1, 2. Boemo ba rona bo tšoana le ba mohlankana eo ho builoeng ka eena serapeng sa pele joang?

 NAHANA ka mohlankana ea holetseng lelapeng le ruileng ea ileng a oeloa ke koluoa ea hore batsoali ba hae ba hlokahale. O ile a utloa bohloko bo otlang pelo, empa tsena e ne e le linyane. O ile a fumana hore batsoali ba hae ba kene likolotong tse ngata. Ho e-na le ho ja lefa la bona, o setse le likoloto tse hlokang ho pataloa empa o sitoa ho li patala.

² Boemo ba rona bo tšoana le ba mohlankana enoa. Batsoali ba rona ba pele e leng Adama le Eva, ba ne ba phethahetse ’me ba phela hamonate paradeiseng. (Gen. 1:27; 2:​7-9) Ba ne ba ka phela ka ho sa feleng ba thabile empa lintho li ile tsa fetoha. Ba ile ba lahleheloa ke lehae la bona le letle le monyetla oa ho phela ka ho sa feleng. Ba ne ba tla siela bana ba bona lefa lefe? Bibele e re: “Sebe se ile sa kena lefatšeng ka motho a le mong ’me sa tlisa lefu. Kahoo, lefu la namela ho batho bohle hobane kaofela ba ne ba entse sebe.” (Bar. 5:12) Lefa leo Adama a re sietseng lona, ke sebe se etsang hore ebe qetellong rea shoa. Sebe sena se tšoana le sekoloto se boima seo ho se nang motho ea ka khonang ho se patala.—Pes. 49:8.

 3. Ke hobane’ng ha re ka re libe li tšoana le likoloto?

³ Bibele e tšoantša libe le likoloto. (Mat. 18:​32-35) Ha re etsa sebe ho tšoana le ha eka re kolota Jehova ’me o lebelletse hore re patale sekoloto seo. Haeba Jehova a ne a sa etsa  tokisetso ea hore re tšoareloe libe, re ne re tla lokela ho patala sekoloto seo ka bophelo ba rona.—Bar. 6:​7, 23.

 4. (a) Ke hobane’ng ha baetsalibe bohle ba hloka thuso? (Pesaleme ea 49:​7-9) (b) Ka Bibeleng, lentsoe “sebe” le bolela’ng? (Sheba lebokose le reng “ Sebe.”)

⁴ Na ho ka khoneha hore re fumane bophelo boo Adama le Eva ba bo lahlileng ka boomo? E, empa ha ho matleng a rona hore re bo fumane. (Bala Pesaleme ea 49:​7-9.) Ntle le hore re fumane thuso, re ne re ke ke ra ba le tšepo ea tsoho ea bafu. Ha e le hantle, lefu la rona le ne le tla tšoana le lefu la liphoofolo tseo ho seng mohla li tla tsoha.—Moek. 3:19; 2 Pet. 2:12.

 5. Ntate oa rona ea lerato o re thusitse joang ho re patalla sebe seo re se futsitseng? (Sheba setšoantšo .)

⁵ U nahana hore mohlankana eo re buileng ka eena qalong, o ne a ka ikutloa joang haeba monna ea ruileng a ne a ka ithaopela ho patala likoloto tsohle tsa hae? E tlameha ebe mohlankana enoa o ne a tla ananela mpho ena haholo le ho e amohela. Ka tsela e tšoanang, Ntate oa rona ea lerato Jehova, o re file mpho ena e le hore a patale sebe seo re se futsitseng ho Adama. Ha Jesu a hlalosa taba ena o ile a re: “Molimo o ratile lefatše haholo hoo a ileng a fana ka Mora oa hae ea mong e le hore e mong le e mong ea bontšang hore o lumela ho eena a se ke a timetsoa empa a fumane bophelo bo sa feleng.” (Joh. 3:16) Ho ekelletsa moo, mpho ena e re file monyetla oa hore re ka ba metsoalle ea Jehova hape.

 6. Re tl’o hlahloba eng sehloohong see, hona hobane’ng?

⁶ Re ka rua molemo joang mphong ee e babatsehang e etsang hore re tšoareloe libe? Karabo ea potso ena re e fumana tseleng eo Bibele e sebelisang mantsoe a latelang ka eona, e leng poelano, sehlabelo sa ho tšoareloa libe, se entsoeng, tefo ea topollo, topollo le ho nkoa re lokile. Sehloohong sena re tlo bua ka hore na mantsoe ana a bolela’ng. Ha re ntse re thuisa ka se boleloang ke mantsoe ana, re tla ananela haholoanyane hore ebe Jehova oa tšoarela.

