BATHO ba Kazakhstan ba ne ba phela bophelo ba hloma o hlomole. Esita le ho tla fihlela lena le hodimo, badisa ba bang ba Makazakh, ba ntse ba isa diphoofolo tsa bona makgulong a fapafapaneng ho latela dinako tsa selemo. Ba qeta lehlabula lohle ba fudisa diphoofolo tsa bona dithabeng tse phodileng, tse nang le jwang bo botala. Athe mariha teng ha lehlwa le se le tlo kgetheha, ba theolela diphoofolo tsa bona dibakeng tse futhumetseng.

Batho ba bang ba Makazakh ba dula ditoropong tse tswetseng pele. Le ha ho le jwalo, setso, dijo le mekgabiso, di bontsha bophelo ba hloma o hlomole boo baholoholo ba bona ba neng ba bo phela. Makazakh a rata dithoko tsa setso sa habo bona, dipina le ho bapala mmino ka diletswa tsa bona tsa mmino.

 Ntho e ikgethang hape ka naha ena, ke ntlo ya setso e etswang ka tente eo batho ba moo ba e sebedisang haholo ha ba ntse ba ya hodimo le tlase bophelong. Badisa ba moo ba ntse ba rata ntlo ena. Esita le batho ba Makazakh ba dulang ditoropong, hangata ba e sebedisetsa ho ba le diketsahalo tsa bohlokwa ho yona. Matlo ana a boetse a sebediswa le ke bahahlaudi. Ka hare ho ntlo ena, o kgona ho bona mesebetsi e fapafapaneng ya mekgabiso, dimmete le meloho e bontshang boqhetseke le bokgoni ba basadi ba Makazakh.

Batho ba Makazakh ba dulang mahaeng, ha ba batle letho ka dipere tsa bona. Makazakh a na le mabitso a ka bang 21 ao ba a rehang dipere tsa bona mme a na le meelelo e fapaneng. Ba boetse ba na le mantswe le ditlhaloso tse fetang 30 tse hlalosang mebala ya boya ba dipere tseo tsa bona. Pere e phetseng hantle e ntse e tura ebile e nkwa e le mpho ya bohlokwa haholo. Dibakeng tsa mahaeng, bashemane ba ithuta ho palama dipere ba sa le banyane.

Dijo tse ding le tse ding tsa setso tsa Makazakh, di dula di na le nama eo ka tlwaelo e sa tshelweng sepaese. Dinomaphodi tseo ba di ratang haholo ke koumiss e entsweng ka lebese la pere, eo hothweng e molemo haholo mmeleng. Se seng ke shubat, sona se mafura ebile se bodilanyana tjena mme se entswe ka lebese la kamele.

Ofisi ya lekala ya Dipaki Tsa Jehova e Almaty, e amohela baeti mme e butswe bakeng sa hore ba ka e bona.