Ka 2013, baepolli ba lintho tsa khale ba ile ba sibolla phaposi e khōlō ea polokelo ea veine ea Bakanana e nang le lilemo tse ka bang 3 700. Phaposi eo e ne e e-na le linkho tse khōlō tse 40 tse neng li ka tlatsa libotlolo tse 3 000 tsa veine. Moepolli oa lintho tsa khale ea ileng a hlahloba mesaletsa e ka linkhong tseo o ile a hlokomela hore Bakanana ba ne ba tseba ho etsa veine. O ile a re: “Ba entse veine e tšoanang libotlolong tsohle.”

RE U LOME TSEBE? Bibele e bua ka “veine e monate ka ho fetisisa” e neng e etsoa Iseraele ea boholo-holo ’me e bolokoa ka har’a linkho tse khōlō.—Sefela sa Lifela 7:9; Jeremia 13:12.

Ho latela tlaleho e fanoeng ke koranta ea Guardian, naheng ea Egepeta, bana ba hlahileng ka 2012 ba feta ba hlahileng ka 2010 ka ba 560 000. Magued Osman oa k’hamphani ea Egepeta ea lipatlisiso e bitsoang Baseera o ile a re: “Ke keketseho e khōlō ka ho fetisisa e kileng ea e-ba teng Egepeta.” Litsebi tse ling li re haeba keketseho ea baahi e ka tsoela pele ka sekhahla sena, ho tla ba le khaello e eketsehileng ea metsi, motlakase le lijo.

RE U LOME TSEBE? Bibele e re morero oa Molimo ke hore batho ba “tlale lefatše” ka tsela e itekanetseng ’me ba be le lijo tse lekaneng.—Genese 1:28; Pesaleme ea 72:16.

Ho ile ha fumanoa lichelete tsa boronse tse 100 tse ngotsoeng “Selemo sa Bone” pel’a ’mila o moholo oa Iseraele. Ke selemo sa bone seo ka sona Bajuda ba ileng ba fetohela Baroma (69-70 C.E.), ’me phetohelo eo ea etsa hore Jerusalema e timetsoe. Pablo Betzer e leng ea ikarabellang ka ho epolloa ha lintho tsa khale o ile a re: “Ho hlakile hore motho enoa o ne a baleha, mohlomong o ne a bona lebotho la Roma le ntse le atamela. O ile a pata thepa ea hae ka khopolo ea hore o tla e nka hamorao.”

RE U LOME TSEBE? Ka 33 C.E., Jesu o ile a bolela esale pele hore Roma e tla timetsa Jerusalema. O ile a phehella Bakreste hore ba balehele lithabeng e le hore ba bolokehe.—Luka 21:20-24.