Daniele 3:1-30
-
Setshwantsho sa kgauta sa Morena Nebukadnezare (1-7)
-
O laela hore setshwantsho se rapelwe (4-6)
-
-
Baheberu ba bararo ba qoswa ka hore ha ba mamele (8-18)
-
“Re ke ke ra sebeletsa medimo ya hao” (18)
-
-
Ba lahlelwa ka seboping se tukang sa mollo (19-23)
-
Ba pholoswa mollong ka mohlolo (24-27)
-
Morena o rorisa Modimo wa Baheberu (28-30)
3 Morena Nebukadnezare a etsa setshwantsho* sa kgauta sa bophahamo ba dimithara tse ka bang 27* le bophara ba dimithara tse ka bang tharo.* A se beha thoteng ya Dura profinseng ya Babilona.
2 Morena Nebukadnezare a laela hore ho bitswe diofisiri tsa hae tse kgolo, balaodi, matona, baeletsi, batshwari ba matlotlo, baahlodi, bommaseterata le batsamaisi bohle ba diprofinse hore ba tlo ba teng ha ho kgakolwa setshwantsho seo a se hlommeng.
3 Diofisiri tse kgolo, balaodi, matona, baeletsi, batshwari ba matlotlo, baahlodi, bommaseterata le batsamaisi bohle ba diprofinse ba bokana ho tla kgakola setshwantsho seo Morena Nebukadnezare a se hlommeng. Ba ema ka pela setshwantsho seo sa Nebukadnezare.
4 Sebohodi sa hweletsa sa re: “Lona ditjhaba, merabe le batho ba buang dipuo tse fapaneng, le laelwa
5 hore ha le utlwa modumo wa lenaka, phala, zitha, harepa, seletsa se dikgwele, phala e nang le mokotlana le diletsa tse ding tsohle tsa mmino, le kgumame le rapele setshwantsho sa kgauta seo Morena Nebukadnezare a se hlommeng.
6 Motho le ha e le ofe ya sa kgumameng le ho se rapela, o tla lahlelwa ka seboping se tukang sa mollo hanghang.”+
7 Ha batho bohle ba utlwa modumo wa lenaka, phala, zitha, harepa, seletsa se dikgwele le diletsa tse ding tsohle tsa mmino, ditjhaba tsohle, merabe le batho ba buang dipuo tse fapaneng, ba kgumama yaba ba rapela setshwantsho sa kgauta seo Morena Nebukadnezare a se hlommeng.
8 Ka yona nako eo, Bakalde ba bang ba tla ho tla qosa* Bajuda.
9 Ba re ho Morena Nebukadnezare: “Morena, o ke o phele ka ho sa feleng.
10 Morena, o laetse hore ha batho bohle ba utlwa modumo wa lenaka, phala, zitha, harepa, seletsa se dikgwele, phala e nang le mokotlana le diletsa tse ding tsohle tsa mmino, ba kgumame ba rapele setshwantsho sa kgauta
11 le hore motho ya ke keng a kgumama mme a se rapela, a lahlelwe ka seboping se tukang sa mollo.+
12 Empa ho na le Bajuda ba itseng bao o ba behileng hore e be batsamaisi ba profinse ya Babilona e leng Shadrake, Meshake le Abednego.+ Banna bana ha ba o hlomphe morena. Ha ba sebeletse medimo ya hao ebile ba hana ho rapela setshwantsho sa kgauta seo o se hlommeng.”
13 Nebukadnezare a halefa haholo yaba o laela hore Shadrake, Meshake le Abednego ba tliswe ho yena. Ka hoo, banna bana ba tliswa ka pela morena.
14 Nebukadnezare a re ho bona: “Shadrake, Meshake le Abednego, na ke nnete hore ha le sebeletse medimo ya ka+ ebile le hana ho rapela setshwantsho sa kgauta seo ke se hlommeng?
15 Haeba le tla kgumama mme le rapele setshwantsho seo ke se entseng ha le utlwa modumo wa lenaka, phala, zitha, harepa, seletsa se dikgwele, phala e nang le mokotlana le diletsa tse ding tsohle tsa mmino, ho tla be ho lokile. Empa haeba le hana ho se rapela, le tla lahlelwa ka seboping se tukang sa mollo hanghang. Ha ho na modimo ya tla le pholosa ho nna.”+
16 Shadrake, Meshake le Abednego ba re ho morena: “Morena Nebukadnezare, ha ho na letho le re tlamang hore re o arabe tabeng ena.
