KGAOLO YA 39
Maikutlo a Modimo ka ho Sebedisa Madi
Madi a bohlokwa. Ha ho ya ka phelang ka ntle ho madi. Ka ha Modimo ke Mmopi, o na le tokelo ya ho re bolella hore na re sebedise madi jwang. O itseng ka ho sebedisa madi? Na re ka a ja kapa ra a tshela mmeleng bakeng sa phekolo? Keng e ka o thusang ho etsa diqeto tse nepahetseng tabeng ee?
1. Jehova o nka madi e le a bohlokwa hakae?
Jehova o ile a bolella bahlanka ba hae mehleng ya ha ho ne ho ngolwa Bibele a re: “Moya [kapa bophelo] wa nama ya mofuta o mong le o mong ke madi a yona.” (Levitike 17:14) Jehova o nka madi e le bophelo. Ka ha bophelo ke mpho e ikgethang kapa e halalelang e tswang ho Modimo, madi le ona a halalela.
2. Modimo o re thibela ho sebedisa madi jwang?
Nako e telele pele phutheho ya Bokreste e ba teng, Jehova o ile a laela bahlanka ba hae hore ba se ke ba ja madi. (Bala Genese 9:4 le Levitike 17:10.) Modimo o ile a tiisa hore maikutlo a hae ha a eso fetohe ha sehlopha se busang se ne se laela Bakreste hore ba “ile . . . madi.”—Bala Liketso 15:28, 29.
Ho ila madi ho bolelang? Haeba ngaka e ne e ka o bolella hore o se ke wa sebedisa jwala, o ne o ke ke wa bo nwa. Empa na o ne o ka ja dijo tse phehilweng ka bona kapa wa dumela ho entwa ka jwala? Ho hlakile hore o ne o ke ke wa etsa jwalo. Ka tsela e tshwanang, taelo ya Modimo ya hore re ile madi e bolela hore ha re a lokela ho nwa madi kapa ra ja nama e sa tswang madi hantle. Hape ha re a lokela ho ja dijo tse tshetsweng madi.
Ho thweng ka ho sebedisa madi bakeng sa phekolo? Ho na le mekgwa ya phekolo eo ho hlakileng hore e tlola molao wa Modimo. Taba ena e akarelletsa ho tshela madi le dikarolo tse kgolo tsa ona e leng disele tse kgubedu, disele tse tshweu, diplatelete le plasma. Ho ka nna ha se ke ha hlaka hore na mekgwa e meng ya phekolo e tlola molao wa Modimo kapa tjhe. Ka mohlala, mekgweng e meng ya phekolo ho sebediswa dikarolwana tse nyenyane tsa madi. Mekgweng e meng ya phekolo, mokudi o phekolwa ho ntse ho sebediswa madi a hae. Ha ho tluwa mekgweng ena ya phekolo, motho e mong le e mong o tlameha ho iketsetsa qeto. a—Bagalata 6:5.
ITHUTE DINTLHA TSE DING
Bona hore na o ka etsa qeto jwang ha ho tluwa tabeng ya mekgwa ya phekolo e sebedisang madi.
3. Etsa qeto e tla thabisa Jehova ha o kgetha mekgwa ya phekolo
O ka etsa qeto e tla thabisa Jehova jwang ha o kgetha mekgwa ya phekolo? Bapala VIDEO ebe le buisana ka hore na ke hobaneng ha ho le bohlokwa ho nka mehato e latelang.
-
Kopa Modimo hore a o fe bohlale.—Jakobo 1:5.
-
Batla ditemana tsa Bibele tse ka o thusang hore o bone hore na Jehova o ikutlwa jwang mme o shebe hore na di ka o thusa jwang.—Liproverbia 13:16.
-
Batla hore na ke mekgwa efe ya phekolo e sebediswang moo o dulang.
-
Sheba hore na ke mekgwa efe ya phekolo eo o ke keng wa e amohela ho hang.
-
Etsa qeto e tla o siya ka letswalo le kgutsitseng.—Liketso 24:16. b
-
Tseba hore ha ho motho ya lokelang ho o etsetsa qeto ha ho tluwa mekgweng ena ya phekolo, ebang ke molekane wa hao, moholo kapa motho ya o rutang Bibele. Boemong bona ke letswalo la hao le lokelang ho o tataisa.—Baroma 14:12.