PAKANE: POELANO

 7. (a) Adama le Eva ba ile ba lahleheloa ke eng hape? (b) Ke eng eo re e hlokang joaloka bana ba Adama le Eva? (Baroma 5:​10, 11)

⁷ Ha Adama le Eva ba etsa sebe ka hore ba se ke ba mamela Molimo, ba ile ba lahleheloa ke monyetla oa ho phela ka ho sa feleng. Hape ba ile ba fetoha lira tsa Ntate oa bona Jehova. Adama le Eva e ne e le karolo ea lelapa la Molimo. (Luka 3:38) Empa ka mor’a hore ba se ke ba mo mamela, o ile a ba leleka lelapeng la  hae le pele ba e-ba le bana. (Gen. 3:​23, 24; 4:1) Kahoo, bana ba bona e ne e ke ke ea e-ba karolo ea lelapa la Jehova ho akarelletsa le rona. Kaha re bana ba bona, re hloka ho boelana le Jehova. (Bala Baroma 5:​10, 11.) Ka mantsoe a mang, re lokela ho loanela ho ba metsoalle ea hae. Ho ea ka tlhaloso e ’ngoe, lentsoe la Segerike le sebelisitsoeng mona e le “ho boelana,” le ka bolela “ho ba motsoalle le motho eo e neng e le sera sa hao.” Se thabisang ke hore Jehova o nkile bohato ba ho re thusa e le hore re be metsoalle ea hae. Joang?

TOKISETSO: SEHLABELO SA HO TŠOARELOA LIBE

 8. Jehova o ile a etsa’ng e le hore re be metsoalle ea hae?

⁸ Sehlabelo sa ho tšoareloa libe ke tokisetso eo Jehova a e entseng e le hore batho ba baetsalibe ba ka boela ba e-ba le kamano e ntle le eena. O ile a etsa tokisetso ea hore seo Adama a neng a se lahlile re boele re se fumane. Mangolo a Segerike le ’ona a bua ka tokisetso eo Jehova a e entseng e le hore re ka boela ra ba metsoalle ea hae. (Bar. 3:25) Tokisetso ena e etsa hore re be le khotso le Molimo le hore re be metsoalle ea hae.

 9. Jehova o ile a etsa tokisetso efe e le hore a ka tšoarela libe tsa Baiseraele?

⁹ Jehova o ile a etsa tokisetso ea hore Baiseraele ba tšoareloe libe tsa bona e le hore e ka ba metsoalle ea hae. Tokisetso ena e ne e tšoaroa hanngoe ka selemo ’me e ne e bitsoa Letsatsi la Sehlabelo sa ho Tšoareloa Libe. Ka letsatsi leo, moprista ea phahameng o ne a nyehela liphoofolo bakeng sa sechaba. ’Nete ke hore mahlabelo a liphoofolo a ne a ke ke a hlakola libe tsa batho ka ho felletseng hobane batho ba bohlokoa ho feta liphoofolo. Empa hafeela Baiseraele ba ne ba nyehela mahlabelo ho bontša hore ba bakile e le kannete, e leng ntho eo Jehova a neng a ba laetse hore ba e etse, Jehova o ne a ikemiselitse ho ba tšoarela. (Baheb. 10:​1-4) Ho ekelletsa moo, tokisetso eo le mahlabelo ao Baiseraele ba neng ba lokela ho a etsa, a ne a ba hopotsa hore ke baetsalibe ’me ba hloka tharollo ea moshoelella.

10. Jehova o ile a etsa’ng e le hore a tšoarele batho libe ka ho felletseng?

¹⁰ Jehova o ne a e-na le tharollo ea moshoelella e le hore a tšoarele batho libe. O ile a lumella hore Mora oa hae ea ratoang a ‘fane ka bophelo ba hae e le sehlabelo hanngoe ebile e le la ho qetela hore a jare libe tsa ba bangata.’ (Baheb. 9:28) Jesu o ile a “fana ka bophelo ba hae e le tefo bakeng sa ho lopolla batho ba bangata.” (Mat. 20:28) Tefo ea topollo ke eng?

