1, 2. Ke hobane’ng ha Jesu a ile a etsa papiso ea litalenta?

JESU o ile a etsa papiso ea litalenta ho hlakisetsa balateli ba hae ba tlotsitsoeng boikarabelo boo ba nang le bona. Empa papiso ena e ama barutuoa bohle ba Jesu. Kahoo, ho hlokahala hore re utloisise papiso ena, ho sa tsotellehe hore na re na le tšepo ea ho phela leholimong kapa lefatšeng.

² Jesu o entse papiso ee neng? O e entse ha a fa barutuoa ba hae pontšo e neng e tla bontša hore e se e le Morena le hore nako ea bofelo e qalile. (Matheu 24:3) Kahoo papiso ea litalenta ke karolo ea pontšo eo ’me e phethahala mehleng ea rōna.

3. Re ithuta’ng lipapisong tse ho Matheu khaolo ea 24 le ea 25?

³ Jesu o ile a etsa papiso ea litalenta le lipapiso tse ling tse tharo tseo le tsona e neng e le karolo ea pontšo ea hore nako ea bofelo e qalile. Lipapiso tsena kaofela li bontša litšobotsi tse tobileng tseo balateli ba hae ba lokelang ho ba le tsona. Re ka bala lipapiso tsena ho Matheu 24:45 ho ea ho 25:46. Ea pele ke ea lekhoba le tšepahalang, e leng batlotsuoa  ba seng bakae ba nang le boikarabelo ba ho ruta batho ba Jehova. Ho hlokahala hore ba tšepahale le ho ba masene. * (Sheba naletsana.) Ka mor’a moo, o ile a etsa papiso ea baroetsana ba leshome. Ho eona o ile a lemosa batlotsuoa bohle hore ba lule ba itokisitse le ho lebela kaha ha ba tsebe letsatsi le hora eo a tla tla ka eona. * (Sheba naletsana.) Ha a qeta papiso eo, o ile a etsa papiso ea litalenta ho ruta batlotsuoa bohle hore ho hlokahala ba sebetse ka thata ho phetha boikarabelo ba bona ba Bokreste. Ka mor’a moo, Jesu a etsa papiso ea linku le lipōli, e neng e lebisitsoe ho ba nang le tšepo ea ho phela lefatšeng. O ile a hatisa bohlokoa ba hore ba lule ba tšepahala ’me ba etse sohle seo ba ka se khonang ho thusa batlotsuoa. * (Sheba naletsana.) Sehloohong sena re tlil’o tšohla seo papiso ea litalenta e se emelang.

4, 5. Monna ea papisong ea litalenta ke mang, hona talenta ke eng?

⁴ Bala Matheu 25:14-30. Papisong ea litalenta, Jesu o buile ka monna ea ileng a nka leeto. Papisong e tšoanang le ena, Jesu o buile ka monna ea nkileng leeto ho ea ba morena. * (Sheba naletsana.) (Luka 19:12) Ka lilemo tse ngata lingoliloeng tsa rōna li ’nile tsa re monna ea hlahang lipapisong tsena ka bobeli o emela Jesu, ea ileng a ea leholimong ka selemo sa 33 C.E. Empa Jesu ha e ea ba Morena hang ha a fihla leholimong. O ile a ema ho fihlela ka 1914, ha lira tsa hae li “behoa joaloka setuloana sa maoto a hae.”—Baheberu 10:12, 13.

⁵ Jesu o re monna ea papisong o ne a e-na le litalenta tse robeli. E ne e le chelete e ngata. * (Sheba naletsana.) Pele a tsamaea o ile a fa makhoba a hae chelete ena. O ile a re a mo etsetse phaello. Feela joalokaha chelete e ne e le ea bohlokoa ho monna eo, ho na le ntho eo Jesu a neng a e nka e le ea bohlokoa. Ke efe? Ke mosebetsi oo a neng a o etsa ha a le lefatšeng.

