Moapostola Pauluse o ile a ngolla Bakreste ba Thesalonika a re: “Mang kapa mang ea sa mameleng litaba tsa lengolo lena, le mo tšoaee.” (2 Bathes. 3:14) Pele re ne re re tataiso ena e lebisitsoe ho baholo. Haeba motho a ne a tsoela pele ho se mamele melao-motheo ea Bibele ka mor’a hore a fuoe keletso ka makhetlo, baholo ba ne ba ka fana ka puo e lemosang phutheho. Ka mor’a moo, bahoeletsi ba ne ba ke ke ba qeta nako le motho eo ea tšoailoeng ntle le ha ba le libokeng kapa tšebeletsong ea tšimo.

Leha ho le joalo, re lokela ho fetola kutloisiso ea rona. Pauluse o ne a re Mokreste ka mong a sebelise keletso ena ho etsa qeto maemong a itseng. Kahoo, ha ho hlokahale hore baholo ba fane ka puo e lemosang phutheho. Ke hobane’ng ha re fetola kutloisiso ea rona? Nahana ka seo Pauluse a neng a bua ka sona ha a tla fana ka keletso ena.

Pauluse o ile a hlokomela hore ba bang ka phuthehong ba ne “ba tsoile taolong.” Ba ne ba sa mamele keletso eo a neng a ba fa eona e thehiloeng Mangolong. Ha a ne a ba etetse, o ile a re ho bona: “Motho ea sa batleng ho sebetsa, le ho ja a se ke a ja.” Leha ho le joalo, ba bang ba ne ba ntse ba sa batle ho sebetsa e le hore ba ka beha bohobe tafoleng, le hoja ba ne ba ka khona ho etsa joalo. Ba ne ba boetse ba sa tsoe litabeng tsa batho ba bang. Bakreste ba ne ba lokela ho tšoara batho bao ba tsoileng taolong joang?—2 Bathes. 3:​6, 10-12.

Pauluse o ile a re: “Le mo tšoaee.” Lentsoe la Segerike le sebelisitsoeng mona le fana ka moelelo oa hore u ele hloko motho ea ka u susumeletsang ho etsa lintho tse fosahetseng. Pauluse o ne a sa bue le baholo feela empa o ne a bua le phutheho kaofela. (2 Bathes. 1:1; 3:6) Kahoo, Mokreste e mong le e mong ea neng a ka hlokomela hore Mokreste-’moho le eena ha a mamele keletso ea Mangolo, o ne a tla khetha ho ‘khaotsa ho tloaelana’ le motho eo ea tsoileng taolong.

Na motho eo o ne a ka tšoaroa joaloka motho ea tlositsoeng ka phuthehong? Che, hobane Pauluse o ile a re: “Le ’ne le mo eletse kaha ke ngoan’abo lona.” Kahoo, Mokreste o ne a ka bua le eena ha ba le libokeng le tšimong empa o ne a ka khetha ho se qete nako le eena ba le boithabisong kapa ba ikhatholla. Hobane’ng? Pauluse o ile a boela a re: “E le hore a ka soaba.” Haeba re khaotsa ho qeta nako le Mokreste ea tšoauoeng, a ka ’na a soabela boitšoaro ba hae ’me a fetola mekhoa ea hae.—2 Bathes. 3:​14, 15.

Bakreste kajeno ba ka tseba joang hore motho ea itseng o lokela ho tšoauoa? Ba lokela ho qala pele ka ho netefatsa hore na kannete motho eo o “tsoile taolong” joalokaha Pauluse a hlalosa. Pauluse o ne a sa bue ka batho ba etsang lintho tseo matsoalo a rona a re hanelang ho li etsa empa li se khahlanong le melao kapa melao-motheo ea Bibele. O ne a boetse a sa bue ka batho ba etsang lintho ka tsela e fapaneng le ea rona. Hape o ne a sa bue ka batho ba ileng ba re utloisa bohloko. Ho e-na le hoo, o ne a bua ka batho ba ileng ba fuoa keletso e thehiloeng Lentsoeng la Molimo ’me ba khetha ho se e mamele.

Ha re lemoha hore Mokreste-’moho ha a mamele keletso e tsoang Lentsoeng la Molimo, a re tla etsa qeto ea ho se qete nako le eena re le boithabisong kapa re ikhatholla. Kaha ena ke qeto ea motho ka mong, ha rea lokela ho bua ka eona le batho ba bang ntle le ba lelapa bao re lulang le bona. Re ntse re ka bua le motho eo ha re le libokeng kapa tšimong. Haeba a ka fetola boitšoaro ba hae, re ka boela ra qeta nako le eena kapa ra tloaelana le eena.