Jehova Modimo o batla hore re mo bolelle dintho tsohle tse re tshwenyang. (Pesaleme ya 55:​22) Jehova o a re tsotella ebile o utlwisisa hantle ka moo re ikutlwang ka teng. Ka hoo, re lokela ho mo rapela ho sa tsotellehe hore na ntho e re tshwenyang e kgolo kapa e nyenyane hakae. Ho mo rapela ho bohlokwa hobane ho tla etsa hore re be le kgotso.​—Bafilipi 4:​6, 7.

Ha re ena le kgatello ya maikutlo re ka ikutlwa eka batho ba bang ha ba re tsotelle. Ha se ka mehla batho ba bang ba ka utlwisisang hore na re ikutlwa jwang. (Diproverbia 14:​10) Empa Modimo yena o a utlwisisa ebile o tla dula a re mamela ha re mo bolella hore na re ikutlwa jwang. Jehova o a re bona, o tseba bohloko boo re bo utlwang le mathata a re hlahelang mme o batla hore re mo bolelle dintho tsohle tse re tshwenyang.​—2 Dikronike 6:​29, 30.

Ho rapela Jehova ho ka re kgodisa le ho feta hore o a re tsotella. Re ka ikutlwa jwalo ka mongodi e mong wa pesaleme ya ileng a re ha a rapela: “O bone mahlomola a ka. O a tseba hore ke tshwenyehile haholo.” (Pesaleme ya 31:7) Ho tseba hore Jehova o a hlokomela hore na re tshwenngwa keng ho ka re thusa hore re nne re mamelle mathata. Empa ha se yona feela ntho eo Jehova a e hlokomelang. O utlwisisa tsela eo re ikutlwang ka yona ho feta motho le ha e le ofe mme o re tshedisa le ho re kgothatsa a sebedisa Bibele.