Ako inahanele feela ho utlwahala ditlhako tse hatang fatshe jwaloka seaduma! Ha o ntse o bala ka pono ena e hlollang ya dipere tse nne tse matla le bapalami ba tsona, e hlaka jwalo ka ha eka ehlile seo se etsahala ka tsela ya sebele! Mopalami wa pere ya pele e tshweu, ke ya kganyang mme o beilwe e le morena. Kamora hae ho latela pere e kgubedu, eo mopalami wa yona a tlosang kgotso lefatsheng lohle. Ho be ho latela pere e ntsho, eo mopalami wa yona a phahamiseditseng dikala tse pedi hodimo, tse tshwantshetsang molaetsa o utlwisang bohloko wa tlala ya boja dikata. Ha ele pere ya bone e botala bo bosehla yona, ya e palameng o tshwantshetsa malwetse le dikotsi tse sehloho ha esitana le Lefu. Sena se etsa hore batho ba hlokahale ka bongata!—Tšenolo 6:1-8.

“Kgetlo la pele ha ke ne ke bala ka bapalami bana, ke ne ke tshohile. Ke ne ke utlwa eka Letsatsi la Kahlolo le tseleng ene kaha ke ne ke sa itokisa, ho ne ho tlo fela ka nna.”—Crystal.

“Ke ile ka hlollwa ha ke bona bapalami ba hodima dipere tse mebalabala. Eitse ha ke hlakelwa ke se bolelwang ke pono eo, ka e thabela le ho feta.”—Ed.

Na o ne o ikutlwa ka tsela e tshwanang le ya Crystal kapa Ed, ha o ne o qala ho ithuta ka Boprofeta bona ba bapalami ba dipere? Haeba ho jwalo, o tla thabela ho tseba hore bapalami bana ba tshwantshetso ba dipere, ba wela hara diketsahalo tse tsebahalang ka ho fetisisa bukeng ya ho qetela ya Bibele, e leng Tshenolo. Na o ne o tseba hore o tla fumana molemo ha o utlwisisa pono ena? Empa jwang? Modimo o tshepisa hore o tla fumana thabo ya sebele ha o bala, o ithuta ebile o etsa seo buka ena ya boprofeta e reng o se etse.—Tšenolo 1:1-3.

Pono ena ya bapalami ba bane ba dipere, ha e ya etsetswa ho o tshosa. Ebile batho ba dimilione ba fumane hore pono ena, e tiisitse tumelo ya bona le ho ba fa tshepo ka bokamoso. Re kopa hore o ke o leke ho e bala, e le hore le wena o fumane molemo o tshwanang.