“Ha motho e mong a u khalemela, ha e le hantle motho eo u o bolella hore hona le ntho e fosahetseng eo u e etsang. Ha ke e-s’o utloe motho ea reng, ‘Kea thaba ha batho ba mpolella hore ke ntse ke etsa ntho e fosahetseng!’”—Amy, ea lilemo li 17. *

Na u thatafalloa ho amohela khalemelo e tsoang ho batsoali, matichere le batho ba bang ba hōlileng? Haeba ho joalo sehlooho sena se tla u thusa.

Motho e mong le e mong o hloka khalemelo.

“Kaofela re khoptjoa hangata.”—Jakobo 3:2.

“Ha ua lokela ho hlajoa ke lihlong ha u khalemelloa phoso eo u e entseng.”—Jessica.

Hase hore u motho e mobe ha u khalemeloa.

“Jehova * o khalemela eo a mo ratang, feela joalokaha ntate a khalemela mora ea mo khahlisang.”—Liproverbia 3:12.

“Ha batho ba nkhalemela, ke nahana kamoo e tlamehang ebe ho bile thata kateng ho bona hore ba etse joalo le kamoo ho nkhalemela ha bona ho bontšang hore baa nthata.”—Tamara.

Khalemelo e u thusa hore u be motho ea molemo.

‘Mamela taeo ’me u hlalefe.’—Liproverbia 8:33.

“Khalemelo ke ea bohlokoa e le hore motho a hōle. E u hlokomelisa kamoo batho ba bang ba u shebang kateng, ebile e u thusa ho loantša mekhoa e mebe eo e ka ’nang eaba ha u tsebe hore u na le eona.”—Deanne.

Leka ho bona bohlokoa ba khalemelo. E ka ’na eaba u tloaetse ho koata ha u khalemeloa. Empa leka ho behella maikutlo a hao ka thōko. E le ho u thusa ho etsa joalo, tlosa kelello hanyane boemong boo u leng ho bona ’me u nahane u fana ka khalemelo e tšoanang ho motho e mong, mohlomong ho ngoan’eno. Na joale u khona ho bona molemo oa khalemelo eo? Joale khutlisetsa kelello boemong boo u leng ho bona ’me u leke ho sheba taba eo ka leihlo le tšoanang.—Molao-motheo oa Bibele: Moeklesia 7:9.

“Ka linako tse ling u ka ’na ua halefisoa ke ha motho e mong a u tšoaea phoso hoo u ka lebalang hore o ne a leka ho u thusa hore u be motho ea molemo eseng ho u utloisa bohloko.”—Theresa.

Lula u ikokobelitse. U se ke ua lumella boikhohomoso bo etse hore u se amohele khalemelo. Ka lehlakoreng le leng, u se ke ua itumella hore u sithabetsoe ke khalemelo hobane feela ho na le ntho eo u lokelang ho ntlafatsa ho eona. Boikokobetso bo tla u thusa hore u qobe ho ikhohomosa kapa ho sithabela ka ho feteletseng. Hopola: Khalemelo e utloisang bohloko haholo e ka ’na eaba ke eona eo u e hlokang ka ho fetisisa. Haeba u e qhelela ka thōko, u ka ’na ua lahleheloa ke monyetla o moholo o tla u thusa hore u hōle.—Molao-motheo oa Bibele: Liproverbia 16:18.

“Ho amohela khalemelo ke karolo ea bohlokoa e tla u thusa hore u be motho e moholo ea nang le boikarabelo. Haeba re sa ithute ho e amohela, re ka ’na ra ikutloisa bohloko ha nako e ntse e ea.”—Lena.

Leboha. Le hoja ho ka ’na ha e-ba thata ho amohela khalemelo, e ka ba hantle hore u lebohe motho ea u fileng eona. Ha ho potang hore motho eo oa u tsotella ebile o batla hore u atlehe.—Molao-motheo oa Bibele: Pesaleme ea 141:5.

“Ke hantle hore u re ‘Kea leboha,’ haholo-holo haeba u ne u hloka keletso. Esita le haeba u ne u sa e hloke, u ka ’na ua bontša kamoo u ananelang kateng boiteko ba motho ea u fileng eona.”—Carla.