6, 7. Litalenta li emela eng?

⁶ Jesu o ne a nka mosebetsi oa boboleli e le oa bohlokoa. Ka lebaka la mosebetsi ona, batho ba bangata e ile ea e-ba barutuoa ba hae. (Bala Luka 4:43.) Empa o ne a tseba hore ho na le mosebetsi o mongata o lokelang ho etsoa le hore batho ba bangata ba tla  amohela litaba tse molemo. Ha e le hantle o ile a re ho barutuoa ba hae: “Phahamisang mahlo ’me le talime masimo, hore a soeufetse bakeng sa kotulo.” (Johanne 4:35-38) Sehoai se hloahloa se ke ke sa siea tšimo e loketseng ho kotuloa. Jesu o ne a e-na le boikutlo bo tšoanang. Kahoo, pele a khutlela leholimong, o ile a laela balateli ba hae a re: “E-eang ’me le etse batho ba lichaba tsohle barutuoa.” (Matheu 28:18-20) Ka ho etsa joalo, Jesu o ile a fa balateli ba hae letlotlo la bohlokoa, e leng mosebetsi oa boboleli.—2 Bakorinthe 4:7.

⁷ Feela joaloka monna ea ileng a fa makhoba a hae chelete, Jesu le eena o ile a fa balateli ba hae ba tlotsitsoeng mosebetsi oa ho etsa barutuoa. (Matheu 25:14) Kahoo, litalenta li emela mosebetsi oa boboleli le oa ho etsa barutuoa.

8. Le hoja makhoba a ne a fuoe chelete e sa lekaneng, monghali oa ’ona o ne a lebeletse’ng?

⁸ Jesu o re monghali o ile a fa lekhoba la pele litalenta tse hlano, la bobeli tse peli ’me la boraro e le ’ngoe. (Matheu 25:15) Monghali o ile a fa makhoba chelete e sa lekaneng, empa o ne a lebeletse hore kaofela a sebetse ka thata hore a mo etsetse phaello. Ka ho tšoanang, Jesu le eena o lebeletse hore balateli ba hae ba tlotsitsoeng ba etse sohle se matleng a bona mosebetsing oa boboleli. (Matheu 22:37; Bakolose 3:23) Ka Pentekonta ea 33 C.E., balateli  ba Jesu ba ile ba qala ho etsa batho ba lichaba tsohle barutuoa. Ha re bala buka ea Bibele ea Liketso, re bona ka ho hlaka kamoo ba neng ba sebetsa ka thata kateng. * (Sheba naletsana.)—Liketso 6:7; 12:24; 19:20.

9. (a) Makhoba a mabeli a tšepahalang a ile a etsa’ng ka chelete, hona re ithuta’ng ho see? (b) Ba nang le tšepo ea ho phela lefatšeng ba lokela ho etsa’ng?

⁹ Makhoba a mabeli a pele, a sebelisitseng chelete ea mong’a ’ona ka bohlale, a emela bara le barali babo rōna ba batlotsuoa ba tšepahalang nakong ea bofelo. Haholo-holo ho tloha ka 1919, esale ba etsa sohle seo ba ka se khonang mosebetsing oa boboleli. Makhoba a pele a mabeli ao ho buuoang ka ’ona papisong a fuoa chelete e sa lekaneng, empa sena ha se bolele hore ho na le lihlopha tse peli tsa batlotsuoa ba tšepahalang. Makhoba ana ka bobeli a sebelitse ka thata ’me a entse phaello. Empa na ke batlotsuoa feela ba lokelang ho sebetsa ka thata mosebetsing oa boboleli le oa ho etsa barutuoa? Che. Papiso ea Jesu ea linku le lipōli e re ruta hore ba nang le tšepo ea ho phela ka ho sa feleng lefatšeng, ba tlameha ho thusa batlotsuoa mosebetsing oa boboleli le hore ba lule ba ba tšehetsa ka botšepehi. Ba nka hore ho thusa batlotsuoa ke tlotla e khōlō. Ka sebele, bahlanka ba Jehova ke “mohlape o le mong,” ’me ba sebetsa ka thata mosebetsing oa boboleli le oa ho etsa barutuoa.—Johanne 10:16.

