KE LITABA TSE MONATE HAKAAKANG! Molimo o re tšepisitse bophelo bo sa feleng hona mona lefatšeng. Empa batho ba bangata ha ba lumele hore re tla phela re sa shoe. Ba re motho e mong le e mong o lokela ho shoa hobane ke tsela eo Molimo a rerileng hore bophelo bo be ka eona. Ba bang bona ba lumela hore re tla phela ka ho sa feleng, empa eseng mona lefatšeng. Ba re re tla phela ka ho sa feleng ha re se re le leholimong. Uena u ka re’ng?

Pele u araba, leka ho ithuta hore na Bibele e re’ng ha e araba lipotso tse kang, tsela eo Molimo a re bopileng ka eona e bontša hore re bopetsoe ho phela nako e kae? Hantle-ntle ke hobane’ng ha a bopile lefatše le batho? Ho tlile joang hore batho ba shoe?

Batho ba fapane hole le lintho tse ling tsohle tseo Molimo a li bopileng. Joang? Bibele ea bontša hore ke batho feela ba bopiloeng “ka setšoantšo sa Molimo.” (Genese 1:26, 27) Taba ee e bolela’ng? E bolela hore batho ba bopiloe ba e-na le makhabane ao Molimo a nang le ’ona a kang lerato le toka.

Hape re bopiloe re e-na le bokhoni ba ho nahana, ba ho etsa liqeto le ba ho khetholla lintho tse nepahetseng ho tse fosahetseng. Re boetse re bopelletsoe le takatso ea ho batla ho tseba Molimo le ho ba metsoalle ea hae. Ke eona ntho e etsang hore re rate lintho tseo Jehova a li bopileng le lintho tse ling tse kang lipina le lithothokiso. Ntho e ntle le ho feta ke hore re na le bokhoni ba ho ba metsoalle ea Molimo. Ke ka lebaka leo re fapaneng hole le lintho tse ling tsohle tseo Jehova a li bopileng.

Ha e le moo Molimo a re bopile re e-na le makhabane aa a ikhethang a bile a re file bokhoni ba ho lula re a ntlafatsa ho ea ho ile, na o ne a ka batla hore re phele lilengoana tse seng kae feela? Hantle-ntle Molimo o re bopile ka tsela ena e le hore re phele lefatšeng re thabile re sa shoe.

Batho ba bang ba re Molimo o ne a sa rera hore re phele lefatšeng re sa shoe. Ba re Molimo o bopetse lefatše hore re phele ho lona ka nakoana hobane a batla ho bona hore na ke bo-mang ba ka phelang leholimong. Empa ho cho joalo ke ho  beha Molimo molato ka mathata a re hlahelang. Leha ho le joalo, Jehova ha se Molimo ea khopo ho hang. Bibele e re ka eena: “Etsoe litsela tsohle tsa hae ke toka. Molimo oa botšepehi, eo ho eena ho se nang ho hloka toka; o lokile ’me o khabane.”—Deuteronoma 32:4.

Ha Bibele e hlalosa hore na ke hobane’ng ha Molimo a bopile lefatše, e re: “Ha e le maholimo, ke maholimo a Jehova, empa lefatše o le file bara ba batho.” (Pesaleme ea 115:16) Molimo o bopile lefatše e le hore re lule re phela ho lona, ebile o re file lintho tsohle tse tla re thusa ho phela re thabile re sa shoe.—Genese 2:8, 9.

“Ha e le maholimo, ke maholimo a Jehova, empa lefatše o le file bara ba batho.”—Pesaleme ea 115:16

Bibele e boetse ea bontša hore na ke hobane’ng ha Molimo a re bopile. O ile a re Adama le Eva ba ‘tlale lefatše ’me ba le buse, ’me ba laole . . . sebōpuoa se seng le se seng se phelang . . . lefatšeng.’ (Genese 1:28) Mosebetsi oo ba neng ba o filoe oa ho etsa lefatše paradeise o ne o le bohlokoa haholo. Adama le Eva le bana bao ba neng ba tla ba le bona, ba ne ba filoe monyetla oa ho phela ba sa shoe lefatšeng, eseng leholimong.

Bibele e bontša hore lengeloi le leng leo hamorao le ileng la bitsoa Satane Diabolose le ile la baka moferefere Edene. Joang?

Satane o ile a etsa hore Adama le Eva e be marabele joaloka eena. O ile a ba thetsa a re Molimo ha a batle ha ba ikhethela hore na ba etse’ng le hore na ba se ke ba etsa’ng. Eaba Adama le Eva ba khetha ho mo mamela ho e-na le ho mamela Molimo. Ka mor’a moo ho ile ha etsahala’ng? Ba ile ba fela ba shoa joalokaha Molimo a ne a ba boleletse. Ba ile ba lahla monyetla oo ba neng ba o filoe oa ho phela Paradeiseng ba sa shoe.—Genese 2:17; 3:1-6; 5:5.

Re ntse re tsoela pele ho shoa ho fihlela lena le holimo ka lebaka la ho se mamele ha Adama le Eva. Bibele e re: “Sebe se ile sa kena lefatšeng ka motho a le mong [Adama] le lefu la kena ka sebe, ’me kahoo lefu la namela ho batho bohle.” (Baroma 5:12) Re shoa hobane re futsitse sebe ho Adama le Eva, eseng hobane Molimo a ne a rerile hore re shoe.

Ho se mamele ha Adama le Eva ha hoa ka ha etsa hore morero oa Molimo o boholoe ke lintja. Kaha Molimo oa re rata ebile o na le toka, o ile a etsa mokhoa oa hore re tle re pholohe sebe le lefu. Moapostola Pauluse o ile a re: “Moputso oo sebe se o lefang ke lefu, empa mpho eo Molimo a fanang ka eona ke bophelo bo sa feleng ka Kreste Jesu Morena oa rōna.” (Baroma 6:23) Kaha Molimo oa re rata, o ile “a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Johanne 3:16) Ha Jesu a re shoela, o ile a re thusa ho fumana monyetla oo Adama a bapetseng ka oona. a

Tšepiso ea Jehova ea hore lefatše e tla ba paradeise e tla phethahala haufinyane. Ha tšepiso ena e phethahala, le uena u ka phela Paradeiseng haeba u mamela mantsoe a Jesu a reng: “Kenang ka heke e moqotetsane; hobane tsela e isang timetsong e pharaletse ebile e khōlō, ’me ba kenang ka eona ba bangata; athe heke e isang bophelong e moqotetsane le tsela e isang teng e patisane, ’me ke ba seng bakae ba e fumanang.” (Matheu 7:13, 14) E mong le e mong oa ikhethela hore na o tla phela joang. Uena u batla ho phela joang?