Ke Hobane’ng ha U Lokela ho Boloka Nako?

HO BOLOKA nako ha ho bonolo kamehla. Lintho tse ling tse ka re sitisang ho boloka nako e ka ’na ea e-ba ho tsamaea sebaka se selelele, sephethephethe le ho ba maphathaphathe. Leha ho le joalo, ho boloka nako ke ntho ea bohlokoa. Ka mohlala, hangata batho ba nka hore motho ea bolokang nako mosebetsing oa tšepahala ebile o khothetse. Ka lehlakoreng le leng, motho ea fihlang ka mor’a nako a ka ama mosebetsi oa batho ba bang le boleng ba lihlahisoa hammoho le litšebeletso. Ho siuoa ke nako ho ka etsa hore seithuti se fosoe ke litlelase tse itseng ha ba ha sitisa le tsoelo-pele ea sona ea ho ithuta. Ho siuoa ke nako ea ho bona ngaka ho ka ama thuso eo motho a e fuoang.

Leha ho le joalo, libakeng tse ling ho boloka nako ha ho nkoe e le ntho ea bohlokoa hakaalo. Libakeng tse joalo, re ka qetella re tloaetse ho siuoa ke nako. Haeba ho joalo, ke habohlokoa hore re itloaetse ho boloka nako. Ha re utloisisa hore ho boloka nako ke ntho ea bohlokoa, ka sebele sena se tla re thusa hore re e boloke. A mang a mabaka a hore re boloke nako ke afe? Ke eng e ka re thusang hore re boloke nako? Hona re ka lebella ho fumana melemo efe ha re boloka nako?

Jehova ke Molimo ea Bolokang Nako

Lebaka le ka sehloohong leo re batlang ho boloka nako ka lona ke hore re batla ho etsisa Molimo eo re mo rapelang. (Baef. 5:1) Jehova o beha mohlala o babatsehang oa ho boloka nako. Ha ho mohla a siuoang ke nako. O latela kemiso ea hae ka hloko ha a phethahatsa  merero ea hae. Ka mohlala, ha Jehova a ne a rera ho felisa batho ba khopo ka moroallo, o ile a re ho Noe: “Iketsetse areka ka lehong la sefate se ntšang boroku.” Ha nako ea bofelo e ntse e atamela, Jehova o ile a bolella Noe hore a kene ka arekeng eaba o re ho eena: “Ho setse matsatsi a supileng feela ’me ke tla nesa pula holim’a lefatše ka matsatsi a mashome a mane le masiu a mashome a mane; ke tla felisa ntho e ’ngoe le e ’ngoe e phelang eo ke e entseng holim’a lefatše.” Joale ka nako e nepahetseng, e leng “matsatsi a supileng hamorao metsi a moroallo [a ile] a tšolohela lefatšeng.” (Gen. 6:14; 7:4, 10) Nahana hore na ho ka be ho ile ha etsahala’ng ka Noe le lelapa la hae hoja ba se ke ba kena ka arekeng ka nako. Ba ne ba tšoanetse ho boloka nako joaloka Molimo eo ba neng ba mo rapela.

Lilemo tse ka bang 450 ka mor’a Moroallo, Jehova o ile a bolella mopatriareka Abrahama hore o ne a tla ba le mora eo Peō e tšepisitsoeng e neng e tla tsoa ho eena. (Gen. 17:15-17) Molimo o ile a bolela hore Isaka o ne a tla tsoaloa “selemong se tlang ka nako ena e behiloeng.” Na seo se ile sa etsahala? Mangolo a re: “Sara a ima a ntan’o tsoalla Abrahama mora botsofaling  ba hae ka nako e behiloeng eo Molimo a mo boleletseng eona.”—Gen. 17:21; 21:2.

Bibele e na le mehlala e mengata e bontšang hore Molimo o boloka nako. (Jer. 25:11-13; Dan. 4:20-25; 9:25) Bibele e re bolella hore re lule re lebeletse letsatsi la Jehova la kahlolo le tlang. Esita leha batho ba ka bona eka lea “lieha,” re tiisetsoa hore ‘le ke ke la siuoa ke nako.’—Hab. 2:3.

Ho Boloka Nako ke Habohlokoa Borapeling

Banna bohle ba Baiseraele ba ne ba lokela hore ba be teng le hore ba fihle ka nako sebakeng se neng se lokiselitsoe “mekete e bang ka linako tse itseng ea Jehova.” (Lev. 23:2, 4) Molimo o ne a boetse a behile linako tseo mahlabelo a itseng a neng a lokela ho nyeheloa ka tsona. (Ex. 29:38, 39; Lev. 23:37, 38) Na see ha se bontše hore Molimo o batla hore bahlanka ba hae ba boloke nako borapeling ba bona?

Lekholong la pele la lilemo, ha moapostola Pauluse a ne a laea Bakorinthe mabapi le kamoo liboka tsa Bokreste li lokelang ho tšoaroa kateng, o ile a ba phehella a re: “Lintho tsohle li ke li etsahale ka mokhoa o hlomphehang le ka tlhophiso.” (1 Bakor. 14:40) Kahoo, liboka tsa Bakreste tsa borapeli li ne li lokela ho qala ka nako e behiloeng. Maikutlo a Jehova ka ho boloka nako ha aa fetoha. (Mal. 3:6) Ebe joale re ka nka mehato efe e le hore re fihle ka nako libokeng tsee tsa Bokreste?