10. Karolo e ’ngoe ea pontšo e bontšang hore re phela nakong ea bofelo ke efe?

¹⁰ Jesu o lebeletse hore balateli bohle ba hae ba sebetse ka thata ho etsa  barutuoa ba eketsehileng. Ke sona seo barutuoa ba hae ba ileng ba se etsa lekholong la pele la lilemo. Empa na balateli ba hae ba etsa mosebetsi oo nakong ee ea bofelo, ha seo Jesu a se buileng papisong ea litalenta se phethahala? Ka sebele, hona joale batho ba bangata ba bolelloa litaba tse molemo ’me e e-ba barutuoa! Kaha balateli bohle ba Jesu ba sebetsa ka thata, selemo le selemo ho kolobetsoa batho ba likete tse makholo. Ebe le bona ba kopanela mosebetsing oa boboleli. Mosebetsi ona oohle le liphello tse ntle tse bang teng, li bontša ka ho hlaka hore mosebetsi oa boboleli ke karolo ea bohlokoa ea pontšo eo Jesu a itseng e tla tšoaea nako ea bofelo. Ha ho pelaelo hore Jesu o thabisoa ke mosebetsi oo balateli ba hae ba o etsang!

11. Re tseba joang hore Jesu o tla tla nakong ea matšoenyeho a maholo?

¹¹ Jesu o ile a re: “Ka mor’a nako e telele mong’a makhoba ao a fihla ’me a lokisa litlaleho le ’ona.” (Matheu 25:19) Monghali e leng Jesu o tla fihla ho elella qetellong ea matšoenyeho a maholo. Re tseba see joang? Boprofeteng ba hae bo ho Matheu khaolo ea 24 le ea 25, Jesu o buile ka makhetlo a mangata hore o oa tla. Ka mohlala, o ile a re batho ba “tla bona Mor’a motho a tla ka maru a leholimo.” Mona ho buuoa ka nakong ea matšoenyeho a maholo ha Jesu a tla be a ahlola batho. O ile a boela a lemosa balateli ba hae ba phelang nakong ea bofelo hore ba lokela ho lebela. O ile a re: “Ha le tsebe hore na Morena oa lōna o tla ka letsatsi lefe,” a boela a re, “Mor’a motho o tla tla ka hora eo le sa e nahaneng.” (Matheu 24:30, 42, 44) Kahoo, papisong ea litalenta Jesu o ne a boetse a bua ka nako eo a tla tla ka eona ho tla ahlola batho le ho felisa lefatše la Satane. *—Sheba naletsana.

12, 13. (a) Monghali o re’ng ho makhoba a mabeli, hona hobane’ng? (b) Batlotsuoa ba fuoa tiiso ea ho qetela neng? (Sheba lebokose le reng, “ Ba Fumanoe ba Tšoaneleha ha ba Shoa.”) (c) Ba ileng ba tšehetsa batlotsuoa ba tla fuoa moputso ofe?

¹² Ha monghali a khutla leetong la hae, o ile a fumana hore lekhoba leo a le fileng litalenta tse hlano le li ekelitse  ka tse ling tse hlano, la tse peli le li ekelitse ka tse ling tse peli. Monghali o ile a re ho lekhoba ka leng: “U entse hantle, lekhoba le molemo le le tšepahalang! U ile ua tšepahala linthong tse seng kae. Ke tla u beha hore u okamele lintho tse ngata.” (Matheu 25:21, 23) Monghali Jesu o tla etsa’ng ha a tla?

