Molimo ’me a haha areka, e leng sekepe se seholo se neng se tla boloka eena le lelapa la hae ba sireletsehile nakong ea Moroallo. Ke Noe feela, mosali oa hae le bara ba hae—e leng Sema, Kama le Jafeta—le basali ba bona, ba ileng ba elelloa seo Molimo a neng a batla hore ba se etse. Batho ba bang kaofela ba ile ba iketsetsa feela seo ba neng ba batla ho se etsa, eaba ba timetsoa ke Moroallo.—2 Petrose 2:5; 1 Petrose 3:20.

Hoo e ka bang selemo ka mor’a Moroallo, Sema le lelapa labo ba ile ba tsoa ka arekeng ’me ba fumana metsi a pshele lefatšeng. Batho bohle ba babe ba ne ba felisitsoe, empa nakoana ka mor’a moo ba boela ba e-ba teng hape. Kanana, e leng mora oa Kama, mor’abo Sema, o ile a etsa ntho e mpe hoo Noe a ileng a re: “Kanana a rohakoe.” Nimrode, e leng setloholo sa Kama, le eena o ne a le mobe. O ile a hanyetsa Molimo oa ’nete, Jehova, ’me a bolella batho hore ba hahe tora e phahameng  e bitsoang Babele e le hore ba tume. U nahana hore see se ile sa etsa hore Sema le ntate oa hae ba ikutloe joang?—Genese 9:25; 10:6-10; 11:4, 5.

Ba ile ba utloa bohloko, ’me Jehova le eena o ile a utloa bohloko. Na ua tseba hore na Jehova o ile a etsa’ng?— O ile a ferekanya puo ea batho bao e le hore ba se ke ba hlola ba utloana. Joale batho ba ile ba tlameha ho khaotsa ho haha ’me ba buang puo e le ’ngoe ba leba sebakeng se le seng. (Genese 11:6-9) Empa Molimo ha aa ka a fetola puo ea Sema le lelapa labo. Kahoo ba ne ba ka itulela hammoho le ho thusana ha ba sebeletsa Molimo. Na u se u kile ua ipotsa hore na ebe Sema o ile a sebeletsa Jehova nako e kae?—

Sema o phetse ho fihlela a e-ba lilemo li 600. O ile a phela lilemo tse 98 pele Moroallo o tla, ’me ka mor’a oona a phela lilemo tse 502. Re ka tiiseha hore o ile a thusa Noe ho haha areka le ho lemosa batho ka moroallo. Empa u nahana hore Sema o ile a etsa’ng ka lilemo tse fetang 500 tseo a li phetseng ka mor’a Moroallo?— Noe o ile a bua ka Jehova e le “Molimo oa Sema.” E tlameha ebe Sema o ile a tsoela pele a sebeletsa Jehova le ho thusa litho tsa lelapa la hae hore li etse se tšoanang. Hamorao, lelapa la Sema le ile la akarelletsa Abrahama, Sara le Isaka.—Genese 9:26; 11:10-31; 21:1-3.

Joale ak’u nahane ka lefatše la moloko oa kajeno oa batho, oo ho tloha mehleng ea Sema o ’nileng oa e-ba khopo le ho feta. Ho tla etsahala’ng ka lona?— Bibele e re “lea feta.” Empa hlokomela tšepiso ena: “Ea etsang thato ea Molimo o hlola ka ho sa feleng.” Ka hona haeba re etsa thato ea Molimo, re ka ’na ra ba har’a ba tla pholohela lefatšeng le lecha la Molimo. Joale, ka thuso ea Molimo re ka phela ka ho sa feleng re thabile lefatšeng!—1 Johanne 2:17; Pesaleme ea 37:29; Esaia 65:17.