Ke ne ke le lilemo li leshome ka 1985 ha bana ba tsoang Cambodia ba fihla sekolong seo ke neng ke kena ho sona Columbus, Ohio, U.S.A. Moshemane e mong o ne a tseba mantsoe a seng makae feela a Senyesemane. O ile a mpontša ka litšoantšo kamoo batho ba neng ba hlokofatsoa le ho bolaoa ka sehlōhō kateng le hore na ba bang ba ile ba pholoha joang. Ke ne ke lla bosiu ha ke nahana ka bona. Ke ne ke batla ho ba bolella ka tšepo ea Paradeise le tsoho ea bafu, empa ba ne ba sa tsebe puo ea ka. Le hoja ke ne ke sa le moshanyana, ke ile ka etsa qeto ea ho ithuta Secambodia e le hore nka bolella liithuti-’moho le ’na ka Jehova. Ke ne ke sa tsebe hore na qeto eo e tla ama bophelo ba ka joang.

Ho ithuta Secambodia e ne e se papali. Ka makhetlo a mabeli ke ile ka etsa qeto ea ho tlohela, empa Jehova a nkhothatsa a sebelisa batsoali ba ka. Ka mor’a nako, matichere le bana bao ke neng ke kena sekolo le bona, ba ile ba mphehella hore ke batle mosebetsi o tla mpatala hantle. Empa ke ne ke batla ho ba pula-maliboho, kahoo e le hore ke finyelle pakane ea ka, ke ile ka khetha lithuto tsa sekolo tse neng li tla nthusa ho fumana mosebetsi oa nakoana. Ha sekolo se tsoa, ke ne ke tloaetse ho ea tšimong le bo-pula-maliboho. Hape ke ile ka ithaopela ho ruta bana ba neng ba ithuta Senyesemane ’me sena sa nthusa haholo hamorao.

Ha ke le lilemo li 16, ke ile ka utloela ka sehlopha sa bahoeletsi ba buang Secambodia se neng se le Long Beach, California, U.S.A. Ke ile ka etela moo ’me ka ithuta ho bala Secambodia. Hang ha ke qeta sekolong, ke ile ka bula maliboho ’me ka tsoela pele ke pakela batho ba buang Secambodia ba neng ba lula motseng oa heso. Ha ke le lilemo li 18, ke ile ka nahana ho fallela Cambodia. Le hoja ka nako eo e ne e ntse e le sebaka se kotsi, ke ne ke tseba hore ho na le batho ba seng bakae ho ba limilione tse leshome ba lulang teng ba kileng ba utloa litaba tse molemo tsa ’Muso. Ka nako eo, ho ne ho e-na le phutheho e le ’ngoe feela e nang le bahoeletsi ba 13 naheng eo. Ke ile ka etela Cambodia ka lekhetlo la pele ha ke le lilemo li 19. Lilemo tse peli hamorao, ke ile ka khetha ho fallela moo. Ke ile ka fumana mosebetsi oa nakoana oa ho fetolela le ho ruta Senyesemane. Ka mor’a nako, ke ile ka nyala mosali ea nang le lipakane tse tšoanang le tsa ka. Re ile ra thabela ho thusa batho ba bangata ba Cambodia hore ba inehele ho Molimo.

Jehova o mphile seo ‘pelo ea ka e se labalabelang.’ (Pes. 37:4) Ha ho na mosebetsi o khotsofatsang ho feta oa ho etsa barutuoa. Ka lilemo tsena tse 16 tseo ke li qetileng ke le Cambodia, sehlopha sane se senyenyane sa bahlanka ba Jehova ba 13 e se e le liphutheho tse 12 le lihlopha tse ’nè tse ka thōko!—Joalokaha ho boletse Jason Blackwell.