¹³ Nakoana pele ho matšoenyeho a maholo, Molimo o tla amohela batlotsuoa ba sebelitseng ka thata ba tla beng ba ntse ba le lefatšeng ka nako eo. Ena e tla be e le tiiso ea ho qetela. (Tšenolo 7:1-3) Kahoo, pele ho Armagedone, Jesu o tla ba putsa ka ho ba nkela leholimong. Empa ho tla etsahala’ng ka ba nang le tšepo ea ho phela lefatšeng ba ileng ba tšehetsa batlotsuoa mosebetsing oa boboleli? Ba tla ahloloa e le linku. ’Me ba tla putsoa ka bophelo lefatšeng tlas’a ’Muso oa Molimo.—Matheu 25:34.

14, 15. Na Jesu o ile a re batlotsuoa ba bangata ba tla ba khopo le ho ba botsoa? Hlalosa.

¹⁴ Papisong ena ho boetse ho buuoa ka lekhoba le ileng la fuoa talenta e le ’ngoe. Ha lea ka la sebelisa talenta eo ho etsa chelete e eketsehileng kapa la e isa bankeng. Ho e-na le hoo, le ile la e epela. Monghali o ile a re lekhoba leo le khopo ebile le botsoa. O ile a le amoha talenta eo ’me a e fa lekhoba la pele. A ntan’o lahlela lekhoba leo le khopo ka ntle “lefifing,” moo le ileng la lla ke ho tsieleha.—Matheu 25:24-30; Luka 19:22, 23.

¹⁵ Ha Jesu a ne a re le leng la makhoba a mararo le khopo ebile le botsoa,  o ne a sa bolele hore karolo e itseng ea batlotsuoa e tla tšoana le lekhoba leo. Re hlokomela sena ha re bapisa papiso ena le tse ling tse peli. Papisong ea lekhoba le tšepahalang le le masene, Jesu o ile a bua ka lekhoba le khopo le neng le hlorisa a mang. Jesu o ne a sa bolele hore karolo e ’ngoe ea lekhoba le tšepahalang le le masene e tla ba khopo. Ho e-na le hoo, o ne a lemosa batlotsuoa hore ba se ke ba tšoana le lekhoba leo le khopo. Hape, papisong ea baroetsana ba leshome Jesu o ile a bua ka baroetsana ba bahlano ba maoatla. O ne a sa bolele hore batlotsuoa ba bang e tla ba maoatla. Ho e-na le hoo, Jesu o ne a ba lemosa ka se tla etsahala haeba ba sa itokise le ho lebela. * (Sheba naletsana.) Ka ho tšoanang, le papisong ea litalenta Jesu o ne a sa re batlotsuoa ba bangata matsatsing a ho qetela ba tla ba khopo le ho ba botsoa. Ho e-na le hoo, o ne a lemosa batlotsuoa hore ba se ke ba tšoana le lekhoba le khopo, empa ba tsoele pele ho sebetsa ka thata mosebetsing oa boboleli.—Matheu 25:16.

16. (a) Re ithuta lintlha life tse peli papisong ea litalenta? (b) Sehlooho see se re thusitse joang ho utloisisa papiso ea litalenta? (Sheba lebokose le reng, “ Re Lokela ho Utloisisa Papiso ea Litalenta Joang?”)

¹⁶ Re ithuta lintlha life tse peli papisong ea litalenta? Ntlha ea pele, Jesu o ile a fa barutuoa ba hae ba tlotsitsoeng letlotlo la bohlokoa e leng mosebetsi oa ho bolela le ho etsa barutuoa. Ea bobeli, Jesu o lebeletse hore kaofela ha rōna re sebetse ka thata mosebetsing oa boboleli. Haeba re mamella ka botšepehi mosebetsing ona ’me re lula re ikokobelletsa Jesu le ho tšepahala ho eena, re ka kholiseha hore o tla re putsa.—Matheu 25:21, 23, 34.