Moapostola Pauluse o ile a ngolla Bakreste ba Thesalonika a re: “Mang kapa mang ya sa mameleng ditaba tsa lengolo lena, le mo tshwaye.” (2 Bathes. 3:14) Pele re ne re re tataiso ena e lebisitswe ho baholo. Haeba motho a ne a tswela pele ho se mamele melaomotheo ya Bibele ka mora hore a fuwe keletso ka makgetlo, baholo ba ne ba ka fana ka puo e lemosang phutheho. Ka mora moo, bahweletsi ba ne ba ke ke ba qeta nako le motho eo ya tshwailweng ntle le ha ba le dibokeng kapa tshebeletsong ya tshimo.

Le ha ho le jwalo, re lokela ho fetola kutlwisiso ya rona. Pauluse o ne a re Mokreste ka mong a sebedise keletso ena ho etsa qeto maemong a itseng. Ka hoo, ha ho hlokahale hore baholo ba fane ka puo e lemosang phutheho. Ke hobaneng ha re fetola kutlwisiso ya rona? Nahana ka seo Pauluse a neng a bua ka sona ha a tla fana ka keletso ena.

Pauluse o ile a hlokomela hore ba bang ka phuthehong ba ne “ba tswile taolong.” Ba ne ba sa mamele keletso eo a neng a ba fa yona e thehilweng Mangolong. Ha a ne a ba etetse, o ile a re ho bona: “Motho ya sa batleng ho sebetsa, le ho ja a se ke a ja.” Le ha ho le jwalo, ba bang ba ne ba ntse ba sa batle ho sebetsa e le hore ba ka beha bohobe tafoleng, le hoja ba ne ba ka kgona ho etsa jwalo. Ba ne ba boetse ba sa tswe ditabeng tsa batho ba bang. Bakreste ba ne ba lokela ho tshwara batho bao ba tswileng taolong jwang?—2 Bathes. 3:​6, 10-12.

Pauluse o ile a re: “Le mo tshwaye.” Lentswe la Segerike le sebedisitsweng mona le fana ka moelelo wa hore o ele hloko motho ya ka o susumeletsang ho etsa dintho tse fosahetseng. Pauluse o ne a sa bue le baholo feela empa o ne a bua le phutheho kaofela. (2 Bathes. 1:1; 3:6) Ka hoo, Mokreste e mong le e mong ya neng a ka hlokomela hore Mokrestemmoho le yena ha a mamele keletso ya Mangolo, o ne a tla kgetha ho ‘kgaotsa ho tlwaelana’ le motho eo ya tswileng taolong.

Na motho eo o ne a ka tshwarwa jwalo ka motho ya tlositsweng ka phuthehong? Tjhe, hobane Pauluse o ile a re: “Le nne le mo eletse ka ha ke ngwanabo lona.” Ka hoo, Mokreste o ne a ka bua le yena ha ba le dibokeng le tshimong empa o ne a ka kgetha ho se qete nako le yena ba le boithabisong kapa ba ikgatholla. Hobaneng? Pauluse o ile a boela a re: “E le hore a ka swaba.” Haeba re kgaotsa ho qeta nako le Mokreste ya tshwauweng, a ka nna a swabela boitshwaro ba hae mme a fetola mekgwa ya hae.—2 Bathes. 3:​14, 15.

Bakreste kajeno ba ka tseba jwang hore motho ya itseng o lokela ho tshwauwa? Ba lokela ho qala pele ka ho netefatsa hore na ka nnete motho eo o “tswile taolong” jwalo ka ha Pauluse a hlalosa. Pauluse o ne a sa bue ka batho ba etsang dintho tseo matswalo a rona a re hanelang ho di etsa empa di se kgahlanong le melao kapa melaomotheo ya Bibele. O ne a boetse a sa bue ka batho ba etsang dintho ka tsela e fapaneng le ya rona. Hape o ne a sa bue ka batho ba ileng ba re utlwisa bohloko. Ho ena le hoo, o ne a bua ka batho ba ileng ba fuwa keletso e thehilweng Lentsweng la Modimo mme ba kgetha ho se e mamele.

Ha re lemoha hore Mokrestemmoho ha a mamele keletso e tswang Lentsweng la Modimo, a re tla etsa qeto ya ho se qete nako le yena re le boithabisong kapa re ikgatholla. Ka ha ena ke qeto ya motho ka mong, ha re a lokela ho bua ka yona le batho ba bang ntle le ba lelapa bao re dulang le bona. Re ntse re ka bua le motho eo ha re le dibokeng kapa tshimong. Haeba a ka fetola boitshwaro ba hae, re ka boela ra qeta nako le yena kapa ra tlwaelana le yena.