“E mong le e mong ea ntseng a tsoela pele ho sheba mosali e le hore a be le takatso e matla bakeng sa hae o se a febile le eena ka pelong ea hae.”—Matheu 5:28.

KE HOBANE’NG HA RE LOKELA HO TSEBA KA TABA EE?

Kajeno litšoantšo tse litšila tse tsosang takatso li atile ebile ho bonolo ho li fumana ho feta pele. Haeba u lakatsa ho thabisa Molimo le ho thaba bophelong, u lokela ho tseba hore na O ikutloa joang ka litšoantšo tse litšila tse tsosang takatso.

SEO BIBELE E SE BUANG

Bibele ha e bue ka litšoantšo tse litšila tse tsosang takatso ka ho toba. Leha ho le joalo, ho sheba litšoantšo tse litšila tse tsosang takatso ho khahlanong le melao-motheo e mengata ea Bibele.

Ka mohlala, Bibele e fana ka temoso e hlakileng ea ho re ha monna ea nyetseng “a tsoela pele ho sheba mosali” eo a sa nyalanang le eena, a hōlisa takatso ea ho robala le eena, seo se ka lebisa bofebeng. Molao-motheo ona oa Bibele o sebetsa ho motho e mong le e mong ‘ea tsoelang pele ho sheba’ litšoantšo tse litšila ka takatso ea ho etsa boitšoaro bo bobe, ho sa tsotellehe hore o kene lenyalong kapa che. Ho hlakile hore boitšoaro bo joalo bo halefisa Molimo.

“Ka hona, le bolaee litho tsa ’mele ea lōna . . . mabapi le bohlola, ho se hloeke, takatso ea botona kapa ea botšehali, takatso e kotsi, le ho chacheha ka mohono.”—Bakolose 3:5.

SEO BATHO BA SE BUANG

Litsebi tse ling li belaella taba ea hore ha motho a shebella litšoantšo tse litšila a ka qetella a entse boitšoaro bo bobe. Empa na ho fosahetse ho sheba litšoantšo tse litšila?

SEO BIBELE E SE BUANG

Bibele e re “mesoaso e nyonyehang” ha ea loka ebile e litšila. (Baefese 5:3, 4) Joale, ke joang ho sheba litšoantšo tse litšila ho ke keng ha e-ba kotsi? Kajeno litšoantšo tse litšila li atisa ho bontša batho ba etsang bohlola, ba robalang le ba bong bo tšoanang le liketso tse ling tsa boitšoaro bo hlephileng. Ka sebele, ho ba le lerato le feteletseng la ho sheba boitšoaro bo bobe ho halefisa Molimo le ho feta puo e litšila.

Bafuputsi ba tsoela pele ho phehisana ka taba ea hore motho a ka etsa boitšoaro bo bobe hobane a susumelitsoe ke ho sheba litšoantšo tse litšila tse tsosang takatso. Empa Bibele e tšehetsa ka ho hlaka taba ea hore ho sheba litšoantšo tse litšila ho ka halefisa Molimo le ho senya setsoalle sa motho le Eena. Bibele e fana ka keletso ena: “Ka hona, le bolaee litho tsa ’mele ea lōna . . . mabapi le bohlola [le] takatso ea botona kapa ea botšehali.” (Bakolose 3:5) Batho ba shebang litšoantšo tse litšila ba etsa se fapaneng—ho e-na le ho bolaea litakatso tse joalo, baa li tsosa le ho li hōlisa.

“Batlang se molemo, eseng se sebe . . . Hloeang se sebe, le rate se molemo.”—Amose 5:14, 15.

SEO BIBELE E SE BUANG

Bibele e bua ka batho ba robalang le batho ba bangata, matahoa le masholu a ileng a khona ho lahla mekhoa eo e senyang bophelo. (1 Bakorinthe 6:9-11) Joang? Ka ho sebelisa keletso e bohlale e tsoang Lentsoeng la Molimo, ba ile ba ithuta ho hloea se sebe.

U ka khona ho ithuta ho hloea litšoantšo tse litšila ka hore u nahane ka liphello tse bosula tse tlisoang ke boitšoaro bona bo hlephileng. Phuputso e entsoeng morao tjena ke Univesithi ea Utah State e bontšitse hore batho ba shebang litšoantšo tse litšila tse tsosang takatso ba qetella ba na le “khatello ea maikutlo, ba ikarola ho batho ba bang, manyalo a bona a senyeha” le ho hlaheloa ke lintho tse ling tse bohloko. Ho phaella moo, joalokaha ho hlalositsoe pejana, ho sheba litšoantšo tsena ho halefisa Molimo ebile ho etsa ntho e ’ngoe e kotsi le ho feta. Ho arohanya batho le ’Mōpi oa bona.

Bibele e ka re thusa hore re ithute ho rata se molemo. Ha re ntse re ithuta Bibele, lerato leo re ratang melao ea Bibele ea boitšoaro ka lona le tla hōla. Lerato leo le tla re thusa ho ema re tiile khahlanong le ho sheba litšoantšo tse litšila tse tsosang takatso le ho etsa hore re ikutloe joaloka mopesaleme ea ileng a re: “Nke ke ka beha letho le se nang molemo ka pel’a mahlo a ka.”—Pesaleme ea 101:3.