Boko bo khona ho re thusa hore re bone lintho tse ntle le hoja re sa utloisise hore na bo etsa sena joang. Bibele ha e re hlalosetse hore na bo etsa sena joang, empa e re re khona ho bona botle hobane Molimo o re entse ka setšoantšo sa hae. (Genese 1:27; Moeklesia 3:11) O boetse o entse ’mele oa motho o rarahaneng, a o etsa ka tsela e khahlehang ’me a etsa hore o sebetse ka tsela e babatsehang. Ke kahoo mongoli oa lipina oa mehleng ea khale a ileng a re: “Ke tla u roka hobane ka tsela e tšosang ke entsoe ka mokhoa o hlollang.”—Pesaleme ea 139:14.

Leha ho le joalo, mehleng ena batho ba na le maikutlo a fosahetseng ka botle, e leng ntho e khothaletsoang ke babapatsi le mecha ea phatlalatso. Buka e ’ngoe e buang ka botle e re liphuputso tse entsoeng linaheng tse ruileng “li bontša hore esita leha motho a e-na le botho bo botle, ha a ikutloe hantle haeba a sa shebahale hantle. O ikutloa hantle hafeela a le motle.” Leha ho le joalo, ho nahana ka tsela eo ho ka etsa hore motho a se ke a hlokomela ntho e ’ngoe ea bohlokoa, e leng pelo ea motho kapa botho ba hae.—1 Samuele 16:7.

Ha se feela hore ho bapatsoa batho ba batle, empa ho boetse ho bapatsoa ’mele e metle, haholo-holo ea basali. Tlaleho e entsoeng ke Mokhatlo oa Litsebi Tsa Kelello oa Amerika ka 2007 e re basali ba bapatsoa ka lebaka la ’mele ea bona mecheng e mengata ea phatlalatso. Bibele e re khothalletsa hore re qobe mekhoa e joalo ’me lena ke lebaka le utloahalang.—Bakolose 3:5, 6.

“Le se ke la lumella mokhabo oa lōna hore e be oa ho lohuoa ha moriri ha ka ntle . . . , empa e ke e be motho ea ka sephiring oa pelo ka seaparo se ke keng sa bola sa moea o thōtseng le o bonolo, oo e leng oa bohlokoa haholo mahlong a Molimo.”—1 Petrose 3:3, 4.

Ha batho ba bang ba bua ka botle ba re: “Haeba u na le ’mele o motle, etsa hore batho ba o bone!” Tlaleho e ’ngoe ea Mokhatlo oa Litsebi Tsa Kelello oa Amerika e re libakeng tseo batho ba teng ba nang le maikutlo ao, bana ba banana ba nahana hore “ba lokela ho thabisa batho ba bang ka tsela eo ba shebahalang ka eona.” Ho ba le maikutlo a joalo ho ka ba kotsi. Ha e  le hantle, mokhatlo ona o re ho ba le maikutlo a joalo ke hona ho baketseng batho mathata a kang ho tšoenyeha, ho inyonya, ho ja haholo kapa ho se je hantle, ho se itšepe le ho ba le khatello ea maikutlo.

“Tlosa matšoenyeho pelong ea hao, ’me u qobe tlokotsi ’meleng oa hao; etsoe bocha le qaleho ea bophelo ke lefeela.”—Moeklesia 11:10.

Bibele e amahanya “ho hlaphoheloa kelellong” le boikokobetso. (1 Timothea 2:9) Nahana ka sena: Batho ba ikokobelitseng ha ba iketse seo ba seng sona, ha ba amehe haholo ka tsela eo ba shebahalang ka eona, empa ba na le maikutlo a nepahetseng ka tsela eo ba leng ka eona. Ba boetse ba nahanela maikutlo a batho ba bang, kahoo batho baa ba rata ebile baa ba hlompha. Taba ea bohlokoa ka ho fetisisa ke hore Molimo oa ba rata. (Mikea 6:8) Ho feta moo, ba ka fumana metsoalle le balekane ba sa ba rateng hobane feela ba le batle empa hobane ba batla ho ba le kamano e ntle le bona.

Ke kahoo Bibele e re khothalletsang hore re shebe botho ba motho, e leng “motho ea ka sephiring oa pelo.” (1 Petrose 3:3, 4) Botle ba motho bo ka fela empa botho ba hae bo botle bo tla lula bo le teng. Ha e le hantle, boa ntlafala ha nako e ntse e e-ea. Liproverbia 16:31 e re: “Hlooho e putsoa ke moqhaka oa botle ha e fumanoa tseleng ea ho loka.” Kahoo, batho ba mamelang keletso ea bohlokoa ea Bibele ba tla fumana thabo, ba hlomphuoe ke batho ’me ba tsebe hore na botle ba sebele ke eng, ho sa tsotellehe hore na ba baholo kapa ba banyenyane.

“Khahleho e ka ’na ea thetsa, ’me botle e ka ’na ea e-ba lefeela; empa mosali ea tšabang Jehova ke eena ea iphumanelang thoriso.”—Liproverbia 31:30.