Jehova o ile a hlohonolofatsa boikitlaetso ba bahlanka ba hae Dominican Republic. Ka 1994 ho ne ho e-na le bahoeletsi ba ’Muso ba ka bang 16 354 liphuthehong tse 259. Kaha mosebetsi o ne o tsoela pele ka potlako, ho ne ho hlokahala baholo le bahlanka ba sebeletsang ba koetlisitsoeng hantle. Selemong seo, Sehlopha se Busang se ile sa fana ka tumello ea hore Dominican Republic ho be le Sekolo sa ho Koetlisetsoa Bosebeletsi, seo hona joale se nketsoeng sebaka ke Sekolo sa Baevangeli ba ’Muso.

 Ka October 2011, barab’abo rōna ba ka bang 600 ba ile ba fumana thupelo litlelaseng tse 25 tsa sekolo sena tse ileng tsa tšoaroa ho pholletsa le naha. Hona joale, barab’abo rōna ba ka holimo ho halofo ba tsoang sekolong sena ba tšebeletsong ea nako e tletseng ea mofuta o itseng. Ka mohlala, ba 71 ke bo-pula-maliboho ba khethehileng ’me ba bahlano ke balebeli ba potoloho. Lihlopha tsa pele tse leshome li ile tsa rupelloa Bethele, empa ho tloha ka sehlopha sa bo11 sekolo se ’nile sa tšoareloa mohahong oa sona o Villa González.

Ka la 22 September, 1998, leholiotsoana le bitsoang Georges le ile la puputla Dominican Republic, ’me la baka tšenyo e khōlō. Le ile la bolaea batho ba fetang 300 ’me  ba likete ba sala ba se na matlo. Komiti ea Liphallelo hammoho le Komiti ea Kaho ea Lebatooa e ile ea sebelisa Holo ea ’Muso ea La Romana ho thusa mahlatsipa. Baithaopi ba ka bang 300 ho akarelletsa le Lipaki tse 16 tse tsoang linaheng tse ling ba ile ba thusa mahlatsipa.

Ka kakaretso barab’abo rōna ba ile ba lokisa kapa ba haha bocha Liholo Tsa ’Muso tse 23 le matlo a fetang 800 a bara le barali babo rōna. Ka mohlala, Carmen, eo e leng pula-maliboho ea kamehla e hōlileng, o ne a selebaletsoe ha leholiotsoana le senya ntlo ea hae eo a lutseng ho eona ka lilemo tse 38. Leha ho le joalo, o ile a thaba haholo ha sehlopha sa barab’abo rōna ba 15 se fihla ho tla etsa moralo oa ntlo ea hae. Carmen o re: “Jehova ha a re lebale, ebile oa re hlokomela. Ak’u bone hore na ntlo ena eo barab’abo rōna ba nkahelang eona e ntle hakaakang. Baahelani ba ka ba ile ba re: ‘Lipaki Tsa Jehova lia hlokomelana; ka sebele lia ratana.’” Batho ba bangata ba ile ba bua se tšoanang ha ba bona baithaopi ba thusa bara le barali babo rōna.

Le hoja leholiotsoana lena e ne e le koluoa e tšabehang, boiteko ba bahlanka ba Jehova ba ho bontšana lerato bo ile ba matlafatsa bara le barali babo rōna nameng le moeeng. Habohlokoa le ho feta ke hore boitelo ba baithaopi bo ile ba etsa hore Jehova a rorisoe, kaha ke eena mohloli oa matšeliso.

Liholo Tsa ’Muso li Hahoa ka Potlako

Ha barutuoa ba ntse ba eketseha, ho ne ho hlokahala Liholo Tsa ’Muso tse eketsehileng. Kahoo, ka November 2000, barab’abo rōna ba Dominican Republic ba ile ba qala ho haha Liholo Tsa ’Muso ka thuso ea letlōle la kaho ea Liholo Tsa ’Muso linaheng tse futsanehileng. Ka hona, phutheho e ka ikahela Holo ea ’Muso e ntle ka nako  e ka etsang libeke tse robeli. Ka September 2011, lihlopha tse peli tsa kaho li ne li hahile kapa li nchafalitse Liholo Tsa ’Muso tse ka bang 145.

Batho ba bangata ba ile ba khahloa ke mehaho ena hammoho le baithaopi ba e hahileng. Ka mohlala, motsaneng o mong ka leboea-bophirimela ho naha, barab’abo rōna ba ile ba bona setša seo ba ka hahang Holo ea ’Muso ho sona. Mor’abo rōna oa pula-maliboho e khethehileng o ile a botsa mong’a sona hore na a ka ba rekisetsa sona. Empa mong’a sona o ile a re: “U se ke ua itšenyetsa nako, nke ke ka le rekisetsa setša sena hore le tl’o haha kereke ho sona.”

Nakoana ka mor’a hore mong’a setša a latolele barab’abo rōna, o ile a etela moholoane oa hae oa Paki ea lulang Puerto Plata. Ha a fihla moo, a fumana hore lelapa le leng la Lipaki le nkile moholoane oa hae ea kulang ’me le mo okela ha lona. Le ne le mo isa ngakeng, le e-ea le eena libokeng le tšimong. Monna eo o ile a botsa moholoane oa hae hore na o ba patala bokae hore ba mo hlokomele. A re: “Ha ke ba patale hobane ke balumeli-’moho le ’na.”

Monna eo o ile a makatsoa ke mosa o ikhethang oa Lipaki tseo hoo a ileng a letsetsa mor’abo rōna oa pula-maliboho eo a neng a buile le eena pejana ’me a mo bolella hore a ka ba rekisetsa setša. Barab’abo rōna ba ile ba reka setša seo ’me ba haha holo. Pele ho moo, mosali oa ntate eo o ne a nyatsa Lipaki Tsa Jehova. Empa ha a bona tsela eo barab’abo rōna ba sebetsang ka kutloano ka eona ha ba ntse ba haha holo, o ile a re: “Ke qala ho bona batho ba sebetsang ka kutloano le ba mosa hakana.”