17 Morena, le haeba re ka lahlelwa ka mollong, Modimo wa rona eo re mo sebeletsang a ka kgona ho re pholosa ho wena le ho sebopi seo se tukang sa mollo.+
18 Le haeba a ke ke a re pholosa, morena, re kopa o tsebe hore re ke ke ra sebeletsa medimo ya hao kapa ra rapela setshwantsho sa kgauta seo o se hlommeng.”+
19 Nebukadnezare a halefela Shadrake, Meshake le Abednego haholo hoo tsela eo a neng a ikutlwa ka yona ka bona e ileng ya fetoha ka ho feletseng* yaba o laela hore sebopi se beseletswe ka makgetlo a supileng ho feta ka moo ba neng ba tlwaetse ho se beseletsa ka teng.
20 A laela hore masole a mang a hae a matla a tlame Shadrake, Meshake le Abednego mme a ba lahlele ka seboping se tukang sa mollo.
21 Banna bana ba tlangwa ba ntse ba apere diaparo tsa bona tsa ka hodimo, dikatiba le diaparo tse ding mme ba lahlelwa ka seboping se tukang sa mollo.
22 Banna ba ileng ba isa Shadrake, Meshake le Abednego seboping sa mollo, ke bona ba ileng ba bolawa ke malakabe a mollo hobane taelo ya morena e ne e le sehloho mme sebopi seo se ne se tjhesa haholo.
23 Banna bana ba bararo e leng Shadrake, Meshake le Abednego, ba ile ba wela ka seboping se tukang sa mollo ba ntse ba tlanngwe.
24 Ka nako eo, Morena Nebukadnezare a tshoha yaba o ema ka potlako. A re ho balaodi ba hae ba phahameng: “Akere re tlamme banna ba bararo ra ba lahlela ka mollong?” Ba re ho morena: “Ho jwalo morena.”
25 A re: “A ke le ntjhebiseng. Ke bona banna ba bane ba itsamaela ba lokolohile ka hara mollo ba sa tswa kotsi ebile wa bone o tshwana le mora wa medimo.”
26 Nebukadnezare a atamela monyako wa sebopi se tukang sa mollo yaba o re: “Shadrake, Meshake le Abednego, lona bahlanka ba Modimo ya Phahameng ka ho Fetisisa,+ tswang le tle mona.” Shadrake, Meshake le Abednego ba tswa ka hara mollo.
27 Diofisiri tse kgolo, balaodi, matona le balaodi ba phahameng ba morena ba neng ba bokane moo,+ ba bona hore mollo ha o a ka wa tjhesa banna bana,+ moriri wa bona o ne o sa tlaboha, diaparo tsa bona di ne di sa tjha ebile ba sa nkge le mosi feela.
28 Nebukadnezare a re: “Ho roriswe Modimo wa Shadrake, Meshake le Abednego,+ ya rometseng lengeloi la hae yaba o pholosa bahlanka ba hae. Ba ne ba mo tshepile yaba ba hana ho mamela taelo ya morena mme ba ne ba ikemiseditse ho shwa ho ena le ho sebeletsa kapa ho rapela modimo e mong ntle le Modimo wa bona.+
29 Ka hoo, ke fana ka taelo ya hore batho ba ditjhaba tsohle, merabe kapa dipuo tse fapaneng, ba ka buang hampe ka Modimo wa Shadrake, Meshake le Abednego, ba kgaolwe dikoto mme matlo a bona a fetolwe matlwana a setjhaba* hobane ha ho Modimo e mong ya kgonang ho pholosa batho ba hae jwalo ka yena.”+
30 Morena a nyollela* Shadrake, Meshake le Abednego boemong bo phahameng profinseng ya Babilona.+
Dintlha tse qetellong ya sehloho
^ Kapa: “seemahale.”
^ Ka Searame: “ditswe tse 60.” Setswe se lekana le disenthimithara tse 44,5. Sheba Ntlha ya B14.
^ Ka Searame: “ditswe tse tsheletseng.” Sheba Ntlha ya B14.
^ Kapa: “senya Bajuda lebitso.”
^ Kapa: “hoo a ileng a ba sosobanyetsa sefahleho.”
^ Kapa mohlomong: “moo ho lahlelwang matlakala teng; qubu ya bolokwe.”
^ Ka Searame: “a atlehisa.”