TEFO: TEFO EA TOPOLLO

11. (a) Ho latela Bibele, tefo ea topollo ke eng? (b) Tefo ea topollo e ne e lokela ho pataloa ke motho ea joang?

¹¹ Ho latela Bibele, tefo ea topollo ke tefo e pataloang ele hore libe tsa rona li tšoareloe le hore re be metsoalle ea Molimo. Ke tefo ea mofuta ofe e neng e lokela ho pataloa e le hore batho ba ka fumana seo Adama a se lahlileng? Hopola hore Adama le Eva ba lahlile bophelo bo phethahetseng le monyetla oa ho phela ka ho sa feleng. Kahoo, tefo ea topollo e neng e lokela ho pataloa e ne e lokela ho lekana le se neng se lahlehile. (1 Tim. 2:6) E ne e ka pataloa ke motho (1) ea phethahetseng, (2) ea neng a ka khona ho phela ka ho sa feleng le (3) ea neng a ikemiselitse ho tela bophelo ba hae bakeng sa rona. Bophelo ba motho ea joalo bo ne bo ka re lopolla sebeng.

12. Ke hobane’ng ha Jesu a ne a tšoaneleha ho re lopolla?

¹² Nahana ka mabaka ana a mararo a etsang hore ebe Jesu o ne a tšoaneleha ho re lopolla. (1) O ne a phethahetse ebile “ha aa ka a etsa sebe.” (1 Pet. 2:22) (2) Ka lebaka leo, o ne a  ka khona ho phela ka ho sa feleng lefatšeng. (3) O ne a ikemiselitse ho re shoela. (Baheb. 10:​9, 10) Kaha Jesu o ne a phethahetse, o ne a tšoana hantle le Adama pele a etsa sebe. (1 Bakor. 15:45) Jesu o ile a khona ho khutlisa seo Adama a se lahlileng ka hore ebe o ile a fana ka bophelo ba hae bakeng sa rona. (Bar. 5:19) Jesu e ile ea e-ba “Adama oa ho qetela.” Ha ho hlokahale hore ho be le motho e mong ea phethahetseng ea ka lefellang seo Adama a se lahlileng hobane Jesu o entse joalo hanngoe ebile “e le la ho qetela.”—Baheb. 7:27; 10:12.

13. Phapang ke efe pakeng tsa tokisetso ea sehlabelo sa ho tšoareloa libe le tefo ea topollo?

¹³ Joale phapang ke efe pakeng tsa tokisetso ea sehlabelo sa ho tšoareloa libe le tefo ea topollo? Tokisetso ea sehlabelo sa ho tšoareloa libe, ke ketso eo Molimo a e etsang e le hore batho ba boele ba be le kamano e ntle le eena. Tefo ea topollo eona, ke tefo e pataloang e le ho etsa hore tokisetso ea sehlabelo sa ho tšoareloa libe e khonehe bakeng sa batho hobane ke baetsalibe. Tefo ena e ile ea pataloa ka hore ho tšolloe mali a bohlokoa a Jesu molemong oa rona.—Baef. 1:7; Baheb. 9:14.

LIPHELLO: TOPOLLO LE HO NKOA RE LOKILE

14. Re tl’o bua ka eng, hona ho etsa joalo ho tla re thusa joang?

¹⁴ Re rua molemo joang tokisetsong ea sehlabelo sa ho tšoareloa libe? Bibele e sebelisa mantsoe a seng makae ho hlakisa melemo ea tokisetso ena. Le hoja tlhaloso ea mantsoe ana e batla e tšoana, lentsoe le leng le le leng le hatisa karolo ea bohlokoa ea tokisetso ea sehlabelo sa ho tšoareloa libe e re thusang hore Jehova a re tšoarele libe. Ha re ntse re hlahloba mantsoe ana, re tla boela re bone hore na a re ama joang.

15, 16. (a) Bibele e re “ho lopolloa” ho bolela’ng? (b) Ho lopolloa sebeng le lefung ho etsa hore re ikutloe joang?

¹⁵ Ka Bibeleng, ho lopolloa ho bolela ho pholosoa nthong e itseng ka lebaka la tefo ea topollo e ileng ea pataloa. Moapostola Petrose o ile a re: “Lea tseba hore ha lea lopolloa ka lintho tse senyehang tse kang silevera le khauta bophelong ba lona bo se nang thuso boo le bo fetiselitsoeng ke baholo-holo ba lona. Le lopollotsoe ka mali a bohlokoa a Kreste a joaloka a konyana e phetseng hantle, e hloekileng.”—1 Pet. 1:​18, 19.