-
Ngola fatshe qeto eo o e entseng.
4. Dipaki Tsa Jehova di batla mekgwa ya phekolo e atlehang ka ho fetisisa
Re ka fumana phekolo ya boemo bo hodimo ha ka nako e tshwanang re ntse re mamela molao wa Modimo. Bapala VIDEO.
Bala Tite 3:2, ebe le buisana ka potso e latelang:
-
Ke hobaneng ha re lokela ho bua le dingaka ka bonolo le tlhompho?
|
Ha re di amohele |
Mokreste o iketsetsa qeto |
|---|---|
|
A. Plasma |
Dikarolwana tsa plasma |
|
B. Disele tse tshweu |
Dikarolwana tsa disele tse tshweu |
|
C. Diplatelete |
Dikarolwana tsa diplatelete |
|
D. Disele tse kgubedu |
Dikarolwana tsa disele tse kgubedu |
5. Ha ho sebediswa dikarolwana tsa madi
Madi a na le dikarolo tse nne e leng disele tse kgubedu, disele tse tshweu, diplatelete le plasma. Dikarolo tsena tsa madi di na le dikarolwana tse nyenyane. c Dikarolwana tse ding tsa madi di sebediswa ke dingaka bakeng sa ho lwantsha mafu a itseng kapa ho thibela hore madi a se ke a tswa leqebeng.
Tabeng ya dikarolwana tsa madi, Mokreste e mong le e mong o lokela o iketsetsa qeto a ipapisitse le letswalo la hae leo a le kwetlisitseng a sebedisa Bibele. Batho ba bang ba ka nna ba hana ho phekolwa ka mekgwa e sebedisang dikarolwana tsa madi. Batho ba bang bona ba ka re matswalo a bona ha a ba thibele ho amohela dikarolwana tsa madi.
Ha o etsa diqeto, nahana ka potso ena:
-
Nka hlalosetsa ngaka jwang hore na ke hobaneng ha ke hana kapa ke amohela dikarolwana tse itseng tsa madi?
MOTHO A KA NNA A RE: “Keng e phoso ka ho tshelwa madi?”
-
O ka araba ka ho reng?
KAKARETSO
Jehova o batla hore re qobe ho sebedisa madi hampe.
Re Ithutileng?
-
Ke hobaneng ha Jehova a nka madi a halalela?
-
Re tseba jwang hore taelo ya Modimo ya ho ila madi e akarelletsa hore re se ke ra tshela madi bakeng sa phekolo?
-
O ka thuswa keng ho etsa qeto e nepahetseng ha o kgetha mokgwa wa phekolo o sebedisang madi?
BATLA
O lokela ho nahana ka eng pele o etsa qeto ka mokgwa wa phekolo o sebedisang madi a hao?
“Dipotso Tse Tswang ho Babadi” (Molula-Qhooa, October 15, 2000)
O lokela ho nahana ka eng pele o etsa qeto ya hore na o tla amohela dikarolwana tsa madi?
“Dipotso Tse Tswang ho Babadi” (Molula-Qhooa, June 15, 2004)
Keng e ileng ya etsa hore ngaka e dumele hore tsela eo Jehova a nkang madi ka yona ya utlwahala?
“Ke ile ka Amohela Tsela eo Modimo a Ikutlwang ka Yona ka Madi” (Tsoha!, December 8, 2003)
Ithute hore na baholo ba sebetsang Dikomiting tsa Bohokahanyi le Dipetlele ba thusa bara le baradibabo rona jwang.
a Sheba kgaolo ya 35 e reng: “Re ka Thuswa Keng ho Etsa Diqeto Tse Nepahetseng?”
b Sheba ntlha ya bohlano e reng: “Ha ho Sebediswa Dikarolwana Tsa Madi”, tlhaloso ya boraro e reng “Mekgwa ya Phekolo e Sebedisang Madi”.
c Dingaka tse ding di nka dikarolo tsena tse nne tsa madi e le dikarolwana. Ka hoo, o ka nna wa lokela ho hlalosetsa ngaka ya hao hore na o entse qeto efe ka ho sebedisa dikarolo tsa madi kapa disele tse kgubedu, disele tse tshweu, diplatelete kapa plasma.
