Tšenolo e eang ho Johanne 6:1-17
-
Konyana e tlosa litempe tse tšeletseng (1-17)
-
Mopalami oa pere e tšoeu ea hlolang lira tsa hae (1, 2)
-
Mopalami oa pere e bofubelu ba mollo ea tlosang khotso (3, 4)
-
Mopalami oa pere e ntšo ea tlisang tlala (5, 6)
-
Mopalami oa pere e botala bo bosehla o bitsoa Lefu (7, 8)
-
Mali a ba bolailoeng a tlas’a aletare (9-11)
-
Tšisinyeho e kholo ea lefatše (12-17)
-
6 Ka bona Konyana+ e tlosa se seng sa litempe* tse supileng+ eaba ke utloa le leng la mangeloi a mane+ le re ka lentsoe le kang la sealuma: “Tloo!”
2 Ka bona pere e tšoeu,+ ea neng a e palame o ne a tšoere seqha. O ile a fuoa korone+ eaba oa tloha hore a e’o hlola lira tsa hae.+
3 Ha Konyana e tlosa setempe sa bobeli, ka utloa lengeloi la bobeli+ le re: “Tloo!”
4 Ka bona pere e ’ngoe e bofubelu ba mollo. Ea e palameng o ile a fuoa sabole e kholo ’me a fuoa matla a hore a tlose khotso lefatšeng e le hore batho ba ka bolaeana.+
5 Ha Konyana e tlosa setempe sa boraro,+ ka utloa lengeloi la boraro+ le re: “Tloo!” Ka bona pere e ntšo, ea e palameng o ne a tšoere sekala.
6 Ka utloa lentsoe le hlaha har’a mangeloi a mane le re: “Lithara* ea koro e rekoa ka denari*+ le lilithara tse tharo tsa harese li rekoa ka denari. U se ke oa senya oli ea mohloaare le veine.”+
7 Ha Konyana e tlosa setempe sa bone, ka utloa lengeloi la bone+ le re: “Tloo!”
8 Ka bona pere e botala bo bosehla, lebitso la ea e palameng e ne e le Lefu ’me o ne a setsoe morao ke Lebitla.* Ba ile ba fuoa matla holim’a kotara ea batho ba lefatše e le hore ba bolaee batho ka sabole e telele, khaello ea lijo,+ lefu la seoa le ka libata.+
9 Ha Konyana e tlosa setempe sa bohlano, ka bona ka tlas’a aletare+ ho e-na le mali*+ a ba bolailoeng ka lebaka la ho mamela lentsoe la Molimo le ho le bolella batho ba bang.+
10 Mali a bona a hoeletsa a re: “’Musi oa Lintho Tsohle, oa ’nete+ le ea halalelang, u tla ema ho fihlela neng pele u ahlola le ho iphetetsa ho batho ba re bolaileng ba phelang lefatšeng?”+
11 E mong le e mong oa bona o ile a fuoa seaparo se selelele se sesoeu+ ’me ba bolelloa hore ba eme ka nakoana ho fihlela palo ea makhoba-’moho le bona le bana ba bo bona ba neng ba tl’o bolaoa joaloka bona e feletse.+
12 Ka bona Konyana e tlosa setempe sa botšelela. Ho ile ha e-ba le tšisinyeho e kholo ea lefatše, letsatsi la e-ba letšo joaloka lesela le letšo* le khoeli ea e-ba khubelu joaloka mali.+
13 Linaleli tsa oela lefatšeng joalokaha lifeie* tse sa butsoang li oa sefateng sa feie ha se tsukutloa ke sefefo.
14 Leholimo la menoa joaloka moqolo eaba lea nyamela+ ’me lithaba le lihlekehleke tsohle tsa tlosoa moo li neng li lutse.+
15 Marena a lefatše, liofisiri tse kholo, balaoli ba sesole, barui, batho ba matla, makhoba ’ohle le bohle bao e seng makhoba ba ipata mahaheng le mafikeng a lithaba.+
16 Ba ’na ba re ho lithaba le mafika: “Re oeleng holimo+ le re pate e le hore re se ke ra bonoa ke ea lutseng teroneng.+ Le re sireletse khalefong ea Konyana+
17 hobane letsatsi le leholo la khalefo ea bona le fihlile+ ’me ke mang ea ka le phonyohang?”+
Linaletsana
^ Sheba Ntlha ea B14.
^ Ke chelete ea tšepe ea Roma e lekanang le mokholo oa letsatsi. Sheba Ntlha ea B14.
^ Kapa: “Hadese.” Sheba Tlhaloso.
^ Ka Segerike: “meea.” Ho bonahala eka ho buuoa ka mali a bona a ileng a tšolleloa aletareng. Sheba Tlhaloso.
^ Hangata mofuta ona oa lesela o ne o etsoa ka boea ba poli.
^ Kapa: “feiga.”