¹⁶ Re lopollotsoe sebeng le lefung ka lebaka la sehlabelo sa Jesu. (Bar. 5:21) Ke ho utloahalang hore re ikutloe re le molato re bile re kolota Jehova le Jesu ka lebaka la ho re lopolla ka mali a bohlokoa a Jesu.—1 Bakor. 15:22.

17, 18. (a) Ho nkoa re lokile ho bolela’ng? (b) Re rua molemo joang ha Jehova a re nka re lokile?

¹⁷ Ho nkoa re lokile ho bolela hore re tšoaretsoe liphoso tsa rona ’me le sekoloto sa rona se hlakotsoe ka ho felletseng. Sena ha se bolele hore Jehova o tlola molao oa hae oa toka. Ha se hore o re nka re lokile hobane re tšoaneleha kapa hona hore o amohela libe tseo re li etsang. Empa Jehova o ikemiselitse ho re tšoarela ha re lumela ho seo eena le Jesu ba se entseng, e leng ho fana ka tefo ea topollo e le hore re ka tšoareloa libe.—Bar. 3:24; Bagal. 2:16.

¹⁸ Re rua molemo joang ha Jehova a re nka re lokile? Ba bang ba nkoang ba lokile ba khetheloa ho ea busa le Kreste leholimong ’me e be bana ba Molimo. (Tite 3:7; 1 Joh. 3:1) Jehova o se a tšoaretse libe tsa bona. Ho joalokaha eka ha baa ka ba etsa libe, kahoo baa tšoaneleha hore e ka ba karolo ea ’Muso oa Molimo. (Bar. 8:​1, 2, 30) Ba bang bona ba nkoang ba lokile ba tla phela lefatšeng ka ho  sa feleng. Jehova o se a ba tšoaretse libe ’me e se e le metsoalle ea hae. (Jak. 2:​21-23) Bongata bo boholo bo tla pholoha Armagedone bo e-na le tšepo ea ho phela ka ho sa feleng. (Joh. 11:26) “Batho ba lokileng” le “ba sa lokang” ba ileng ba hlokahala ba tla tsosoa. (Lik. 24:15; Joh. 5:​28, 29) Qetellong, bahlanka bohle ba Jehova ba mamelang ba lefatšeng ba ‘tla fumana tokoloho joaloka bana ba Molimo.’ (Bar. 8:21) Re tatetse nako eo ka eona re tla beng re le bana ba phethahetseng ba Ntate oa rona Jehova.

19. Boemo ba rona bo ntlafetse joang ka lebaka la seo Jehova le Jesu ba re etselitseng sona? (Sheba lebokose le reng “ Seo Tšoarelo ea Jehova e se Bolelang ho Rona.”)

¹⁹ Boemo ba rona bo ne bo tšoana hantle le ba mohlankana eo ho builoeng ka eena qalong, ea ileng a lahleheloa ke lintho tsohle ’me a sala le sekoloto seo a neng a ke ke a khona ho se patala. Re leboha Jehova ka hore ebe o re thusitse. Boemo ba rona bo fetohile hobane Jehova o ile a etsa tokisetso ea hore re tšoareloe libe le hore Jesu a fane ka bophelo ba hae e le tefo ea topollo. Re lopollotsoe sebeng le lefung hobane re e-na le tumelo ho Jesu Kreste. Ha Jehova a re tšoarela, ho ba joalokaha eka ha rea etsa libe. Leha ho le joalo, ntho ea bohlokoa le ho feta ke hore re ka ba metsoalle ea Ntate oa rona ea leholimong Jehova.

20. Re tl’o ithuta’ng sehloohong se latelang?

²⁰ Re ananela Jehova le Jesu haholo ha re nahanisisa ka seo ba re etselitseng sona. (2 Bakor. 5:15) Re na le tšepo ka lebaka la seo ba re etselitseng sona. Sehloohong se latelang re tl’o ithuta ka mehlala e hlahang ka Bibeleng, e tl’o re thusa ho bona hore ha Jehova a re tšoaretse, ha rea lokela ho ikutloa re ntse re le molato.