Bafuputsi ba hlahang dinaheng tse fapaneng ba ile ba fihlela qeto ena ka mora ho batlisisa hore na ho fetofetoha ha maemo a lehodimo ho tla senya lefatshe ka ho feletseng. Haeba o dumela hore ho na le Mmopi ya tsotellang batho, qeto ena e fihletsweng e re hopotsa ka moo Modimo a bopileng lefatshe ka tsela eo le ka kgonang ho itokisa.

Le ha ho le jwalo, ka ha batho ba sentse lefatshe haholo, le ke ke la kgona ho itokisa ka bolona. Ke hobaneng ha re ka kgodiseha hore Modimo o tla lokisa lefatshe?

Hlokomela mangolo a ka lebokoseng a re kgodisang hore lefatshe le tla dula le le teng.

• Lefatshe le bopilwe ke Modimo. “Qalong Modimo o ile a bopa mahodimo le lefatshe.”—Genese 1:1

• Lefatshe ke la Modimo. “Lefatshe ke la Jehova a le tsohle tse ho lona.”—Pesaleme ya 24:1

• Modimo o bopile lefatshe hore le dule le le teng. “O tiisitse lefatshe metheong ya lona. Le ka mohla le ke ke la suthiswa sebakeng sa lona ka ho sa feleng.” —Pesaleme ya 104:5

• Modimo o tshepisa hore re tla phela ha monate lefatsheng ka ho sa feleng. “Modimo wa nnete ya entseng lefatshe, . . . ya sa kang a le bopela lefeela empa [o] le etseditse hore batho ba dule ho lona.” —Esaia 45:18

• Modimo o tshepisa hore batho ba tla phela lefatsheng ka ho sa feleng. “Lefatshe e tla ba lefa la ba lokileng, ba tla phela ho lona ka ho sa feleng.”—Pesaleme ya 37:29

Modimo o bopile lefatshe hore batho ba le thabele eseng hore ba le senye. Bibele e tshepisa hore ka nako ya hae e nepahetseng, Jehova Modimo o tla fedisa dintho tsohle tse senyang lefatshe.—Tshenolo 11:18

Bibele e tshepisa hore Modimo o tla etsa lefatshe hore e be serapa se setle se sireletsehileng “ebe o kgotsofatsa dintho tsohle tse phelang.”—Pesaleme ya 145:16