Se ka re Thusang Hore re Boloke Nako

Ba bang ba fumane hore ho hlophisa lintho esale pele ho ba thusa haholo. (Liprov. 21:5) Ka mohlala, haeba ho tla re nka nako ho ea fihla sebakeng se itseng ka nako e behiloeng, na e ka ba hantle hore re tlohe ka nako eo re tla fihla ka motsotso oa ho qetela? Na e ke ke ea e-ba hantle hore re tlohe pelenyana ho nako e le hore haeba ho ka ba le “ketsahalo e sa lebelloang,” re se ke ra siuoa ke nako? (Moek. 9:11) Mohlankana e mong ea bolokang nako ea bitsoang José * o re: “Ntho e ’ngoe e ka thusang mang kapa mang hore a fihle ka nako ke hore a tsebe hantle hore na leeto la hae le tla nka nako e kae.”

Ho ka ’na ha hlokahala hore ba bang ba itokisetse hore ba tlohe mosebetsing pelenyana e le hore ba tle ba be le nako e ntle ea ho fihla libokeng tsa Bokreste. Mora e mong oabo rōna oa Ethiopia o ile a etsa sena ha a hlokomela hore ka lebaka la ho sebetsa lichifi, o ne a tla fihla libokeng tsa phutheho metsotso e 45 ka mor’a nako. O ile a lokisetsa hore mosebetsi-’moho le eena a fihle mosebetsing pele ho nako e le hore a mo lokolle mantsiboeeng a liboka. Mor’abo rōna eena o ne a tla sebeletsa mosebetsi-’moho le eena chifi ea lihora tse supileng.

Haeba re e-na le bana ba banyenyane, ho fihla ka nako libokeng ke phephetso e khethehileng. Boikarabelo ba ho lokisa bana bo atisa ho oela ho ’mè, empa litho tse ling tsa lelapa li ka mo thusa ebile li lokela ho mo thusa. ’Mè e mong oa Mexico ea bitsoang Esperanza o ile a hōlisa bana ba robeli a le mong. Hona joale e monyenyane o lilemo li 5 ’me e moholo o lilemo li 23. Esperanza o hlalosa hore na lelapa la hae le khona joang hore le boloke nako, o re: “Barali ba ka ba baholo ba thusa ba banyenyane hore ba itokise. Sena se mpha nako ea hore ke qete mosebetsi oa ka tlung le hore ke itokisetse ho ea libokeng ka nako e behiloeng.” Lelapa lena le na le nako e behiloeng ea ho tloha lapeng, ’me bohle baa sebelisana hore ho be joalo.

Rua Molemo oa ho Boloka Nako Libokeng Tsa Bokreste

Ha re nahana ka melemo eo re e fumanang ha re fihla ka nako libokeng tsa Bokreste, sena se ka matlafatsa takatso ea rōna le qeto ea rōna ea hore re etse sohle seo re ka se khonang hore re boloke nako. Moroetsana e mong ea bitsoang Sandra, ea itloaelitseng ho fihla ka nako libokeng, o re: “Seo ke se ratang ka ho fihla pele ho nako ke hore ke ba le nako ea hore ke lumelise bara le barali beso, ke bue le bona ke be ke ba tsebe hamolemo.” Ha re fihla pele ho nako Holong ea ’Muso, re ka rua molemo oa ho utloa  kamoo ba bang ba mameletseng kateng le kamoo ba entseng tšebeletso ka botšepehi. Ha re e-ba teng libokeng ’me re qoqa ka lintho tse matlafatsang, re ka boela ra khothatsa bara le barali babo rōna, ’me ra ba ‘susumelletsa leratong le mesebetsing e metle.’—Baheb. 10:24, 25.

Pina le thapelo eo seboka ka seng sa Bokreste se qaloang ka eona, ke karolo ea bohlokoa ea borapeli ba rōna. (Pes. 149:1) Lipina tsa rōna li rorisa Jehova, li re hopotsa litšobotsi tseo re lokelang ho ba le tsona ebile li re khothalletsa ho kopanela ka thabo tšebeletsong. Thapelo e qalang eona e phetha karolo efe? Mehleng ea boholo-holo, Jehova o ile a re tempele ke “ntlo [ea hae] ea thapelo.” (Esa. 56:7) Kajeno, re bokana ka morero oa ho rapela Molimo libokeng tsa rōna. Thapelo e qalang hase feela kōpo ea hore Jehova a re tataise le hore a re fe moea o halalelang empa e boetse e lokisa likelello le lipelo tsa rōna e le hore li amohele boitsebiso bo tla tšohloa. Re lokela ho ikemisetsa hore re fihle ka nako libokeng tsa rōna e le hore re be teng ha ho binoa pina e bulang le ha ho rapeloa.

Ha Helen ea lilemo li 23 a bolela lebaka la hore a fihle pele ho nako libokeng, o re: “Ke nahana hore ke tsela ea hore ke bontše lerato leo ke ratang Jehova ka lona, kaha ke eena ea lokisetsang boitsebiso bohle bo tšohloang, hammoho le lipina le thapelo.” Na le rōna ha rea lokela ho nka litaba ka tsela eo? Ka sebele re lokela ho etsa joalo. Kahoo, a re loaneleng ho itloaetsa ho boloka nako linthong tsohle tseo re li etsang, haholo-holo tse amanang le tsela eo re rapelang Molimo oa ’nete ka eona.

[Mongolo o botlaaseng ba leqephe]

[Setšoantšo se leqepheng la 26]

Lokisetsa hantle esale pele

[Setšoantšo se leqepheng la 26]

Iphe nako ea haeba ho ka hlaha ‘ketsahalo e sa lebelloang’

[Litšoantšo tse leqepheng la 26]

Fumana melemo ea ho fihla pele ho nako libokeng