Na u balile lihlooho tse sa tsoa feta tsa Molula-Qhooa ka hloko? Leka ho araba lipotso tse latelang:

Barab’abo rona ba kang balebeli ba potoloho le baholo ba lokela ho etsa’ng ha mokhatlo oa Molimo o ba fa tataiso?

Ba lokela ho potlakela ho mamela tataiso eo. Ba ka ’na ba ipotsa: ‘Na ke matlafatsa balumeli-’moho le ’na tumelong? Am Na ke potlakela ho amohela tataiso eo barab’abo rōna ba etellang pele ba fanang ka eona esita le ho ba tšehetsa?’—w16.11, leq. 11.

Bakreste ba bile botlamuoeng ba Babylona neng?

Ba bile botlamuoeng nakoana ka mor’a lefu la baapostola. Ka nako eo, ho ile ha qaleha sehlopha sa baruti. Kereke e ile ea sebetsa ’moho le ’muso ho pupetsa Bakreste le ho holisa Bokreste ba bohata. Empa batlotsuoa ba ile ba itokolla botlamuoeng ba Babylona e Moholo lilemo tse mashome pele ho 1914.—w16.11, maq. 23-25.

Ke hobane’ng ha re ka re mosebetsi oa Lefèvre d’Étaples e ne e le oa bohlokoa?

Lilemong tsa bo-1520, Lefèvre o ile a fetolella Bibele puong ea Sefora e le hore batho bohle ba khone ho e bala. Tsela eo a neng a hlalosa Mangolo ka eona e ile ea susumetsa Martin Luther, William Tyndale le John Calvin.—wp16.6, maq. 10-12.

“Ho beha kelello moeeng” ho fapane joang le “ho beha kelello nameng”? (Bar. 8:6)

Motho ea behang kelello nameng, o lumella hore bophelo ba hae bo laoloe ke botho ba hae bo sa phethahalang ’me o lula a bua ka lintho tsa nama le ho li etsa. Empa motho ea behang kelello moeeng, o etsa hore ho sebeletsa Jehova le ho etsa thato ea hae e be eona ntho e tlang pele bophelong ba hae. Bophelo ba hae bo susumetsoa ke moea o halalelang. Ho beha kelello nameng ho bolela lefu empa ho beha kelello moeeng ho bolela bophelo le khotso.—w16.12, maq. 15-17.

Re ka etsa’ng hore re fokotse ho tšoenyeha?

Rera ho etsa lintho tseo u ka khonang ho li etsa, u se ke oa lebella mohlolo, iphe nako ea ho phomola, u shebe popo ea Molimo, thabela ho tšeha ’me u ikoetlise.—w16.12, maq. 22-23.

“Enoke o ile a fallisoa e le hore a se ke a bona lefu.” (Heb. 11:5) Joang?

Ho bonahala hore Molimo o ile a etsa hore Enoke a se ke a utloa hore oa shoa.—wp17.1, maq. 12-13.

Ke hobane’ng ha ho ntse ho le bohlokoa ho inyenyefatsa?

Ho inyenyefatsa ho akarelletsa ho ba le maikutlo a nepahetseng ka rona ’me re hlokomele meeli ea rona. Re lokela ho hlokomela kamoo boitšoaro ba rona bo amang batho ba bang kateng le hore re se ke ra iphahamisa.—w17.01, leq. 18.

Ho na le bopaki bofe ba hore Molimo o ne a tataisa barab’abo rona ba Sehlopha se Busang ba mehleng ea baapostola joalokaha a ba tataisa mehleng ee?

Ba ne ba utloisisa Mangolo ka lebaka la thuso ea moea o halalelang. Ba ne ba hlokomela mosebetsi oa boboleli ka thuso ea Jehova ’me ba itšetleha ka Lentsoe la Molimo ha ba fana ka tataiso. Le mehleng ena, ho ntse ho le joalo.—w17.02, maq. 26-28.

Ke lintho life tse re thusang ho bona hore thekollo ke mpho ea bohlokoa?

Ke lintho tsena tse ’nè: Hore na ke mang ea faneng ka eona, lebaka leo e fanoeng ka lona, ke’ng e ileng ea teloa le hore na ho ile ha e-ba le molemo ofe. Re lokela ho nahanisisa ka lintho tseo tse ’nè.—wp17.2, maq. 4-5.

Na Mokreste a ka fetola qeto eo a entseng?

Ke ’nete hore re lokela ho phethahatsa litšepiso tsa rona. Empa ka linako tse ling re ka lokela ho nahana bocha ka qeto eo re e entseng. Molimo o ile a fetola qeto eo a neng a e entse ka batho ba Ninive ka mor’a hore ba bake. Ka linako tse ling, ha re fumana lintlha tse eketsehileng kapa maemo a fetoha, re ka lokela ho fetola liqeto tsa rona.—w17.03, maq. 16-17.

Ke hobane’ng ha ho le kotsi ho seba?

Ho ka mpefatsa litaba le ho feta. Ho sa tsotellehe hore na re nepile kapa che, ha ho mohla ho bua mantsoe a hlabang ho ka lokisang litaba.—w17.04, leq. 21.