1, 2. (a) Ke hobane’ng ha re lokela ho ba ka lehlakoreng la Jehova? (b) Re tla ithuta’ng sehloohong see?

KE TABA e utloahalang hore re lule re le haufi le Jehova kaha ha ho motho ea matla, ea bohlale le ea lerato joaloka eena. Ke mang ea sa batleng ho ba ka lehlakoreng la Jehova? (Pes. 96:4-6) Empa ho na le bahlanka ba bang ba Jehova ba tsilatsilang ha ba tlameha ho ba ka lehlakoreng la hae.

² Sehloohong sena re tla ithuta ka batho ba ileng ba e-ba ka lehlakoreng la Jehova, ha ka nako e tšoanang ba ile ba etsa lintho tse sa mo khahliseng. Ho na le lintho tseo re ka ithutang tsona ho bona tse ka re thusang hore re lule re tšepahalla Jehova.

3. (a) Ke hobane’ng ha Jehova a ile a eletsa Kaine? (b) Jehova o ile a re’ng ho eena?

³ Mohlala, nahana ka Kaine. Le hoja a sa ka a rapela melimo esele, Jehova o ne a sa amohele borapeli ba hae. Bokhopo bo ile ba hola pelong ea hae. (1 Joh. 3:12) Kahoo, Jehova o ile a re ho eena: “Haeba u fetoha hore u etse se molemo, na ho  phahamisoa ho ke ke ha e-ba teng? Empa haeba u sa fetohe hore u etse se molemo, sebe se laletse monyako, ebile sea u lakatsa; na u tla se laola?” (Gen. 4:6, 7) Ha e le hantle ha Jehova a ne a bua mantsoe ao, o ne a re: “Haeba u baka ’me u ema ka lehlakoreng la ka, le ’na ke tla ba ka lehlakoreng la hao.”

4. Kaine o ile a etsa’ng ha a fuoa monyetla oa ho ba ka lehlakoreng la Jehova?

⁴ Jehova o ne a tla amohela Kaine haeba a ne a ka lokisa tsela eo a nahanang ka eona. Empa Kaine ha aa ka a mamela. Kaha o ne a lula a nahana ka lintho tse fosahetseng a bile a ichebile boeena, o ile a qetella a entse sebe. (Jak. 1:14, 15) Mohlomong ha Kaine a sa le mocha, ha ho mohla a neng a nahana hore a ka hanyetsa Jehova. Empa ka mor’a nako, o ile a rabela eaba o bolaea moena’e.

5. Ke menahano efe e ka etsang hore Jehova a se ke a re amohela?

⁵ Mehleng ena, Mokreste a ka etsa lintho tse fosahetseng joaloka Kaine le haeba a ipolela hore o rapela Jehova. (Juda 11) Mohlala, a ka ba le menahano e litšila, a honohela batho ba bang kapa a hloea Mokreste-’moho le eena. (1 Joh. 2:15-17; 3:15) Menahano e joalo e ka etsa hore motho a etse sebe. A ka etsa lintho tse joalo empa a ntse a e-ea libokeng le tšimong. Batho ba bang ba ka ’na ba se ke ba ela hloko menahano e joalo, empa Jehova eena o bona lintho tsohle ebile o bona batho ba seng ka lehlakoreng la hae.—Bala Jeremia 17:9, 10.

6. Jehova o re thusa joang hore re hlole bofokoli ba rona?

⁶ Leha ho le joalo, Jehova ha a potlakele ho re lahla. Ha Jehova a hlokomela hore re suthela hole le eena, o re: “Khutlelang ho ’na, ’me ke tla khutlela ho lōna.” (Mal. 3:7) Jehova oa utloisisa hore re na le bofokoli boo re ntseng re loanela ho bo hlola. Empa o batla hore re hlole bobe. (Esa. 55:7) Haeba re etsa joalo, o tla re thusa hore re matlafatse tumelo ea rona ’me a re fe matla a ho hlola bofokoli ba rona.—Gen. 4:7.

7. Ho tlile joang hore Solomone a se hlole a e-ba le kamano e ntle le Jehova?

⁷ Re ka ithuta lintho tse ngata ho Morena Solomone. Ha a sa le mocha, o ne a e-na le kamano e ntle le Jehova. Jehova o ile a mo fa bohlale a ba a mo fa mosebetsi oa bohlokoa oa ho haha tempele e ntle Jerusalema. Empa Solomone ha ea ka ea hlola e e-ba motsoalle oa Jehova. (1 Mar. 3:12; 11:1, 2) Molao oa Molimo o ne o sa lumelle morena oa Moheberu hore a ‘ikekeletse basali, e le hore pelo ea hae e se ke ea kheloha.’ (Deut. 17:17) Empa Solomone ha aa ka a o mamela kaha o ile a ba le basali ba 700 le lirethe tse 300. (1 Mar. 11:3) Boholo ba basali ba hae e ne e se Baiseraele ’me ba ne ba rapela melimo ea bohata. Kahoo, Solomone o ne a tlotse molao oa Molimo kaha o ne a nyetse basali ba sa rapeleng Jehova.—Deut. 7:3, 4.

