HAEBA molekane a sa tshepahale, seo se siya molekane e mong a ferekane ebile a utlwile bohloko. Ke nnete hore banyalani ba bang ba ile ba kgona ho tshwarela molekane ya ileng a lokisa diphoso tsa hae mme kamano ya bona ya tiya hape. a Empa ho sa tsotellehe hore na banyalani ba tswelapele ba nyalane kapa tjhe, molekane ya utlwisitsweng bohloko ke molekane wa hae ka lebaka la ho se tshepahale, o utlwa bohloko bo boholo. Ke jwang batho bana ba ka kokobetsang bohloko boo ba bo utlwileng?

Balekane ba bangata ba ileng ba utlwiswa bohloko, ba ile ba fumana matshediso ka Bibeleng. Ba ile ba ithuta hore Modimo o bona ho lla ha bona le hore o utlwisisa ka moo ba ikutlwang ka teng.—Malakia 2:13-16.

“Ha menahano ya ka e hlokisang botsitso e ngatafala ka hare ho nna, matshediso a hao a ile a qala ho hlabolla moya wa ka.”—Pesaleme ya 94:19.

Bill o re: “Ha ke ntse ke bala temana ena, ke ile ka nahana ha Jehova a mpontsha lerato ka ho kokobetsa bohloko ba ka jwalo ka ha ntate ya lerato a ne a ka etsa.”

“Ho ya tshepahalang o tla etsa ka botshepehi.”—Pesaleme ya 18:25.

Carmen eo monna wa hae a sa kang a tshepahala ka dikgwedi tse mmalwa o re: “Monna wa ka ha a ka a tshepahala, empa ke ne ke kgodisehile hore Jehova o a tshepahala le hore a ke ke a mphoqa.”

“Le se ke la tshwenyeha ka letho, empa nthong e nngwe le e nngwe ka thapelo le thapedi . . . dikopo tsa lona tse matla di ke di tsebiswe Modimo; mme kgotso ya Modimo e fetang monahano wohle e tla lebela dipelo tsa lona.”—Bafilipi 4:6, 7.

Sasha o re: “Ke ne ke bala ditemana tsena hangata mme ha ke ntse ke rapela ka makgetlo, Modimo o ile a mpha kgotso bophelong.”

Batho bohle bao re buileng ka bona, ho na le nako eo ka yona ba ileng ba lahla tshepo. Empa ba ile ba tshepa Jehova Modimo mme ba nka matla Lentsweng la hae. Bill o re: “Tumelo ya ka e ile ya etsa hore ke tsebe hore na ke phelelang le ha ntho e nngwe le e nngwe e ne e bonahala eka e senyehile. Le hoja ke ile ka ‘tsamaya phuleng ya moriti o lefifi,’ Modimo o ile a ba le nna.”—Pesaleme ya 23:4.