8. Solomone o ile a utloisa Jehova bohloko joang?

⁸ Butle-butle Solomone o ile a furalla Jehova eaba o qetella a entse phoso e tebileng. O ile a haha aletare bakeng sa molimotsana Ashtorethe hammoho le molimo Kemoshe. O ne a rapela melimo ena hammoho le basali ba hae. Har’a libaka tsohle tseo a neng a ka haha lialetare tsena ho tsona, o ile a khetha ho li haha thabeng e neng e le pel’a Jerusalema e leng moo a neng a hahetse Jehova tempele teng. (1 Mar. 11:5-8; 2 Mar. 23:13) Mohlomong Solomone o ile a ithetsa ka hore hafeela a ntse a etsa mahlabelo tempeleng, Jehova o tla tlolisa liphoso tsa hae mahlo.

9. Ho ile ha etsahala’ng ka mor’a hore Solomone a hlolehe ho mamela keletso ea Jehova?

 ⁹ Ha ho mohla Jehova a iphapanyetsang libe. Bibele e re: “Jehova a tukela Solomone ka bohale, hobane pelo ea hae e ne e sekametse hōle le Jehova . . . , ea hlahileng ho eena habeli. Mabapi le ntho ena a mo laela hore a se ke a latela melimo e meng; empa o ne a sa ka a boloka seo Jehova a se laetseng.” Ka lebaka leo, Molimo ha aa ka a hlola a mo tšehetsa le ho mo amohela. Majalefa a ’muso oa Solomone ha aa ka a busa Iseraele eohle ’me ka lilemo tse makholo a ile a tobana le mathata a boima.—1 Mar. 11:9-13.

10. Ke eng e ka senyang kamano ea rona le Jehova?

¹⁰ Tlalehong ea Solomone, re hlokometse hore e ’ngoe ea lintho tse ka senyang kamano ea rona le Molimo ke ho tloaelana le batho ba sa hlompheng melao ea hae kapa ba sa e utloisiseng. Ba bang ba kopanela le phutheho empa butle-butle kamano ea bona le Jehova e ntse e senyeha. Ba bang ke litho tsa lelapa, baahisani, basebetsi-’moho le rona kapa batho ba kenang sekolo le rona bao e seng barapeli ba Jehova. Haeba batho ba haufi le rona ba sa hlomphe melao ea Jehova, ba ka etsa hore le rona re qetelle re se na kamano e ntle le eena.

11. Re ka thusoa ke’ng ho khetha metsoalle?

¹¹ Bala 1 Bakorinthe 15:33. Ka kakaretso, batho ba bangata ba na le makhabane. Hape, ha se kamehla batho bao e seng Lipaki ba etsang lintho tse mpe. Haeba u tloaelane le batho ba joalo, na u nahana hore ho nepahetse ho tloaelana le bona? Na ba u susumelletsa hore u be le kamano e ntle le Jehova? Ke lintho life tseo ba li nkang e le tsa bohlokoa? Mohlala, na ba lula ba bua ka feshene, chelete, lisebelisoa tsa morao-rao tsa theknoloji, boikhathollo le lintho tse joalo? Na ba lula ba bua hampe ka batho ba bang le ho etsa mesoaso e nyonyehang? Jesu o ile a re: “Molomo o bua ho tsoa ho se tletseng pelong.” (Mat. 12:34) Haeba u hlokomela hore metsoalle ea hao e u sitisa hore u be ka lehlakoreng la Jehova, nka bohato. Fokotsa nako eo u e qetang u e-na le bona kapa u khaotse ho ba motsoalle oa bona haeba ho hlokahala.—Liprov. 13:20.

12. (a) Matla a Jehova a ile a bonahala joang ka mor’a hore Baiseraele ba tlohe Egepeta? (b) Baiseraele ba ile ba arabela joang tabeng ee?

¹² Re ka boela ra ithuta ho Baiseraele ka mor’a hore ba lokolloe Egepeta. Batho ba ile ba bokana ka pel’a thaba ea Sinai. Ha ba le moo, matla a Jehova a ile a bonahala ka ho hlaka. Jehova o ile a etsa hore ho  be le leru le letšo, lialuma, mahalima, mosi le molumo o moholo oa lenaka. (Ex. 19:16-19) A tsebisa Baiseraele hore ke “Molimo ea batlang boinehelo bo khethehileng.” O ile a ba tiisetsa hore o tla tšepahalla batho ba mo ratang ba bile ba boloka litaelo tsa hae. (Bala Exoda 20:1-6.) Ka mantsoe a mang Jehova o ne a re ho batho ba hae: “Haeba le ema ka lehlakoreng la ka, le ’na ke tla ba ka lehlakoreng la lona.” U ne u tla ikutloa joang haeba Jehova a ile a etsa tšepiso e joalo ho uena? Ha ho pelaelo hore u ne u tla ikutloa joaloka Baiseraele. Bibele e re: “Sechaba sohle sa araba ka lentsoe le le leng sa re: ‘Mantsoe ’ohle ao Jehova a a buileng re ikemiselitse ho a phetha.’” (Ex. 24:3) Nakoana ka mor’a moo, ho ile ha etsahala ntho e neng e tla bontša hore na Baiseraele ba fela ba tšepahalla Jehova kapa che.

13. Ke boemo bofe bo neng bo tla bontša hore na Baiseraele ba fela ba tšepahalla Jehova kapa che?

¹³ Baiseraele ba ile ba tšosoa ke leru le letšo, lehalima le lintho tse ling tseo Jehova a ba bontšitseng tsona. Ba ile ba kopa hore kamehla Moshe e be eena ea ba buellang ho Molimo ha ba le Thabeng ea Sinai. (Ex. 20:18-21) Moshe o ile a nka nako e telele a le ka holim’a thaba. Baiseraele ba ne ba bona eka ha ba sa na mang-oe kaha Moshe o ne a le sieo. Mohlomong ba ne ba tšepile boteng ba Moshe ho feta tekano. Ba ile ba qala ho tšoenyeha eaba ba re ho Arone: “Re etsetse molimo ea tla re etella pele, hobane ha e le Moshe enoa, monna ea re eteletseng pele ho tsoa naheng ea Egepeta, ka sebele ha re tsebe se mo etsahaletseng.”—Ex. 32:1, 2.

14. (a) Ke joang Baiseraele ba ileng ba ithetsa? (b) Jehova o ile a etsa’ng?

¹⁴ Baiseraele ba ne ba tseba hore ho rapela litšoantšo ke phoso e tebileng. (Ex. 20:3-5) Empa ka mor’a nako e khutšoanyane, ba ile ba qala ho rapela namane ea khauta. Le hoja ba ne ba sa mamele Jehova, ba ile ba ithetsa eaba ba nahana hore ba ntse ba le ka lehlakoreng la hae. Arone o ile a ba a re borapeli boo ba bona ke “mokete oa Jehova.” Jehova o ile a etsa’ng? O ile a bolella Moshe hore sechaba sa Iseraele se “entse ka mokhoa o senyehileng” hape “se khelohile ka potlako tseleng eo [A] se laetseng hore se tsamaee ka eona.” Jehova o ile a tuka ke bohale eaba o nahana ho felisa sechaba sohle sa Iseraele.—Ex. 32:5-10.

15, 16. Moshe le Arone ba ile ba bontša joang hore ba eme ba tiile ka lehlakoreng la Jehova? (Sheba setšoantšo se qalong.)

¹⁵ Jehova ha aa ka a felisa Baiseraele. Kaha o mohau, o ile a ba fa monyetla oa hore ba bontše hore ba batla ho ba ka lehlakoreng la hae. (Ex. 32:14) Ha Moshe a bona batho ba hoelelitse, ba bina ba bile ba tantšetsa namane ea khauta, o ile a e thuhakanya hore e be phofo. Eaba o re: “Ke mang ea ka lehlakoreng la Jehova? A tle ho ’na! Eaba bara bohle ba Levi ba qala ho phuthehela ho [Moshe].”—Ex. 32:17-20, 26.

¹⁶ Le hoja Arone a ile a etsa namane ea khauta, o ile a baka eaba o ba ka lehlakoreng la Jehova hammoho le Balevi ba bang. Ha baa ka ba ema feela ka lehlakoreng la Jehova empa ba ile ba boela ba ikarola ho batho ba sa bakang. Ba ile ba etsa qeto e nepahetseng hobane letsatsing leo, ba likete ba ile ba shoa ka lebaka la ho rapela litšoantšo. Jehova o ile a tšepisa batho ba ka lehlakoreng la hae hore o tla ba hlohonolofatsa.—Ex. 32:27-29.

17. Mantsoe a Pauluse a buang ka namane ea khauta a re ruta’ng?

¹⁷ Moapostola Pauluse o ile a re’ng ha a bua ka namane ea khauta? O ile a re: “Lintho  tsena e bile mehlala ea rōna, hore re se ke ra . . . ba barapeli ba litšoantšo, joalokaha ba bang ba bona e ile ea e-ba barapeli ba litšoantšo. [Mehlala ea bona e ile ea] ngoloa hore e be temoso ho rōna bao bofelo ba litsamaiso tsa lintho bo ba fihletseng. Ka lebaka leo ea nahanang hore o eme a ke a hlokomele hore a se ke a oa.” (1 Bakor. 10:6, 7, 11, 12) Joalokaha Pauluse a boletse, Bakreste ba ’nete le bona ba ka kenella mekhoeng e sa nepahalang. Esita le ba ntseng ba etsa lintho tse mpe, ba ka ithetsa ba nahana hore ba ntse ba le ka lehlakoreng la Jehova. Empa ho ba motsoalle oa Jehova kapa ho ipolela feela hore rea mo tšepahalla ha se kamehla ho bontšang hore re na le kamano e ntle le eena.—1 Bakor. 10:1-5.

18. (a) Ke’ng e ka senyang kamano ea rona le Jehova? (b) Litla-morao e ka ba life?

¹⁸ Feela joalokaha Baiseraele ba ile ba tšoenyeha ha Moshe a ne a lieha ho theoha thabeng ea Sinai, Bakreste le bona ba ka ’na ba tšoenyeha ha ba bona eka Jehova o lieha ho tlisa lefatše le lecha. Ba ka ’na ba bona eka Jehova o lieha ho phethahatsa litšepiso tseo a li entseng kapa ba bona eka ke litoro tse ke keng tsa phethahala. Haeba re hloleha ho ithiba hore re se ke ra ba le menahano e joalo, re ka iphumana re shebane le maruo le lintho tse ling ho e-na le ho etsa thato ea Jehova. Ha nako e entse e e-ea, kamano ea rona le Jehova e ka senyeha ’me ra qetella re etsa lintho tseo re neng re ke ke ra li etsa ha re e-na le kamano e ntle le eena.

19. Ke taba efe eo re lokelang ho lula re e hopola, hona hobane’ng?

¹⁹ Re lokela ho lula re hopola hore Jehova o batla hore re mo sebeletse ka lipelo tsohle tsa rona. (Ex. 20:5) Re tla be re etsa thato ea Satane haeba re iphapanyetsa melao ea Jehova ’me ho etsa joalo ho ka re kenya mathateng. Ke kahoo Pauluse a ileng a re: “Le ke ke la noa senoelo sa Jehova le senoelo sa bademona; le ke ke la ja ‘tafoleng ea Jehova’ le tafoleng ea bademona.”—1 Bakor. 10:21.

20. Jehova o re thusa joang leha re mo foselitse?

²⁰ Litlaleho tsa Bibele tse buang ka Kaine, Solomone le Baiseraele ha ba le thabeng ea Sinai, li na le ntlha ea bohlokoa eo li tšoanang ka eona. Kaofela ha bona ba ne ba e-na le monyetla oa ho ‘baka, le ho sokoloha.’ (Lik. 3:19) Ha e le hantle Jehova o lieha ho halefela bafosi. O ile a tšoarela Arone ha a baka. Mehleng ena, Jehova a ka re khalemela a sebelisa Bibele, lingoliloeng tse thehiloeng ho eona le Bakreste ’moho le rona. Ha re amohela keletso Jehova o tla re tšoarela.

21. Re lokela ho lula re ikemiselitse ho etsa’ng esita leha re thulana le mathata?

²¹ Ho na le lebaka la hore ebe Jehova o re fa mosa oa hae o sa tšoanelang. (2 Bakor. 6:1) Mosa ona o re thusa “ho hana ho hloka bomolimo le litakatso tsa lefatše.” (Bala Tite 2:11-14.) Hafeela re ntse re phela “har’a tsamaiso ena ea hona joale ea lintho,” re tla thulana le mathata a tla etsa hore re bontše hore na re rata Jehova hakae. E se eka re ka lula re ikemiselitse ho ema ka lehlakoreng la hae kaha ke eena eo re lokelang ho mo tšaba, re mo sebeletse ’me re mo khomarele.—Deut. 10:20.